Limyè Papa a Pa Ka Rete

Yon chandelye an lò ke de pye oliv ap bay lwil reponn dekourajman Zowobabèl genyen pou yon tanp ki piti e ki poko fini. Pawòl Papa nou ba li: se pa ak fòs, ni ak pouvwa, men se ak Lespri mwen. Men ki te poze fondasyon an pral fini l; pesonn pa dwe meprize ti bagay.

Chapit 4.

Apre sa, zanj ki t'ap pale avè m lan tounen, li reveye m, tankou yon moun yo fèk reveye nan dòmi. Li mande m: “Kisa ou wè?” Mwen di: “Yon lampadè an lò, ak yon bòl anwo l, sèt lanp, ak sèt ti tiyo pou chak lanp ki anwo a.

De pye oliv kanpe bò kote l, youn sou bò dwat bòl la, lòt la sou bò gòch li.”

Mwen di zanj ki t'ap pale avè m lan: “Kisa bagay sa yo ye, mèt mwen?”

Lè sa a, zanj ki t'ap pale avè m lan di: “Ou pa konnen kisa bagay sa yo ye?” Mwen di: “Non, mèt mwen.”

Li di mwen: “Men pawòl Papa nou voye bay Zowobabèl: Se pa ak fòs, ni ak pouvwa, men se ak Lespri mwen, se sa Papa ki kòmande lame syèl la di. Ki moun ou ye, gwo mòn? Devan Zowobabèl w'ap tounen tè plat. L'ap pote dènye wòch la soti, pandan l'ap rele: ‘Gras, gras pou li!’

Apre sa, pawòl Papa nou vin jwenn mwen, li di:

Se men Zowobabèl ki te poze fondasyon kay sa a; se men l tou ki va fini l. Lè sa a, n'a konnen se Papa ki kòmande lame syèl la ki voye m kote nou. Ki moun ki te meprize jou ti bagay yo? Y'ap kontan lè y'a wè fil plon an nan men Zowobabèl. Sèt bagay sa yo se je Papa nou, k'ap gade toupatou sou tout latè.”

Lè sa a, mwen mande l: “Kisa de pye oliv sa yo ye, ki sou bò dwat ak bò gòch lampadè a?” Mwen mande ankò: “Kisa de branch oliv sa yo ye, ki bò kote de ti tiyo an lò k'ap vide lwil dore a?”

Li di mwen: “Ou pa konnen kisa bagay sa yo ye?” Mwen di: “Non, mèt mwen.”

Li di: “Se de moun yo chwazi ak lwil ki kanpe bò kote Mèt tout latè a.”