Khonkashi Chi Ngalei Katongali Shoka
Khayon chi kashokthui kaji mangtha khani: khamarubing kala minamda shākhi kasābingwuitungli khonkashi sāda khavā yongkazata lairik akhalui akha, kala Makaphā kaho sha̱nao akhali khuiluili tuksanglaga mishiwui asham eina shingkhamda Shinarli khuivāa. Ithumwui Avāna makaphā ot mayaomana — ana chi khuithuihaoa.
5 1Kala ina latluida mik yangkakā eina, yanglu, lairik akhalui yongkazata akha thei. 2Ana ili ngahāna, "Na khi theikhala?" Ina ngahānkai, "Ina lairik akhalui yongkazata akha theihaira; asān chi khuining maga̱na, aret chi khuining tharāna."
3Chieina ana ili hānga, "Hi ngalei katongali shoka khonkashi china. Khale kachiva̱na hi lākhavāk akha eina sāmathākhuira; nguida khangashit kasā kachiva̱na khangatei lākhavāk eina sāmathākhuira."
4"Ina chi chihovāhaira, da saikorawui Avāna hānga; chi khalewui shim kala iwui ming eina nguida khangashit kasā kachiva̱wui shimli vāzangda, chili pamra, kala shim chi athingla alunglila ngarumda chuitāra."
Makhayā Awui Pamshong Khuivā
5Chieina ili khangazeka kazingrao china rāda ili hānga, "Arui mik yangkakā eina, shoka khalei hi khikhala theilu."
6Chieina ina hānga, "Hi khikhala?" Ana hānga, "Hi shoka khalei māchum china." Chieina, "Hi ngalei katongali athumwui khayonkhamāng china."
7Kala yanglu, mishiwui asham chi khāngkai, kala māchum alungli sha̱nao akha pamsai. 8Ana hānga, "Hi Makhayā china." Kala ana ali latluida māchum alungshong horsangda, mishiwui asham chi akhamorli tandi haimi.
9Ina yangkakā tharan, yanglu, sha̱nao khani rāda thei; aniwui angachāngli masi kai, kala angachāng chi varokwui angachāng thai; anina māchum chi okathui eina kazingram ngachaili khāngkai. 10Chieina ili khangazeka kazingrao chili ina hānga, "Anina māchum chi kali khuivāra?"
11Ana ili hānga, "Chiwui vang Shinar ngaleili shim akha sākhavaina; kala chi ngarān kahai tharan, māchum chi chili apheizingli nganing ngasakra." a a v11 Shinar chi Babylonwui achālakha ming china—Israelwui tukthui kahaka ngalei chi.
