Zekaria 4

4 ¹Kisha yule malaika aliyesema nami akarudi, akaniamsha, kama mtu aamshwavyo usingizini. ²Akaniuliza, "Waona nini?" Nikasema, "Nimeona kinara cha taa cha dhahabu, na bakuli juu yake, na taa zake saba, na mifereji saba kwa kila taa iliyo juu yake.

³Na mizeituni miwili karibu nacho, mmoja upande wa kuume wa bakuli, na mwingine upande wake wa kushoto."

⁴Nikamjibu yule malaika aliyesema nami, nikasema, "Ni nini hivi, bwana wangu?"

⁵Ndipo yule malaika aliyesema nami akajibu, akaniambia, "Hujui hivi ni nini?" Nikasema, "La, bwana wangu."

⁶Akajibu, akaniambia, "Hili ndilo neno la Baba yetu kwa Zerubabeli, kusema: Si kwa uwezo, wala si kwa nguvu, bali ni kwa Roho yangu, asema Baba wa majeshi ya mbinguni. ⁷Wewe ni nani, ee mlima mkubwa? Mbele ya Zerubabeli utakuwa nchi tambarare. Naye ataleta jiwe la kilele, huku wakipiga kelele, wakisema, 'Neema, neema iwe juu yake!'"

⁸Tena neno la Baba yetu likanijia, kusema,

⁹"Mikono ya Zerubabeli imeuweka msingi wa nyumba hii; na mikono yake ndiyo itakayoumaliza. Nawe utajua ya kuwa Baba wa majeshi ya mbinguni amenituma kwenu. ¹⁰Maana ni nani aliyeidharau siku ya mambo madogo? Watafurahi wakati watakapoliona timazi mkononi mwa Zerubabeli. Hizi saba ni macho ya Baba yetu, yatembeayo huku na huku duniani mwote."

¹¹Ndipo nikamjibu, nikamwambia, "Ni nini hii mizeituni miwili, iliyo upande wa kuume na upande wa kushoto wa kinara?" ¹²Nikauliza mara ya pili, nikamwambia, "Ni nini matawi haya mawili ya mzeituni, yaliyo karibu na mirija miwili ya dhahabu, imwagayo mafuta ya dhahabu?"

¹³Akanijibu, akaniambia, "Hujui hivi ni nini?" Nikasema, "La, bwana wangu."

¹⁴Ndipo akasema, "Hawa ndio wale wawili waliotiwa mafuta, wasimamao mbele ya Bwana wa dunia yote."