ဇာခရိ 4 FHB Father's Heart Bible™

4 ¹ထိုအခါ ငါနှင့်စကားပြောသောကောင်းကင်တမန်သည် ပြန်လာ၍ အိပ်ပျော်ရာမှ နှိုးရသောသူကဲ့သို့ ငါ့ကို နှိုးလေ၏။ ²ကောင်းကင်တမန်က “သင်သည် အဘယ်အရာကိုမြင်သနည်း” ဟုမေး၏။ ငါကလည်း “ရွှေမီးခုံတစ်ခုကို မြင်ပါ၏၊ ထိုမီးခုံထိပ်၌ ဆီအိုးတစ်လုံးရှိ၍ မီးခွက်ခုနစ်လုံးနှင့် ထိပ်ရှိမီးခွက်တစ်ခုစီအတွက် ဆီလောင်းစရာခုနစ်ခုစီ ရှိပါ၏။

³ထိုမီးခုံအနားတွင် သံလွင်ပင်နှစ်ပင်ရှိ၍ တစ်ပင်သည် ဆီအိုး၏လက်ျာဘက်၌၊ အခြားတစ်ပင်သည် လက်ဝဲဘက်၌ ရှိပါ၏” ဟုဆိုလေ၏။

⁴ထိုအခါ ငါနှင့်စကားပြောသောကောင်းကင်တမန်အား “အရှင်၊ ဤအရာတို့ကား အဘယ်နည်း” ဟု ငါမေး၏။

⁵ငါနှင့်စကားပြောသောကောင်းကင်တမန်က “ဤအရာတို့ကား အဘယ်အရာဖြစ်သည်ကို သင်မသိသလော” ဟုဆို၏။ ငါကလည်း “အရှင်၊ အကျွန်ုပ်မသိပါ” ဟုဆို၏။

⁶ကောင်းကင်တမန်က ငါ့အား “ဇေရုဗဗေလအား ပေးတော်မူသော ငါတို့၏ခမည်းတော်၏ အမိန့်တော်ကား ဤသို့တည်း— အားအစွမ်းဖြင့်မဟုတ်၊ တန်ခိုးဖြင့်လည်းမဟုတ်၊ ငါ၏ဝိညာဉ်တော်ဖြင့်သာတည်းဟု ကောင်းကင်ဗိုလ်ခြေတို့၏ခမည်းတော် မိန့်တော်မူ၏” ဟုဆို၏။ ⁷“အိုတောင်ကြီး၊ သင်သည် အဘယ်သူနည်း။ ဇေရုဗဗေလရှေ့တွင် သင်သည် မြေပြန့်ဖြစ်ရလိမ့်မည်။ သူသည် ‘ဤအိမ်တော်၌ ကျေးဇူးတော်ရှိစေသတည်း၊ ကျေးဇူးတော်ရှိစေသတည်း’ ဟု ကြွေးကြော်လျက် အထွတ်ကျောက်ကို ထုတ်ဆောင်လိမ့်မည်။

⁸ထို့နောက် ငါတို့၏ခမည်းတော်၏ နှုတ်ကပတ်တော်သည် ငါ့ထံသို့ ရောက်လာ၍ မိန့်တော်မူသည်ကား—

⁹ဇေရုဗဗေလ၏လက်တို့သည် ဤအိမ်တော်၏ တိုက်မြစ်ကိုချပြီ၊ သူ၏လက်တို့သည်လည်း ထိုအိမ်တော်ကို ပြီးစီးစေလိမ့်မည်။ ထိုအခါ ကောင်းကင်ဗိုလ်ခြေတို့၏ခမည်းတော်သည် ငါ့ကို သင်တို့ထံသို့ စေလွှတ်တော်မူကြောင်းကို သင်တို့ သိကြလိမ့်မည်။ ¹⁰အသေးအဖွဲ့သောအမှုတို့၏ နေ့ရက်ကို အဘယ်သူသည် မထီမဲ့မြင်ပြုသနည်း။ ဇေရုဗဗေလ၏လက်၌ ချိန်ကြိုးကို မြင်သောအခါ သူတို့သည် ဝမ်းမြောက်ကြလိမ့်မည်။ ဤခုနစ်ခုကား မြေတစ်ပြင်လုံးကို လှည့်လည်ကြည့်ရှုတော်မူသော ငါတို့၏ခမည်းတော်၏ မျက်စိတော်များဖြစ်၏” ဟု မိန့်တော်မူ၏။

¹¹ထိုအခါ ငါက “မီးခုံ၏လက်ျာဘက်နှင့် လက်ဝဲဘက်၌ရှိသော ဤသံလွင်ပင်နှစ်ပင်ကား အဘယ်နည်း” ဟု ကောင်းကင်တမန်အား မေး၏။ ¹²တစ်ဖန် ငါက “ရွှေဆီကို သွန်းလောင်းသော ရွှေပြွန်နှစ်ခု၏အနားတွင်ရှိသော ဤသံလွင်ခက်နှစ်ခက်ကား အဘယ်နည်း” ဟု မေး၏။

¹³ကောင်းကင်တမန်က “ဤအရာတို့ကား အဘယ်အရာဖြစ်သည်ကို သင်မသိသလော” ဟုဆို၏။ ငါကလည်း “အရှင်၊ အကျွန်ုပ်မသိပါ” ဟုဆို၏။

¹⁴ကောင်းကင်တမန်က “ဤသူနှစ်ဦးကား မြေတစ်ပြင်လုံး၏အရှင်သခင်ထံတော်၌ ရပ်နေသော ဘိသိက်ခံသူနှစ်ဦး ဖြစ်ကြ၏” ဟုဆို၏။