ኤርሚያስ 3 FHB Father's Heart Bible™

3 ¹ከምዙይ ይብሉ፦ ሓደ ሰብ ንሰበይቱ እንተ ፈትሐ፥ ንሳ ኸዓ ሓዲጋቶ ናብ ካልእ ሰብኣይ እንተ ተመርዐወት፥ ናብኣ ከም ብሓድሽ ይምለስዶ? እታ ምድሪ እቲኣ ፈፂማዶ ኣይትረክስን? ንስኺ ግና ምስ ብዙሓት ፍቁራት ኣመንዚርኪ— ናባይ ክትምለሲዶ ኢኺ? ይብል ኣቦኺ።

²ኣዒንትኺ ናብተን ጥራያት በረኽቲ ኣልዒልኪ ርአዪ፦ ኣበይ ዘይተነወርኪ? ኣብ ጥቓ መንገድታት ንፍቁራት ክትፅበዪ ተቐሚጥኪ፥ ከም ዓረባዊ ኣብ ምድረ በዳ። ነታ ምድሪ ብምንዝርናኽን ብክፍኣትኽን ኣርኪስክያ። ³ስለዙይ እቲ ዝናማት ተኸልአ፥ ዝናም ፀደይውን ኣይመፀን። ንስኺ ግና ደፋር ገፅ ኣመንዝራ ኣለኪ፤ ክትሓፍሪ ኣበኺ። ⁴ሕዚዶ ናባይ፥ “ኣቦይ፥ ንስኻ ፈታዊ ንእስነተይ ኢኻ” ኢልኪ ኣይፀዋዕክንን? ⁵“ንሱ ንዘለኣለም ክቑጣዕዶ እዩ? ቍጥዓኡ ንፍፃመ ክሕዝዶ እዩ?” ከምዙይ ኢኺ እትዛረቢ፥ ኵሉ እትኽእልዮ ክፉእ ግና ትገብሪ ኣለኺ።

ነቦአን ዝረስዓ ኽልተ ኣሓት

⁶ኣቦና ኸዓ ብዘመን ንጉስ ኢዮስያስ ከምዙይ በለኒ፦ “እታ ከዳዒት እስራኤል ዝገበረቶ ርኢኻዶ? ናብ ኵሉ ነዊሕ ኵድኵዳ ደዪባ፥ ኣብ ትሕቲ ኵሉ ልሙዕ ኦም ኣብኡ ኣመንዘረት። ⁷ነዝ ኵሉ ምስ ገበረት ድማ ናባይ ክትምለስ ይመስለኒ ነበረ፥ ንሳ ግና ኣይተመለሰትን፤ እታ ጠላም ሓፍታ ይሁዳ ኸዓ ረአየቶ። ⁸ነቲ ኵሉ ምንዝርና እታ ከዳዒት እስራኤል ሰዲደ፥ ናይ መፍትሒኣ ፅሑፍ ከም ዝሃብክዋ ረአየት። እንተ ኾነ እታ ጠላም ሓፍታ ይሁዳ ኣይፈርሀትን፤ ንሳ ኸዓ ኸይዳ ኣመንዘረት። ⁹ምንዝርናኣ ቀሊል ስለ ዝመሰላ ኸዓ፥ ምስ እምንን ኦምን እናዘመወት ንምድሪ ኣርከሰታ። ¹⁰ምስዙይ ኵሉ ኸዓ፥ እታ ከዳዒት ሓፍታ ይሁዳ ብምትምሳል እምበር ብምሉእ ልባ ናባይ ኣይተመለሰትን፥ ይብል ኣቦኺ።”

