ଯିଖରୀୟ 4 FHB Father's Heart Bible™

4 ¹ପୁଣି ମୋʼ ସହିତ କଥାବାର୍ତ୍ତା କରୁଥିବା ଦୂତ ଫେରିଆସି, ନିଦ୍ରାରୁ ଜଗାଯାଉଥିବା ଲୋକ ପରି ମୋତେ ଜଗାଇଲେ। ²ସେ ମୋତେ ପଚାରିଲେ, “ତୁମ୍ଭେ କʼଣ ଦେଖୁଅଛ?” ମୁଁ କହିଲି, “ମୁଁ ଦେଖିଲି, ଏକ ସୁବର୍ଣ୍ଣ ଦୀପବୃକ୍ଷ, ତହିଁ ଉପରେ ଗୋଟିଏ ପାତ୍ର, ତହିଁ ଉପରେ ସାତୋଟି ପ୍ରଦୀପ, ପୁଣି ଉପରିସ୍ଥିତ ପ୍ରତ୍ୟେକ ପ୍ରଦୀପ ପାଇଁ ସାତୋଟି ନଳ ଅଛି।

³ତାହା ନିକଟରେ ଦୁଇଗୋଟି ଜୀତବୃକ୍ଷ ଠିଆ ହୋଇଅଛି, ଗୋଟିଏ ପାତ୍ରର ଡାହାଣ ପାଖରେ ଓ ଅନ୍ୟଟି ତାହାର ବାମ ପାଖରେ।”

⁴ତହିଁରେ ମୋʼ ସହିତ କଥାବାର୍ତ୍ତା କରୁଥିବା ଦୂତଙ୍କୁ ମୁଁ କହିଲି, “ହେ ମୋʼ ପ୍ରଭୁ, ଏସବୁ କʼଣ?”

⁵ତହିଁରେ ମୋʼ ସହିତ କଥାବାର୍ତ୍ତା କରୁଥିବା ଦୂତ ଉତ୍ତର ଦେଲେ, “ଏସବୁ କʼଣ, ତାହା କି ତୁମ୍ଭେ ଜାଣ ନାହିଁ?” ମୁଁ କହିଲି, “ହେ ମୋʼ ପ୍ରଭୁ, ମୁଁ ଜାଣେ ନାହିଁ।”

⁶ତେଣୁ ସେ ମୋତେ କହିଲେ, “ସରୁବ୍ବାବିଲଙ୍କ ପ୍ରତି ଆମ୍ଭମାନଙ୍କ ପିତାଙ୍କ ବାକ୍ୟ ଏହି: ପରାକ୍ରମ ଦ୍ଵାରା ନୁହେଁ, କିମ୍ବା ବଳ ଦ୍ଵାରା ନୁହେଁ, ମାତ୍ର ଆମ୍ଭର ଆତ୍ମାଙ୍କ ଦ୍ଵାରା, ଏହା ସ୍ଵର୍ଗୀୟ ବାହିନୀଗଣର ପିତା କହୁଅଛନ୍ତି। ⁷ହେ ବୃହତ୍ ପର୍ବତ, ତୁମ୍ଭେ କିଏ? ସରୁବ୍ବାବିଲଙ୍କ ସମ୍ମୁଖରେ ତୁମ୍ଭେ ସମଭୂମି ହୋଇଯିବ। ‘ଅନୁଗ୍ରହ, ତାହା ପ୍ରତି ଅନୁଗ୍ରହ ହେଉ!’ ବୋଲି ଜୟଧ୍ଵନି କରି ସେ ଶୀର୍ଷ ପ୍ରସ୍ତର ବାହାର କରି ଆଣିବେ।”

⁸ପୁଣି ଆମ୍ଭମାନଙ୍କ ପିତାଙ୍କ ବାକ୍ୟ ମୋʼ ନିକଟରେ ଉପସ୍ଥିତ ହୋଇ କହିଲା,

⁹“ସରୁବ୍ବାବିଲଙ୍କ ହସ୍ତ ଏହି ଗୃହର ଭିତ୍ତିମୂଳ ସ୍ଥାପନ କରିଅଛି; ତାହାଙ୍କ ହସ୍ତ ତାହା ସମାପ୍ତ କରିବ। ତେବେ ସ୍ଵର୍ଗୀୟ ବାହିନୀଗଣର ପିତା ମୋତେ ତୁମ୍ଭମାନଙ୍କ ନିକଟକୁ ପ୍ରେରଣ କରିଅଛନ୍ତି ବୋଲି ତୁମ୍ଭେମାନେ ଜାଣିବ। ¹⁰ଯେ କ୍ଷୁଦ୍ର ବିଷୟର ଦିନକୁ ତୁଚ୍ଛ କରିଅଛି, ସେ କିଏ? ସରୁବ୍ବାବିଲଙ୍କ ହସ୍ତରେ ଓଜନଲୟ ଦେଖି ସେମାନେ ଆନନ୍ଦ କରିବେ। ଏହି ସାତୋଟି ଆମ୍ଭମାନଙ୍କ ପିତାଙ୍କ ଚକ୍ଷୁ, ଯାହା ସମୁଦାୟ ପୃଥିବୀ ମଧ୍ୟରେ ଭ୍ରମଣ କରେ।”

¹¹ତହିଁରେ ମୁଁ ତାହାଙ୍କୁ ପଚାରିଲି, “ଦୀପବୃକ୍ଷର ଡାହାଣ ଓ ବାମ ପାଖରେ ଥିବା ଏହି ଦୁଇଗୋଟି ଜୀତବୃକ୍ଷ କʼଣ?” ¹²ମୁଁ ପୁନର୍ବାର ପଚାରିଲି, “ସୁବର୍ଣ୍ଣ ତୈଳ ଢାଳୁଥିବା ଦୁଇଗୋଟି ସୁବର୍ଣ୍ଣ ନଳ ପାଖରେ ଥିବା ଏହି ଦୁଇଗୋଟି ଜୀତ ଶାଖା କʼଣ?”

¹³ସେ ମୋତେ କହିଲେ, “ଏସବୁ କʼଣ, ତାହା କି ତୁମ୍ଭେ ଜାଣ ନାହିଁ?” ମୁଁ କହିଲି, “ହେ ମୋʼ ପ୍ରଭୁ, ମୁଁ ଜାଣେ ନାହିଁ।”

¹⁴ତେବେ ସେ କହିଲେ, “ଏମାନେ ସମୁଦାୟ ପୃଥିବୀର ପ୍ରଭୁଙ୍କ ନିକଟରେ ଠିଆ ହୋଇଥିବା ଦୁଇ ଅଭିଷିକ୍ତ ବ୍ୟକ୍ତି।”