ኤርምያስ 3

3 ¹እንዲህ ይላሉ፦ አንድ ሰው ሚስቱን ቢፈታ፣ እርስዋም ትታው ሌላ ባል ብታገባ፣ ዳግመኛ ወደ እርስዋ ይመለሳልን? ያቺ ምድር ፈጽማ አትረክስምን? አንቺ ከብዙ ወዳጆችሽ ጋራ አመነዘርሽ፤ ነገር ግን ወደ እኔ ትመለሻለሽን? ይላል አባትሽ።

²ዐይኖችሽን ወደ ባድማ ኮረብቶች አንሺና እይ፤ ያልተደፈርሽበት ስፍራ ወዴት አለ? በመንገድ ዳር ወዳጆችሽን ስትጠብቂ ተቀመጥሽ፤ በምድረ በዳ እንዳለ ዘላን ነበርሽ። ምድሪቱን በዝሙትሽና በክፋትሽ አረከስሻት። ³ስለዚህ ዝናቡ ተከልክሏል፣ የጸደይ ዝናብም አልዘነበም። አንቺ ግን የአመንዝራ ደፋር ፊት አለሽ፤ ልታፍሪ እምቢ አልሽ። ⁴አሁኑን እኮ፣ 'አባቴ ሆይ፣ አንተ የወጣትነቴ ወዳጅ ነህ' ብለሽ ወደ እኔ አልጠራሽኝምን? ⁵“ለዘላለም ይቈጣልን? ቍጣውንስ እስከ መጨረሻ ይጠብቃልን?” እንዲህ ትያለሽ፤ የምትችዪውን ክፋት ሁሉ ግን ታደርጊያለሽ።

አባታቸውን የረሱ ሁለት እኅትማማቾች

⁶በንጉሥ ኢዮስያስ ዘመን አባታችን እንዲህ አለኝ፦ “ታማኝ ያልሆነችው እስራኤል ያደረገችውን አየህን? ወደ ረጅም ኮረብታ ሁሉ ወጥታ፣ ከለመለመ ዛፍ ሁሉ በታች በዚያ አመነዘረች። ⁷ይህን ሁሉ ካደረገች በኋላ ወደ እኔ ትመለሳለች ብዬ አሰብሁ፤ ነገር ግን አልተመለሰችም፤ ከዳተኛዪቱ እኅትዋ ይሁዳም ይህን አየች። ⁸ታማኝ ባልሆነችው እስራኤል ዝሙት ሁሉ ምክንያት እንዳሰናበትኋትና የፍች ደብዳቤ እንደ ሰጠኋት አየች። ከዳተኛዪቱ እኅትዋ ይሁዳ ግን አልፈራችም፤ እርስዋም ሄዳ አመነዘረች። ⁹ዝሙትዋ ቀላል ነገር ስለ መሰላት፣ ከድንጋይና ከዛፍ ጋራ በማመንዘር ምድሪቱን አረከሰች። ¹⁰ይህም ሆኖ፣ ከዳተኛዪቱ እኅትዋ ይሁዳ በፍጹም ልብዋ ሳይሆን በግብዝነት ብቻ ወደ እኔ ተመለሰች እንጂ አልተመለሰችም፤ ይላል አባታችሁ።”