¹¹ኣቦና ኸዓ ከምዙይ በለኒ፦ እታ ከዳዒት እስራኤል ካብታ ጠላም ይሁዳ ኣዝያ ፃድቕቲ ኾይና።

¹²ኪድ ናብ ሰሜን ኣቢልካ ኸዓ ኸምዙይ ኢልካ ኣውጅ፦ ኣቲ ከዳዒት እስራኤል፥ ተመለሲ፥ ይብል ኣቦኺ። ኣነ መሓሪ እየ እሞ፥ ብቑጥዓ ኣይጥምተክን፤ ይብል ኣቦኺ፤ ንዘለኣለም ኣይቅየምን እየ። ¹³በደልኪ ጥራሕ እመኒ፦ ኣብ ልዕሊ ኣቦኺ ዓሚፅኪ፥ ኣብ ትሕቲ ኵሉ ልሙዕ ኦም ፍቕርኺ ናብ ጓኖት በቲንኪ፥ ቃለይ ከዓ ኣይሰማዕክንን፥ ይብል ኣቦኺ። ¹⁴ኣቱም ከዳዓት ውሉድ፥ ተመለሱ፥ ይብል ኣቦኹም፥ ኣነ ሰብኣይኩም እየ እሞ። ካብ ከተማ ሓደ፥ ካብ ዓሌት ከዓ ኽልተ ወሲደ፥ ናብ ፅዮን ከምፅአኩም እየ። ¹⁵ከምቲ ልበይ ዝደልዮ ጓሶት ድማ ክህበኩም እየ፤ ንሳቶም ከዓ ብፍልጠትን ብምስትውዓልን ክምግቡኹም እዮም።

¹⁶ኣብታ ምድሪ ምስ በዛሕኩምን ምስ ረባሕኩምን፥ በተን መዓልቲታት እቲኣተን፥ ይብል ኣቦኹም፥ መሊሶም “ታቦት ኪዳን ኣቦና” ኣይብሉን፤ ኣብ ልቦም ከዓ ኣይመፆምን፥ ኣይዝክርዎን፥ ኣይናፍቅዎን፥ ካልእውን ኣይስራሕን።

¹⁷“ሽዑ ንኢየሩሳሌም ‘ዙፋን ኣቦና’ ኢሎም ክፅውዕዋ እዮም፤ ኵሎም ኣህዛብ ከዓ ንስም ኣቦና ምእንቲ ኼኽብሩ ናብኣ ክእከቡ እዮም። ደጊምውን ነቲ ተሪር ክፉእ ልቦም ኣይክተሉን እዮም።” ¹⁸በተን መዓልቲታት እቲኣተን ቤት ይሁዳ ምስ ቤት እስራኤል ክሕበር እዩ፤ ብሓንሳእ ድማ ካብ ሰሜናዊት ምድሪ ናብታ ንኣቦታትኩም ንርስቲ ዝሃብክዋ ምድሪ ክመፁ እዮም። ¹⁹ኣነ ድማ “ብኸመይ ደስ ኢሉኒ ኣብ ማእኸል ደቀይ ምቐመጥኩኺ፥ ባህ እተብል ምድሪ ኸዓ ምሃብኩኺ፥ ካብ ኵሉ ኣህዛብ ኣዝያ ፅብቕቲ ዝኾነት ርስቲ!” በልኩ። “ኣቦይ” ክትብልኒ፥ ካብ ምስዓበይ ከዓ ከቶ ኸም ዘይትግለሲ ድማ ይመስለኒ ነበረ። ²⁰ግና ከምታ ንሰብኣያ እትጠልም ሰበይቲ፥ ከምኡ ኣቱም ቤት እስራኤል ጠሊምኩምኒ ኢኹም፥ ይብል ኣቦኹም።

²¹ኣብ ጥራያት በረኽቲ ድምፂ ይስማዕ ኣሎ፦ ብኽያትን ምህለላን ደቂ እስራኤል፤ ንመንገዶም ኣጣምሚሞም፥ ነቦኦም ድማ ረሲዖም እዮም እሞ።

²²“ኣቱም ከዳዓት ውሉድ፥ ተመለሱ፤ ክሕደትኩም ከሕውየልኩም እየ።” “እንሆ ኣለና፥ ናባኻ ንመፅእ ኣለና፥ ንስኻ ኣቦና ኢኻ እሞ። ²³ብሓቂ፥ እቲ ኣብ ኰረብትን ኣብ ኣኽራንን ዝስማዕ ወኻዕታ ከንቱ እዩ፤ ብሓቂ ምድሓን እስራኤል ብኣቦና እዩ። ²⁴ካብ ንእስነትና ጀሚሩ፥ እቲ ዜሕፍር ነገር ነቲ ፍረ ድኻም ኣቦታትና፥ ነባጊዖምን ኣሓሆምን፥ ነወዳቶምን ኣዋልዶምን በሊዕዎ እዩ። ²⁵ብሕፍረትና ንደቅስ፤ ውርደትናውን ይሸፍነና። ንሕናን ኣቦታትናን ካብ ንእስነትና ክሳዕ ሎሚ መዓልቲ ንኣቦና በዲልና ኢና እሞ፥ ንድምፂ ኣቦና ኣይሰማዕናን።”