Sekariah 4

4 ¹Nígbà náà, áńgẹ́lì tí ó ń bá mi sọ̀rọ̀ padà wá, ó sì jí mi dìde, gẹ́gẹ́ bí ẹni tí a jí lójú oorun. ²Ó béèrè pé, “Kí ni ìwọ rí?” Mo dáhùn pé, “Mo rí ọ̀pá fìtílà wúrà kan, pẹ̀lú àbọ̀ kan lórí rẹ̀, àti fìtílà méje, pẹ̀lú ọ̀nà méje fún ọ̀kọ̀ọ̀kan àwọn fìtílà tí ń bẹ lórí rẹ̀.

³Igi ólífì méjì sì dúró lẹ́gbẹ̀ẹ́ rẹ̀, ọ̀kan ní apá ọ̀tún àbọ̀ náà, èkejì ní apá òsì rẹ̀.”

⁴Mo sì béèrè lọ́wọ́ áńgẹ́lì tí ó ń bá mi sọ̀rọ̀ pé, “Kí ni ìwọ̀nyí, olúwa mi?”

⁵Nígbà náà ni áńgẹ́lì tí ó ń bá mi sọ̀rọ̀ dáhùn pé, “Ìwọ kò ha mọ ohun tí ìwọ̀nyí jẹ́?” Mo wí pé, “Bẹ́ẹ̀ kọ́, olúwa mi.”

⁶Ó sì sọ fún mi pé, “Èyí ni ọ̀rọ̀ Baba wa sí Serubbabeli: Kì í ṣe nípa ipá, bẹ́ẹ̀ ni kì í ṣe nípa agbára, bí kò ṣe nípa Ẹ̀mí mi, ni Baba àwọn ọmọ ogun ọ̀run wí. ⁷Ta ni ìwọ, ìwọ òkè ńlá? Níwájú Serubbabeli ìwọ yóò di pẹ̀tẹ́lẹ̀. Yóò sì mú òkúta orí kóró náà jáde pẹ̀lú ariwo pé, ‘Oore-ọ̀fẹ́, oore-ọ̀fẹ́ sí i!’

⁸Nígbà náà ni ọ̀rọ̀ Baba wa tọ̀ mí wá pé,

⁹Ọwọ́ Serubbabeli ni ó fi ìpìlẹ̀ ilé yìí sọlẹ̀; ọwọ́ rẹ̀ ni yóò sì parí rẹ̀. Nígbà náà ni ìwọ yóò mọ̀ pé Baba àwọn ọmọ ogun ọ̀run ni ó rán mi sí ọ. ¹⁰Ta ni ó ti kẹ́gàn ọjọ́ àwọn ohun kéékèèké? Wọn yóò yọ̀, nígbà tí wọn bá rí okùn ìwọ̀n ní ọwọ́ Serubbabeli. Àwọn méje wọ̀nyí ni ojú Baba wa, tí ń rìn káàkiri gbogbo ayé.”

¹¹Nígbà náà ni mo béèrè lọ́wọ́ rẹ̀ pé, “Kí ni igi ólífì méjì wọ̀nyí tí ń bẹ ní apá ọ̀tún àti apá òsì ọ̀pá fìtílà náà?” ¹²Mo tún béèrè pé, “Kí ni ẹ̀ka ólífì méjì wọ̀nyí tí ń bẹ lẹ́gbẹ̀ẹ́ ọ̀pọ́nà wúrà méjì tí ń da òróró wúrà jáde?”

¹³Ó sì dá mi lóhùn pé, “Ìwọ kò ha mọ ohun tí ìwọ̀nyí jẹ́?” Mo wí pé, “Bẹ́ẹ̀ kọ́, olúwa mi.”

¹⁴Ó sì wí pé, “Àwọn wọ̀nyí ni ẹni àmì òróró méjì tí ń dúró lẹ́gbẹ̀ẹ́ Olódùmarè gbogbo ayé.”