Yeremiya 3 FHB Father's Heart Bible™

3 ¹Iwo asalonga kuti: Mamuna angamwaza nkazace, iye mbamusiya mbasemba na mamuna unango, kodi iye anabwerera pontho kuna iye? Dziko ineyi nee inapswipiswa kakamwe? Iwe wacita undzeka na anyakufuna azinji—mbwenye usafuna kubwerera kuna Ine? alonga Baba wanu.

²Tsungunula maso ako kuna mitunda yakusowa cinthu, uone: Ndikupi kunakhonda iwe kuipiswa? M'mphepete mwa njira wakhala pansi mbudikhira anyakufuna, ninga nyakuyenda-yenda m'thando. Iwe wapswipisa dziko na undzeka wako na uipi wako. ³Na tenepo madzi a mvula aletsewa, mbzimba za mvula yakumalisa nkhabe kubwera. Mbwenye iwe uli na nkhope ya undzeka yakukhonda kugaya; usakhonda kucita manyadzo. ⁴Kodi cincino iwe nee wacemera kuna Ine, ‘Baba wanga, Imwe ndimwe xamwali wanga wa uphale wanga’? ⁵“Kodi Iye anapitiriza kuipirwa kwenda na kwenda? Kodi Iye anakoya ukali wace mpaka kumapeto?” Tenepa ndi muna lalongera iwe, mbwenye usacita pyonsene pyakuipa pinakwanisa iwe.

Alongo Awiri Adaduwala Baba Wawo

⁶Baba wathu alonga kuna ine mu ntsiku za Mambo Yosiya: “Kodi waona pidacita Izarayeli wakukhonda kukhulupirika? Iye akwira pa phiri zonsene zitali, pantsi pa miti yonsene yaukulu, mbacita undzeka penepo. ⁷Ine ndikhanyerezera kuti pakumala kucita pyonsene ipi iye anabwerera kuna Ine, mbwenye iye nee abwerera, na mulongo wace wakunyengeza Yuda aona pyenepi. ⁸Iye aona kuti thangwi ya upombo onsene wa Izarayeli wakukhonda kukhulupirika, Ine ndam'bulusa mbandimpasa tsamba yakumwaza banja. Mbwenye mulongo wace wakunyengeza Yuda nee agopa; iye-mbo aenda mbacita undzeka. ⁹Thangwi undzeka wace nee ukhali na basa kuna iye, iye apswipisa dziko, mbacita upombo na miyala na miti. ¹⁰Ngakhale tenepa, mulongo wace Yuda wakukhonda kukhulupirika nee abwerera kuna Ine na ntima onsene, mbwenye basi mu kunyengeza, alonga Baba wanu.”

¹¹Baba wathu alonga kuna ine: Izarayeli wakukhonda kukhulupirika alungama kupiringana Yuda wakunyengeza.

¹²Ndoko ukalonge kuelekera kumpoto: Bwerera, Izarayeli wakukhonda kukhulupirika, alonga Baba wanu. Ine nee ndinakuyang'ana na ukali, thangwi Ine ndine wantsisi, alonga Baba wanu; Ine nee ndinapitiriza kuipirwa kwenda na kwenda. ¹³Basi tawira mathangwi ako—kuti iwe waukira Baba wako, mbupereka kufuna kwako kuna anthu acilendo pantsi pa miti yonsene yaukulu, mbukhonda kubvera fala yanga, alonga Baba wanu. ¹⁴Bwererani, imwe anapiana akukhonda kukhulupirika, alonga Baba wanu, thangwi Ine ndine mamuna wanu. Ine ndinakutandani—m'bodzi kubuluka n'nzinda na awiri kubuluka m'banja— mbandikubweresani ku Siyoni. ¹⁵Penepo Ine ndinakupasani akumbizi akulingana na ntima wanga, anakudyesani na cidziwiso na kuzindikira.

¹⁶Mungathimizirika na kuanda mu dziko, mu ntsiku zenezi, alonga Baba wanu, nkhabe munthu anadzalonga pontho, ‘Bokosi ya cibverano ca Baba wathu.’ Nee inadzabwera mu manyerezero, nee inadzakumbukwa, nee inadzasowedwa, nee inadzacitwa inango.

¹⁷“Penepo iwo anadzacemera Yerusalema kuti Mpando Waumambo wa Baba wathu, na madzindza onsene anadzagumanyikana penepo toera kulemedza dzina ya Baba wathu. Nee anadzatowezera pontho mitima yawo yakuwuma, yakuipa. ¹⁸Mu ntsiku zenezi nyumba ya Yuda inadzaphatana na nyumba ya Izarayeli, na pabodzi iwo anadzabwera kubuluka ku dziko ya kumpoto mpaka ku dziko idapasa Ine ambuya anu ninga unthaka. ¹⁹Ine ndekha ndalonga, ‘Mphapo mwakutsandzaya ninga ndinakuikha pakati pa anapiana anga mbandikupasa dziko yadidi, unthaka wakubalika kakamwe kupiringana dzindza iriponsene!’ Na Ine ndikhanyerezera kuti iwe unandicemera ‘Baba wanga’ mbukhonda kundisiya kweneko kunditowezera. ²⁰Mbwenye ninga nkazi wakukhonda kukhulupirika kuna mamunace, tenepa imwe nee mwakhala wakukhulupirika kuna Ine, nyumba ya Izarayeli, alonga Baba wanu.

²¹Fala isabveka pa mitunda yakusowa cinthu— kulira na kudembetera kwa anapiana a Izarayeli—thangwi iwo apotesa njira yawo mbaduwala Baba wawo.

²²“Bwererani, imwe anapiana akukhonda kukhulupirika; Ine ndinawangisa kukhonda kukhulupirika kwanu.” “Ife tiri pano, tabwera kuna Imwe, thangwi Imwe ndimwe Baba wathu. ²³Mwandimomwene phokoso iri pa magomo na mapiri ndi yakunyengeza; mwandimomwene muna Baba wathu muli upulumuki wa Izarayeli. ²⁴Kubulukira mu uphale wathu, cinthu cenesi cakupasa manyadzo cadya pisapo pya nyatwa za ambuya athu—pifuyo pyawo pya mabira na pya ng'ombe, anawo acimuna na acikazi. ²⁵Mbatigone pantsi mu manyadzo athu, na kunyazika kwathu kutikwinje. Thangwi tadawira kuna Baba wathu—ife na ambuya athu—kubulukira mu uphale wathu mpaka lero, pontho nee tabvera fala ya Baba wathu.”