Jeremia 3 FHB Father's Heart Bible™

3 ¹Nĩmoigaga atĩrĩ: Mũndũ angĩingata mũtumia wake, nake akamũtiga akahikĩra mũndũ ũngĩ, githĩ no acooke kũrĩ we rĩngĩ? Githĩ bũrũri ũcio ndũngĩthaahio o biũ? Wee nĩwĩkĩte ũmaraya na endwa aingĩ— na githĩ no ũcooke kũrĩ niĩ? ũũ nĩguo Ithe waku ekuuga.

²Tiira maitho maku ũrore kũndũ kũrĩa gũtũũgĩru gũtarĩ kĩndũ: nĩ handũ harĩkũ ũtarĩ wakomwo naho? Mĩenainĩ ya njĩra nĩwaikaraga weterete endwa aku, o ta mũndũ ũthiiaga werũinĩ. Nĩũthaahĩtie bũrũri na ũmaraya waku na waganu waku. ³Nĩ ũndũ ũcio mbura nĩĩgirĩtio, nayo mbura ya kĩmera ĩtiũkĩte. No wee ũrĩ na ũthiũ wa mũmaraya ũtarĩ thoni; nĩũregete gũconoka. ⁴Githĩ o rĩu ndũnanjĩta ũkĩnjĩĩra atĩrĩ, ‘Awa, nĩwe mũrata wa ũnini wakwa’? ⁵“Githĩ egũtũũra arakarĩte nginya tene? Githĩ egũtũũria marakara make nginya mũthia?” Ũguo nĩguo waragia, no nĩwĩkaga ũũru wothe ũrĩa ũngĩhota.

Aarĩ a Nyina Eerĩ arĩa Mariganĩirwo nĩ Ithe wao

⁶Matukũinĩ ma Mũthamaki Josia, Ithe witũ aanjĩĩrire atĩrĩ: “Nĩwonete ũrĩa Isiraeli ũrĩa ũtaarĩ mwĩhokeku eekire? Nĩahaicĩte irĩma ciothe iria ndaaya na igũrũ, agĩthiĩ rungu rwa mĩtĩ yothe ĩrĩa mĩruru, agĩĩka ũmaraya ho. ⁷Niĩ ndeeciirie atĩ thuutha wa gwĩka maũndũ macio moothe nĩagaacooka kũrĩ niĩ, no ndaacookire, nake mwarĩ wa nyina ũrĩa wa ũhinga, Juda, akĩĩonera ũndũ ũcio. ⁸Nĩoonire atĩ nĩ ũndũ wa ũtharia wothe wa Isiraeli ũrĩa ũtaarĩ mwĩhokeku, nĩndamũingatire ngĩmũhe marũa ma ũtharani. No mwarĩ wa nyina ũrĩa wa ũhinga, Juda, ndeetigĩrire; o nake agĩthiĩ agĩĩka ũmaraya. ⁹Na tondũ aatuaga ũmaraya wake ũrĩ ũndũ mũnini, nĩathaahirie bũrũri, agĩtharia na mahiga na mĩtĩ. ¹⁰O na kũrĩ ũguo, mwarĩ wa nyina ũrĩa ũtarĩ mwĩhokeku, Juda, ndaacookire kũrĩ niĩ na ngoro yake yothe, no aacookire na ũhinga tu, ũũ nĩguo Ithe waku ekuuga.”

¹¹Ithe witũ aanjĩĩrire atĩrĩ: Isiraeli ũrĩa ũtarĩ mwĩhokeku nĩonanĩtie ũthingu gũkĩra Juda ũrĩa wa ũhinga.

