Ba a Iya Dakatar da Hasken Uba

Fitilar zinariya da itatuwan zaitun biyu ke ciyarwa ta amsa karayar zuciyar Zarubabel game da ƙaramin haikali da ba a gama ba. Maganar Ubanmu gare shi: ba ta wurin iko ba, ba kuma ta wurin ƙarfi ba, amma ta wurin Ruhuna. Hannuwan da suka kafa harsashin za su gama shi; kada kowa ya raina ƙananan abubuwa.

Babi na 4.

Sai mala'ikan da yake magana da ni ya dawo, ya tashe ni, kamar yadda akan tashe mutum daga barci. Ya tambaye ni, “Me kake gani?” Na ce, “Ina ga alkukin fitila na zinariya, da kwano a bisansa, da fitilu bakwai, da bututu bakwai ga kowace fitila a bisa.

Itatuwan zaitun biyu suna tsaye kusa da shi, ɗaya a dama ta kwanon, ɗayan kuma a hagunsa.”

Sai na ce wa mala'ikan da yake magana da ni, “Mene ne waɗannan, ranka ya daɗe?”

Sai mala'ikan da yake magana da ni ya ce, “Ba ka san abin da waɗannan suke ba?” Na ce, “A'a, ranka ya daɗe.”

Ya ce mini, “Ga maganar da Ubanmu ya yi wa Zerubabel, Ba da ƙarfi ba, ba kuma da iko ba, sai dai ta wurin Ruhuna, in ji Uban rundunonin Sama. Wane ne kai, babban dutse? A gaban Zerubabel za ka zama fili. Zai fitar da dutsen kan gini yana ihu, ‘Alheri, alheri gare shi!’

Sai maganar Ubanmu ta zo mini, cewa,

Hannuwan Zerubabel ne suka kafa harsashin gidan nan; hannuwansa kuma za su gama shi. Sa'an nan za ku sani Uban rundunonin Sama ne ya aiko ni gare ku. Wa ya rena ranar ƙananan abubuwa? Za su yi murna, sa'ad da suka ga igiyar awo a hannun Zerubabel. Waɗannan bakwai idanun Ubanmu ne, waɗanda suke kewaya duniya duka.”

Sai na tambaye shi, “Mene ne itatuwan zaitun biyun nan da suke dama da hagu na alkukin fitila?” Na sāke tambaya, “Mene ne rassan zaitun biyun nan da suke kusa da bututun zinariya biyun da suke zuba man zinariya?”

Ya ce mini, “Ba ka san abin da waɗannan suke ba?” Na ce, “A'a, ranka ya daɗe.”

Ya ce, “Waɗannan su ne shafaffu biyu da suke tsaye kusa da Ubangijin dukan duniya.”