Bou Ngesakbü Thakla Athük
Hon wanthung denshang che, oliv bunyu penyiei lotikubü, Zerubabel chem hanbü asühshongko kibüa maangshattibü to jongaikei. Seneibü Boueibü ngüh hao to: Hauei aying, seisihauei ayingsi, lausikei kü Soushouei ong. Chemshang lotbü ikei kho khümtilabü; aoeikei hanbü shuong nyiku tetak.
4 1Hobaje kü to joyokei hangangbüei sepeian longkei, hoba yepbü ka pienbü müt che tegü ngo pienkei. 2Haoei kü to phekei, “Nyi ai hapda?” Ngei jongaikei, “Hon wanthung denshang che, kho maang to buphau che, wanthung pemnyet, hoba maang kibü wanthung weko shanga khün pemnyet pemnyet hapda.
3Kho nyangko oliv bunyu penyi loda, che buphau mae aenei hoba lubü kho nanae aenei ki.”
4Hoba ngei kü to joyokei hangangbü to laukei, “Ngeibü bunyu, habü ho ai?”
5Hobaje kü to joyokei hangangbüei jongaikei, “Habü ho ai kia dogo nyi angelo?” Ngei laukei, “Ange, ngeibü bunyu.”
6Haoei kü to laukei, “Ho Zerubabel to seneibü Boueibü ngüh ki: Hauei aying, seisihauei ayingsi, lausikei kü Soushouei ong, dogo Thükenbou Bouei lauda. 7No ao, shongh yaangbü? Zerubabel thedanga no tangsheitham yeitilabü. Haoei “Onou, kho to onou!” dogo uihinkei hoba khu laang leiyenlabü.
8Hobaje seneibü Boueibü ngüh kü jungto loukei:
9Zerubabel ikei ho chem chemshang lotikei; haoeibü ikei kho khümtilabü. Kheijinei Thükenbou Bouei ngo kan jungto hautikei dogo kanei ngelabü. 10Hanbü shuong chalou aoei nyikukei? Haoenei Zerubabel ika jaklebü laang hapan olinyolabü. Habü pemnyet kho kaodak pendoua chühlabü seneibü Bou nyek ki.”
11Kheijinei ngei hao to phekei, “Wanthung mae aenei hoba nanae aenei kibü oliv bunyu penyi ho ai?” 12Ngei toukei phekei, “Hon onang khüpbü hon khün penyi nyangko kibü oliv bhek penyi ho ai?”
13Haoei kü to laukei, “Habü ho ai kia dogo nyi angelo?” Ngei laukei, “Ange, ngeibü bunyu.”
14Haoei laukei, “Habü ho kaodak pendou Bunyubou nyangko loubü naangenbü müt penyi ki.”
