Zechariah 3

3 ¹Chiwui thili ana ili, ithumwui Avāwui kazingraowui mangāli nganingda khalei pāngmon kharei Joshua chi chithei; kala Satan china ali kaphen sākhavai awui yāshongli nganinga.

²Kala ithumwui Avāna Satanli hānga, "Ana nali kaharra, O Satan! Jerusalem kapang kahaina nali kaharra! Hi mi hi meira̱ sutmi kahai maningmala?"

³Chitharan Joshuava kazingraowui mangāli nganinglakha khamakhao kachon ngavaisai. ⁴Ana awui mangāli nganing khalei mibing chili hānga, "Awui khamakhao kachon chi khuithuiulu." Chieina Joshuali hānga, "Yanglu, ina nawui khayonkhamāng chi khuithuimihaira, kala ina nali mathā sāribing ngavaimira."

⁵Chieina ina hānga, "Akuili tharzā kahai kuitei akha teimilu." Chieina ithumwui Avāwui kazingrao china ngalemli nganinglakha, athumna chi akuili teimida ali sāri ngavaimi.

⁶Chieina ithumwui Avāwui kazingraona Joshuali saklak eina kasoi,

⁷"Saikorawui Avāna hithāda hānga: Nana iwui shongfali zatakha kala iwui kagaso mayonakha, nana iwui shim khayaira kala iwui kayāngbing yangmira, kala ina nali hili nganing khalei mibingwui alungli apam akha mira. ⁸Ara nganālu, O pāngmon kharei Joshua, nana kala nawui mangāli kapam ngasotnaobing, kaja athum machut kahai mibingna: Yanglu, ina iwui rao, Aphāng Jishu chi khuirāra. ^a a v8 Aphāng chi rākhavai Khrista chiwui vang Kadhara Kharewui Lairikli khalei ming mashunga khamathā akhana, Jishuli ungshunghai, ithumwui Avāna chihovā rao chi (Jeremiah 23:5; Isaiah 11:1). ⁹Ina Joshuawui mangāli shunkahai ngalung chili yanglu: arui ngalung akhali mik shini leira. Ina chiwui kapi ruksangra, da saikorawui Avāna hānga, kala ina ngalei hiwui khayonkhamāng chi zimiksho akhali khuithuimira. ^b b v9 Ngalung chiwui mik shini china, Varena okathui katonghui saikorali kāshungchao eina yangchingwui chi machut sāna. ¹⁰Chithang, da saikorawui Avāna hānga, mi kachiva̱na kachichāwui drakhārong kala khaorārongwui azingli awui khongnainaoli hora."