Zechariah 4

4 ¹Chieina ili khangazeka kazingrao chi latunglaga, mi akha pi eina ngakarthui thāda ili mathotkhui. ²Ana ili hānga, "Nana khi theikhala?" Ina hānga, "Sinā eina kasā thaomeishong akha ina thei; aton chili koklui akha, thaomei shini, kala aton chili thaomei kachiva̱li heikhavai shini shini lei.

³Chiwui ngalemli olivething khani nganinga, akha koklui yāshongli lei, kala khangatei chi awui uishongli lei."

⁴Kala ina ili khangazeka kazingrao chili hānga, "Hibing chi khikhala, Amei?"

⁵Chieina ili khangazeka kazingrao china hānga, "Hibing chi khikhala da nana matheimala?" Ina hānga, "Matheimana, Amei."

⁶Ili ana hānga, "Zerubbabelli ithumwui Avāwui tui chi hi china: Yāngna maningla, pangshapna maningla, kha iwui Manglā einana, da saikorawui Avāna hānga. ⁷O kahaka kaphung, na khipākhala? Zerubbabelwui mangāli na ashāt ngasāra. Ana atonwui lunggui chi khuishokta, "Lukhamashan, lukhamashan chiwuili!" da panglāk eina vaora.

⁸Chieina ithumwui Avāwui tui chi ili rāhānga,

⁹Shim hiwui shimphunga Zerubbabelwui pāngna sākāhaira; awui pāngnala chi sākupra. Chieina saikorawui Avāna ili nawuili chihovā kahaina da nana theira. ¹⁰Khipāna ot kateowa zimiksho chi yangkharinghaikhala? Zerubbabelwui pāngli urum chi theida athumna mathānra. Hi shini hi okathui katonga yangkhavai ithumwui Avāwui mikna."

¹¹Chieina ina ali ngahāna, "Thaomeishongwui yāshong uishongli khalei olivething khani chi khikhala?" ¹²Ina latluida ngahāna, "Sinā thao heiror sinā khong khani, chiwui ngalemli khalei hi olive aphāng khani chi khikhala?"

¹³Ana ili hānga, "Hibing chi khikhala da nana matheimala?" Ina hānga, "Matheimana, Amei."

¹⁴Ana hānga, "Hibing hi okathui saikorawui Prohowui mangāli khanganing thao neomi kahai khani china."