زکریاہ 4

4 ¹پھر وہ فرشتہ جو مجھ سے باتیں کرتا تھا لوٹ آیا اور اُس نے مجھے جگایا، جیسے کسی کو نیند سے جگایا جاتا ہے۔ ²اُس نے پوچھا، ”تُو کیا دیکھتا ہے؟“ مَیں نے کہا، ”مَیں نے ایک سونے کا شمع دان دیکھا، اُس کے سرے پر ایک پیالہ، سات چراغ، اور سرے پر ہر چراغ کے لیے سات نلکیاں۔

³اُس کے پاس زیتون کے دو درخت کھڑے ہیں، ایک پیالے کی دائیں طرف اور دوسرا اُس کی بائیں طرف۔“

⁴اور مَیں نے اُس فرشتے سے جو مجھ سے باتیں کرتا تھا کہا، ”اے میرے آقا، یہ کیا ہیں؟“

⁵تب اُس فرشتے نے جو مجھ سے باتیں کرتا تھا کہا، ”کیا تُو نہیں جانتا کہ یہ کیا ہیں؟“ مَیں نے کہا، ”نہیں، اے میرے آقا۔“

⁶اُس نے مجھ سے کہا، ”یہ زربابل کے لیے ہمارے باپ کا کلام ہے: نہ زور سے، نہ طاقت سے، بلکہ میری روح سے، آسمانی افواج کا باپ فرماتا ہے۔ ⁷اے بڑے پہاڑ، تُو کون ہے؟ زربابل کے سامنے تُو ہموار میدان بن جائے گا۔ وہ کونے کا پتھر یہ پکارتے ہوئے نکال لائے گا، ”فضل ہو، اِس پر فضل ہو!“

⁸پھر ہمارے باپ کا کلام مجھ پر نازل ہوا، اور یہ کہا:

⁹زربابل کے ہاتھوں نے اِس گھر کی بنیاد ڈالی؛ اُسی کے ہاتھ اِسے مکمل کریں گے۔ تب تُو جان لے گا کہ آسمانی افواج کے باپ نے مجھے تمہارے پاس بھیجا ہے۔ ¹⁰کس نے چھوٹی چیزوں کے دن کو حقیر جانا ہے؟ وہ خوشی منائیں گے جب زربابل کے ہاتھ میں ساہول کی ڈوری دیکھیں گے۔ یہ سات ہمارے باپ کی آنکھیں ہیں، جو ساری زمین پر پھرتی ہیں۔“

¹¹پھر مَیں نے اُس سے پوچھا، ”شمع دان کی دائیں اور بائیں طرف کے یہ زیتون کے دو درخت کیا ہیں؟“ ¹²مَیں نے پھر پوچھا، ”یہ زیتون کی دو شاخیں کیا ہیں جو سونے کی اُن دو نلکیوں کے پاس ہیں جن سے سونے جیسا تیل اُنڈیلا جاتا ہے؟“

¹³اُس نے مجھ سے کہا، ”کیا تُو نہیں جانتا کہ یہ کیا ہیں؟“ مَیں نے کہا، ”نہیں، اے میرے آقا۔“

¹⁴اُس نے کہا، ”یہ وہ دو مسح کیے ہوئے ہیں جو ساری زمین کے مالک کے پاس کھڑے رہتے ہیں۔“