Jeremia 3 FHB Father's Heart Bible™

3 ¹Vanoti: Kana murume akaramba mukadzi wake uye akamusiya akawanikwa nomumwe murume, achadzokera kwaari zvakare here? Ko nyika iyoyo haingasvibiswi zvachose here? Iwe wakapata nevadikani vazhinji—asi zvino woda kudzokera kwandiri here? ndizvo zvinotaura Baba venyu.

²Simudza meso ako kumatunhu akakwirira utarise: ndepapi pawusina kusvibiswa? Wakagara pamativi enzira uchimirira vadikani, somudzungairi murenje. Wakasvibisa nyika noufeve hwako nouipi hwako. ³Saka mvura yakadzivisirwa, uye mvura yomunakamwe haina kuuya. Asi une chiso chehure chisinganyari; unoramba kunyara. ⁴Hauna here kungodana kwandiri iko zvino, uchiti, “Baba vangu, ndimi shamwari youduku hwangu”? ⁵“Vacharamba vakatsamwa nokusingaperi here? Vacharamba vane hasha kusvikira kumagumo here?” Ndizvo zvaunotaura, asi unoita zvakaipa zvose zvaunogona.

Hanzvadzi Mbiri Dzakakanganwa Baba Vavo

⁶Baba vedu vakati kwandiri mumazuva aMambo Josaya: “Wakaona here zvakaitwa neIsraeri asina kutendeka? Akakwira pamusoro pechikomo chimwe nechimwe chakakwirira, pasi pomuti mumwe nomumwe wakapfumvutira, akaita ufeve ipapo. ⁷Ndakafunga kuti mushure mokunge aita zvose izvi aizodzokera kwandiri, asi haana kudzoka, uye hanzvadzi yake inonyengera Judha akazviona. ⁸Akaona kuti nokuda kwoupombwe hwose hweIsraeri asina kutendeka ndakamuendesa ndikamupa gwaro rokuramba. Asi hanzvadzi yake inonyengera Judha haana kutya; iyewo akaenda akandoita ufeve. ⁹Nokuti ufeve hwake wakanga uri chinhu chiduku kwaari, akasvibisa nyika, achiita upombwe namatombo nemiti. ¹⁰Kunyange zvakadaro, hanzvadzi yake isina kutendeka Judha haana kudzokera kwandiri nomwoyo wose, asi nokunyepedzera chete, ndizvo zvinotaura Baba venyu.”

¹¹Baba vedu vakati kwandiri: Israeri asina kutendeka akaratidza kururama kupfuura Judha anonyengera.

¹²Enda undoparidza wakananga kumusoro, uchiti: Dzoka, iwe Israeri asina kutendeka, ndizvo zvinotaura Baba venyu. Handingakutariri ndakatsamwa, nokuti ndine tsitsi, ndizvo zvinotaura Baba venyu; handingarambi ndakatsamwa nokusingaperi. ¹³Chingobvuma mhosva yako— kuti wakamukira Baba vako, ukapa rudo rwako kuvatorwa pasi pomuti wose wakapfumvutira, uye hauna kuteerera inzwi rangu, ndizvo zvinotaura Baba venyu. ¹⁴Dzokai, imi vana vasingatendi, ndizvo zvinotaura Baba venyu, nokuti ndini murume wenyu. Ndichakutorai—mumwe muguta nevaviri mumhuri— ndigokuisai kuZioni. ¹⁵Ipapo ndichakupai vafudzi vanoenderana nomwoyo wangu, vachakudyisai noruzivo nokunzwisisa.

¹⁶Pamuchange mawanda muchiwanda munyika, mumazuva iwayo, ndizvo zvinotaura Baba venyu, hapana achazoti, “Areka yesungano yaBaba vedu.” Haichazopinda mumwoyo, kana kurangarirwa, kana kushuviwa, uye hakuchazogadzirwa imwe.

¹⁷“Panguva iyoyo vachatumidza Jerusarema kuti Chigaro Choushe chaBaba vedu, uye ndudzi dzose dzichaunganira ipapo kuti dzikudze zita raBaba vedu. Havachazoteveri mwoyo yavo yakaoma, yakaipa. ¹⁸Mumazuva iwayo imba yaJudha ichabatana neimba yaIsraeri, uye vachauya pamwe chete vachibva kunyika yokumusoro vachienda kunyika yandakapa madzitateguru enyu kuti ive nhaka. ¹⁹Ini ndakati, ‘Haiwa ndaizofara sei kukuisa pakati pavana vangu nokukupa nyika yakanaka, nhaka yakanakisisa pandudzi dzose!’ Uye ndakafunga kuti uchandidana uchiti ‘Baba vangu’ uye kuti haungazombofuratiri kunditevera. ²⁰Asi somukadzi asina kutendeka kumurume wake, saizvozvo wakanga usina kutendeka kwandiri, iwe imba yaIsraeri, ndizvo zvinotaura Baba venyu.

²¹Inzwi rinonzwika pamatunhu akakwirira— kuchema nokukumbira kwavana vaIsraeri—nokuti vakaminamisa nzira yavo vakakanganwa Baba vavo.

²²“Dzokai, imi vana vasingatendi; ndichaporesa kusatenda kwenyu.” “Tiri pano, tinouya kwamuri, nokuti ndimi Baba vedu. ²³Zvirokwazvo bope riri pazvikomo nepamakomo makuru inhema; zvirokwazvo ruponeso rwaIsraeri ruri muna Baba vedu. ²⁴Kubvira pauduku hwedu chinhu chinonyadzisa chakadya zvibereko zvokushanda kwamadzitateguru edu—makwai nemombe dzavo, vanakomana vavo navanasikana vavo. ²⁵Ngatirare pasi munyadzi dzedu, uye kunyadziswa kwedu ngakutifukidze. Nokuti takatadzira Baba vedu—isu namadzitateguru edu—kubvira pauduku hwedu kusvikira zuva ranhasi, uye hatina kuteerera inzwi raBaba vedu.”