Nyi Kü Jungto Longeilabü Lo?
Israel hoba Jihuda kho mailem akibü sao nyi tegü phoda, hoba Jihuda kho nyi khümbo aei shedbü ki, aishanga sao hapjinei ai alenenkei. Khei yingsikei seneibü Bouei mailem akibü shuong to chem to longeiashi dogo haukuda, haoeneibü shabü ong lenletashi dogo ong hida, hoba maimaitham haoen samtibü shepbei shuong thekuda.
3 1Haoenei lauda, Müt cheei haoyak sattialonga, hoba saoei hao bangan lubü bousu yakla lelaje, haoei sao jungto touje longeilabü lo? Kho kaonyek lemailela leilutikulabü aying lo? Nyi sanou thangbou juong yoa asangalan jungeia— khei yingsikei nyi kü jungto longeilabü lo? dogo kaibü Bouei lauda.
2Kongbü thüka shuong aeto kaibü nyek phonan chühashi: ai shanga nyi aleilutikubü ki? Bangjung nyi sanou thangbou shuong haiyeiko settikei, yama paibü müt che tegü. Kaibü asangalan hoba kaibü shabüei nyi kaonyek leilutikua. 3Khoei lang tapnin shuong jeian apbei, hoba yongbü lang aloukukei. Khei yingsikei nyi suonlamnyu tegü neikhu kaangbü kia; nyi himouko kila üangda. 4Nyi tousilengko kü to ngekko laukei aying lo, “Kü Bou, nyi kü nashoudangkabü thangbou ki”? 5“Haoei ponpen khauangshongko kilabü lo? Haoei haoeibü maangshat thonbü sühko pholabü lo?” Ho tegü nyi joyoda, lausikei nyi kümla thükbü amai pendou kümda.
Jembü Bou Maan Apbü Na Penyi
6Josia Choba chaloua Seneibü Bouei kü to laukei, “Mailem akibü Israelei ai kümbü nyi hapkei lo? Saoei thükkabü shongh pendou aeto angkei, hoba bunyu nyem pendou phanga, hoba khünei pejapelako jungeikei. 7Ngei, ‘Saoei ho pendou kümbü phaia sao kü jungto longeilabü,’ dogo thounoukei, lausikei sao alongei; hoba sao na khüpbülangbü Jihudaei kho hapbei. 8Mailem akibü Israelbü asangalan pendou shanga ngei sao sattiko bangbü le kubü kho Jihudaei hapbei. Khei yingsikei sao na khüpbülangbü Jihuda ahatkei; saoeikei hauan pejapelako jungeikei. 9Saoei jembü pejapela shisho dogo dambübaba, laang shuong hoba bunyu shuong yoa asangalan jungeiko kaonyek asaopokei. 10Ho tegü yingsikei, sao na mailem akibü Jihuda maangpon khümboei kü jungto alongei, lausikei huonko ong, dogo kaneibü Bouei lauda.”
11Seneibü Bouei kü to laukei, Mailem akibü Israel kho khüpbülangbü Jihuda to tongde saopobü ki.
12Hauashi hoba chanep aeto phinthonashi: Longeiashi, O mailem akibü Israel, dogo kaibü Bouei lauda. Ngei no angeko achühlabü, aishanga ngo onoubü ki, dogo kaibü Bouei lauda; ngei ponpen khauangshongko akilabü. 13Kaibü shedbü ong theletashi— nyi kaibü Bou khulimbo meimeikei, hoba bunyu nyem pendou phanga yenbou shuong to jembü sanou jemnyinkei, hoba kü ngüha alekei, dogo kaibü Bouei lauda. 14Longeiashi, kan mailem akibü shousi shuong, dogo kaneibü Bouei lauda, aishanga ngo kaneibü lao ki. Ngei kan laplabü— sangnyu chenei che, hoba phang chenei penyi— hoba kan Zion to sungbalabü. 15Kheijinei ngei kü maangpon tegübü sanlombü shuong kan la kulabü, hoba haoenei hapbüngebü hoba ditenbü yoa kan shemtilabü.
16Ladang kan kaonyeka bukko haako yeilaje, kho chaloua, dogo kaneibü Bouei lauda, aoyouei touje, “Seneibü Bou theyolanyobü Busen,” dogo alaulabü. Kho maanga aloulabü, adamenlabü, ayingsi amaanglemlabü, ayingsi lubü che akümlabü.
17“Kho chaloua haoenei Jerusalem to Seneibü Bou Setshang dogo nyenlabü, hoba phang pendouei seneibü Bou nyen to soumo hatla shanga, khünei chela loulabü. Haoenei touje jembü maangkaangbü, amaibü maangpon phaito asemlabü. 18Kho chaloua Jihuda chung Israel chung yoa chela yeilabü, hoba haosi chela chanep kaonyek ka, ngei kaneibü nyusibousi la phetphanla kubü kaonyek to loulabü. 19Ngei lolo laukei, ‘Ngei kan maangnyu angko kü shousi shuong yoa settikulabü, hoba chühsebü maibü kaonyek, phang pendou ka tongde phetphan maietbütham, kan la kulabü!’ Hoba kanei ngo to ‘Kü Bou’ dogo ngalabü, hoba kü phai semla ka ladangkei asepeilabü, dogo ngei thounoukei. 20Lausikei yaksaei jembü lao khulimbo khüpbolangko jungeibü tegü, kho tegü kan ngo khulimbo khüpbolangko jungeia, O Israel chung, dogo kaneibü Bouei lauda.
21Kongbü thüka shuong aeto ngühlang che ditda— Israel shousi shuongeibü mang haapbü hoba sudajabü—aishanga haoenei jembü lam amaiko yeikei hoba jembü Bou maan apbei.
22“Longeiashi, kan mailem akibü shousi shuong; ngei kaneibü mailem akibü maitilabü.” “Chühashi, künei louada, künei no jungto, aishanga no künei Bou ki. 23Maimaitham shongh shuong hoba shongh yaangbü shuong khüto ngühbü yaang kho amlangbü ki; maimaitham Israelbü khümenbü kho seneibü Bou yoa ki. 24Seneibü nashoudangka thama himou kümsilei kho seneibü pisibou shuongeibü labou longbü—haoeneibü sanshuong hoba masu shuong, haoeneibü shousi hoba nouyangshou shuong—suian apbei. 25Sen seneibü himoua yepkho, hoba seneibü the alenenbüei sen yukleptishima. Aishanga senei seneibü Bou khulimbo shabü shonkei—sen hoba seneibü pisibou shuong—seneibü nashoudangka thama ho chalou sühko, hoba senei seneibü Bou ngüha ale.”
