జెకర్యా 4

4 ¹అప్పుడు నాతో మాట్లాడిన దూత తిరిగి వచ్చి, నిద్ర నుండి లేపబడినవానివలె నన్ను మేల్కొలిపెను. ²ఆయన నన్ను, "నీవు ఏమి చూచుచున్నావు?" అని అడిగెను. అందుకు నేను, "ఒక బంగారు దీపస్తంభమును, దాని పైన ఒక పాత్రను, ఏడు దీపములను, పైనున్న ప్రతి దీపమునకు ఏడేసి గొట్టములను చూచుచున్నాను."

³దాని దగ్గర రెండు ఒలీవ చెట్లు నిలిచియున్నవి, ఒకటి పాత్రకు కుడివైపున, మరొకటి దాని ఎడమవైపున."

⁴అప్పుడు నేను నాతో మాట్లాడిన దూతతో, "నా ప్రభువా, ఇవి ఏమిటి?" అని అడిగితిని.

⁵అందుకు నాతో మాట్లాడుచున్న దూత, "ఇవి ఏమిటో నీకు తెలియదా?" అని అడిగెను. నేను, "తెలియదు, నా ప్రభువా," అంటిని.

⁶అప్పుడు ఆయన నాతో ఇట్లనెను, "జెరుబ్బాబెలుకు మన తండ్రి చెప్పు మాట ఇదే: బలముచేతనైనను శక్తిచేతనైనను కాదు, గాని నా ఆత్మచేతనే జరుగును, అని పరలోక సైన్యముల తండ్రి సెలవిచ్చుచున్నాడు. ⁷గొప్ప పర్వతమా, నీవు ఎవడవు? జెరుబ్బాబెలు ఎదుట నీవు మైదానముగా మారెదవు. అతడు, "దానికి కృప, కృప కలుగునుగాక!" అని కేకలు వేయుచు పైరాతిని బయటికి తెచ్చును."

⁸మరల మన తండ్రి వాక్కు నాకు ప్రత్యక్షమై యిట్లనెను,

⁹జెరుబ్బాబెలు చేతులు ఈ మందిరమునకు పునాదిని వేసినవి; అతని చేతులే దానిని ముగించును. అప్పుడు పరలోక సైన్యముల తండ్రి నన్ను మీయొద్దకు పంపెనని నీవు తెలిసికొందువు. ¹⁰అల్ప కార్యముల దినమును ఎవడు తృణీకరించెను? జెరుబ్బాబెలు చేతిలోనున్న గుండునూలును చూచి వారు సంతోషించెదరు. ఈ యేడు భూమియంతటిమీద సంచరించు మన తండ్రి కన్నులే."

¹¹అప్పుడు నేను ఆయనతో, "దీపస్తంభమునకు కుడివైపున ఎడమవైపున ఉన్న ఈ రెండు ఒలీవ చెట్లు ఏమిటి?" అని అడిగితిని. ¹²మరల నేను, "బంగారు నూనెను క్రుమ్మరించు ఆ రెండు బంగారు గొట్టముల ప్రక్కనున్న ఈ రెండు ఒలీవ కొమ్మలు ఏమిటి?" అని అడిగితిని.

¹³అందుకు ఆయన నాతో, "ఇవి ఏమిటో నీకు తెలియదా?" అని అడిగెను. నేను, "తెలియదు, నా ప్రభువా," అంటిని.

¹⁴అప్పుడు ఆయన, "వీరు భూమియంతటికి అధిపతియైనవాని యెదుట నిలుచు అభిషిక్తులైన యిద్దరు." అనెను.