സെഖര്യാ 4 FHB Father's Heart Bible™

4 ¹പിന്നീട് എന്നോടു സംസാരിച്ച ദൂതൻ മടങ്ങിവന്ന്, ഉറക്കത്തിൽനിന്ന് ഉണർത്തപ്പെടുന്നവനെപ്പോലെ എന്നെ ഉണർത്തി. ²അവൻ എന്നോടു ചോദിച്ചു: “നീ എന്തു കാണുന്നു?” ഞാൻ പറഞ്ഞു: “ഒരു സ്വർണനിലവിളക്ക്, അതിന്റെ മുകളിൽ ഒരു കിണ്ണം, ഏഴു ദീപങ്ങൾ, മുകളിലുള്ള ഓരോ ദീപത്തിനും ഏഴു തിരിക്കുഴലുകൾ.

³അതിനരികെ രണ്ടു ഒലിവുവൃക്ഷങ്ങൾ നിൽക്കുന്നു, ഒന്ന് കിണ്ണത്തിന്റെ വലത്തും, മറ്റേത് അതിന്റെ ഇടത്തും.”

⁴എന്നോടു സംസാരിച്ച ദൂതനോടു ഞാൻ പറഞ്ഞു: “എന്റെ യജമാനനേ, ഇവ എന്താകുന്നു?”

⁵അപ്പോൾ എന്നോടു സംസാരിച്ച ദൂതൻ പറഞ്ഞു: “ഇവ എന്താണെന്നു നിനക്ക് അറിഞ്ഞുകൂടേ?” ഞാൻ പറഞ്ഞു: “ഇല്ല, എന്റെ യജമാനനേ.”

⁶അവൻ എന്നോടു പറഞ്ഞു: “സെരുബ്ബാബേലിനോടുള്ള നമ്മുടെ പിതാവിന്റെ വചനം ഇതാകുന്നു: ശക്തിയാലല്ല, ബലത്താലുമല്ല, എന്റെ ആത്മാവിനാലത്രേ എന്നു സ്വർഗീയസൈന്യങ്ങളുടെ പിതാവ് അരുളിച്ചെയ്യുന്നു. ⁷വലിയ പർവതമേ, നീ ആർ? സെരുബ്ബാബേലിന്റെ മുമ്പിൽ നീ സമനിലമായിത്തീരും. “ഇതിന് കൃപ, കൃപ!” എന്ന് ആർത്തുവിളിച്ചുകൊണ്ട് അവൻ മൂലക്കല്ല് പുറത്തുകൊണ്ടുവരും.

⁸പിന്നീട് നമ്മുടെ പിതാവിന്റെ വചനം എനിക്കുണ്ടായി:

⁹സെരുബ്ബാബേലിന്റെ കൈകൾ ഈ ആലയത്തിന് അടിസ്ഥാനമിട്ടു; അവന്റെ കൈകൾതന്നെ അതു പൂർത്തിയാക്കും. അപ്പോൾ സ്വർഗീയസൈന്യങ്ങളുടെ പിതാവ് എന്നെ നിങ്ങളുടെ അടുക്കൽ അയച്ചിരിക്കുന്നു എന്നു നിങ്ങൾ അറിയും. ¹⁰ചെറിയ കാര്യങ്ങളുടെ ദിവസത്തെ ആർ നിന്ദിച്ചു? സെരുബ്ബാബേലിന്റെ കൈയിൽ തൂക്കുകട്ട കണ്ട് അവർ സന്തോഷിക്കും. ഈ ഏഴും സർവഭൂമിയിലും സഞ്ചരിക്കുന്ന നമ്മുടെ പിതാവിന്റെ കണ്ണുകളാകുന്നു.”

¹¹അപ്പോൾ ഞാൻ അവനോടു ചോദിച്ചു: “നിലവിളക്കിന്റെ വലത്തും ഇടത്തുമുള്ള ഈ രണ്ടു ഒലിവുവൃക്ഷങ്ങൾ എന്താകുന്നു?” ¹²ഞാൻ വീണ്ടും ചോദിച്ചു: “സ്വർണനിറമുള്ള എണ്ണ ഒഴുക്കുന്ന രണ്ടു സ്വർണക്കുഴലുകൾക്കരികെയുള്ള ഈ രണ്ടു ഒലിവുചില്ലകൾ എന്താകുന്നു?”

¹³അവൻ എന്നോടു പറഞ്ഞു: “ഇവ എന്താണെന്നു നിനക്ക് അറിഞ്ഞുകൂടേ?” ഞാൻ പറഞ്ഞു: “ഇല്ല, എന്റെ യജമാനനേ.”

¹⁴അവൻ പറഞ്ഞു: “ഇവർ സർവഭൂമിയുടെ നാഥന്റെ അടുക്കൽ നിൽക്കുന്ന രണ്ട് അഭിഷിക്തന്മാരാകുന്നു.”