¹²Thiĩ wanĩrĩre ũhoro ũyũ werekeire mwena wa gathigathini: Cooka, wee Isiraeli ũrĩa ũtarĩ mwĩhokeku, ũũ nĩguo Ithe waku ekuuga. Ndigũkũrorera na marakara, nĩgũkorwo ndĩ na tha, ũũ nĩguo Ithe waku ekuuga; ndigũtũũra ndakarĩte nginya tene. ¹³Ĩtĩkĩra mahĩtia maku—atĩ nĩwaremeire Ithe waku, ũkĩheana wendo waku kũrĩ ageni rungu rwa mĩtĩ yothe ĩrĩa mĩruru, na ndwathĩkĩire mũgambo wakwa, ũũ nĩguo Ithe waku ekuuga. ¹⁴Cookai, inyuĩ ciana itarĩ na wĩhokeku, ũũ nĩguo Ithe wanyu ekuuga, nĩgũkorwo nĩ niĩ mũthuuri wanyu. Nĩngamũoya—ũmwe kuuma itũũrainĩ, na eerĩ kuuma mũhĩrĩgainĩ— ndĩmũtware Zayuni. ¹⁵Hĩndĩ ĩyo nĩngamũhe arĩithi maringaine na ngoro yakwa, arĩa makaamũrĩithia na ũmenyo na ũtaũku.

¹⁶Hĩndĩ ĩrĩa mũkaingĩha na mũiyũre bũrũri, matukũinĩ macio, ũũ nĩguo Ithe wanyu ekuuga, gũtirĩ mũndũ ũgaacooka kuuga atĩrĩ, ‘Ithandũkũ rĩa kĩrĩĩkanĩro kĩa Ithe witũ.’ Rĩtigacooka gũũka meciiriainĩ, kana rĩririkanwo, kana rĩĩrirĩrio, o na gũtirĩ rĩngĩ rĩkaathondekwo.

¹⁷“Hĩndĩ ĩyo nĩmagĩĩta Jerusalemu Gĩtĩ kĩa Ũnene kĩa Ithe witũ, nacio ndũũrĩrĩ ciothe nĩikoongana kuo nĩguo itĩĩe rĩĩtwa rĩa Ithe witũ. Matigacooka kũrũmĩrĩra ngoro ciao njũmũ na njũru. ¹⁸Matukũinĩ macio nyũmba ya Juda nĩĩkanyiitana na nyũmba ya Isiraeli, nao nĩmagooka hamwe moimĩte bũrũri wa mwena wa gathigathini, mathiĩ bũrũri ũrĩa ndaaheire maithe manyu ma tene ũtuĩke igai rĩao. ¹⁹Niĩ mwene ndoigire atĩrĩ, ‘Kaĩ ingĩkenete gũkũiga gatagatĩ ka ciana ciakwa, na ngũhe bũrũri mwega, igai rĩrĩa rĩega mũno gũkĩra rĩa rũrĩrĩ o ruothe!’ Na ndeeciirie atĩ nĩũkanjĩta ‘Awa’, na ndũkahutatĩre kũnũmĩrĩra. ²⁰No o ta ũrĩa mũtumia aremaga kwĩhokeka kũrĩ mũthuuri wake, ũguo noguo wee ũnjagĩte kwĩhokeka, wee nyũmba ya Isiraeli, ũũ nĩguo Ithe waku ekuuga.

²¹Nĩkũiguĩkaga mũgambo kũndũ kũrĩa gũtũũgĩru gũtarĩ kĩndũ— nĩkũrĩra na gũthaithana kwa ciana cia Isiraeli—nĩ ũndũ nĩmogomirie njĩra yao na makĩriganĩrwo nĩ Ithe wao.

²²“Cookai, inyuĩ ciana itarĩ na wĩhokeku; nĩngahonia ũrema wanyu.” “Ĩ tũrĩ aya, nĩtuoka kũrĩ we, nĩgũkorwo nĩwe Ithe witũ. ²³Ti-itherũ inegene rĩa tũrĩma na irĩma iria nene nĩ rĩa maheeni; ti-itherũ ũhonokio wa Isiraeli ũrĩ harĩ Ithe witũ. ²⁴Kuuma ũniniinĩ witũ, kĩndũ kĩu kĩa thoni nĩkĩrĩĩte maciaro ma wĩra wa maithe maitũ ma tene—ndũũru ciao cia mbũri na cia ng'ombe, aariũ ao na airĩĩtu ao. ²⁵Nĩtũkome thoniinĩ ciitũ, naguo gĩconoko giitũ nĩgĩtũhumbĩre. Nĩgũkorwo nĩtwĩhĩirie Ithe witũ—ithuĩ na maithe maitũ ma tene—kuuma ũniniinĩ witũ nginya ũmũthĩ, na tũtiathĩkĩire mũgambo wa Ithe witũ.”