¹¹አባታችን እንዲህ አለኝ፦ ታማኝ ያልሆነችው እስራኤል ከከዳተኛዪቱ ይሁዳ ይልቅ ጻድቅ ሆና ተገኝታለች።

¹²ሂድና ወደ ሰሜን እንዲህ ብለህ ዐውጅ፦ ታማኝ ያልሆንሽ እስራኤል ሆይ፣ ተመለሺ፣ ይላል አባትሽ። በቍጣ አልመለከትሽም፤ መሐሪ ነኝና፣ ይላል አባትሽ፤ ለዘላለም አልቈጣም። ¹³በደልሽን ብቻ ዕወቂ፤ በአባትሽ ላይ ዐመፅሽ፣ ከለመለመ ዛፍ ሁሉ በታች ለእንግዶች ፍቅርሽን አበዛሽ፣ ድምፄንም አልታዘዝሽም፤ ይላል አባትሽ። ¹⁴እናንተ ታማኝ ያልሆናችሁ ልጆች ሆይ፣ ተመለሱ፣ ይላል አባታችሁ፤ ባላችሁ እኔ ነኝና። ከከተማ አንዱን፣ ከወገን ሁለቱን እወስዳችኋለሁ፤ ወደ ጽዮንም አመጣችኋለሁ። ¹⁵እንደ ልቤም የሆኑ እረኞችን እሰጣችኋለሁ፤ በዕውቀትና በማስተዋልም ይመግቧችኋል።

¹⁶በምድሪቱ በበዛችሁና በተጨመራችሁ ጊዜ፣ በዚያ ዘመን፣ ይላል አባታችሁ፣ ከእንግዲህ ማንም 'የአባታችን የኪዳን ታቦት' ብሎ አይናገርም። ወደ ልብ አይገባም፣ አይታሰብም፣ አይናፈቅም፣ ሌላም አይሠራም።

¹⁷“በዚያን ጊዜ ኢየሩሳሌምን የአባታችን ዙፋን ብለው ይጠሯታል፤ አሕዛብም ሁሉ የአባታችንን ስም ለማክበር በዚያ ይሰበሰባሉ። ከእንግዲህ ወዲያ የክፉ ልባቸውን ግትርነት አይከተሉም። ¹⁸በዚያ ዘመን የይሁዳ ቤት ከእስራኤል ቤት ጋራ ይተባበራል፤ አብረውም ከሰሜን ምድር ለአባቶቻችሁ ርስት አድርጌ ወደ ሰጠኋት ምድር ይመጣሉ። ¹⁹እኔም፦ 'በልጆቼ መካከል እንዴት ደስ ብሎኝ አስቀምጥሻለሁ፣ ያማረችውንም ምድር፣ ከአሕዛብ ሁሉ ይልቅ እጅግ ያማረ ርስት እሰጥሻለሁ!' አልሁ። 'አባቴ' ብለሽ ትጠሪኛለሽ፣ ከመከተሌም ፈቀቅ አትዪም ብዬ አሰብሁ። ²⁰ሚስት ለባልዋ ታማኝ እንዳልሆነች፣ እናንተ የእስራኤል ቤት፣ እንዲሁ ለእኔ ታማኝ ሳትሆኑ ቀራችሁ፤ ይላል አባታችሁ።

²¹በባድማ ኮረብቶች ላይ ድምፅ ተሰማ፤ የእስራኤል ልጆች ልቅሶና ምልጃ ነው፤ መንገዳቸውን ስላጣመሙ፣ አባታቸውንም ስለ ረሱ።

²²“እናንተ ታማኝ ያልሆናችሁ ልጆች ሆይ፣ ተመለሱ፤ ታማኝ አለመሆናችሁን እፈውሳለሁ።” “እነሆ፣ ወደ አንተ መጥተናል፤ አንተ አባታችን ነህና። ²³በኮረብቶች ላይ ያለው ጩኸት፣ በተራሮችም ላይ ያለው፣ በእውነት ከንቱ ነው፤ የእስራኤል መዳን በእውነት በአባታችን ዘንድ ነው። ²⁴ከወጣትነታችን ጀምሮ ያ አሳፋሪ ነገር የአባቶቻችንን የድካም ፍሬ፣ መንጎቻቸውንና ከብቶቻቸውን፣ ወንዶችና ሴቶች ልጆቻቸውንም በልቷል። ²⁵በኀፍረታችን እንተኛ፣ ውርደታችንም ይሸፍነን፤ እኛና አባቶቻችን ከወጣትነታችን ጀምሮ እስከ ዛሬ ድረስ በአባታችን ላይ ኀጢአት ሠርተናልና፤ የአባታችንንም ድምፅ አልሰማንም።”