சகரியா 5

5 ¹மறுபடியும் நான் என் கண்களை ஏறெடுத்துப் பார்த்தேன்; இதோ, பறந்துகொண்டிருந்த ஒரு புத்தகச்சுருள் எனக்கு முன்பாக இருந்தது. ²அவர் என்னை நோக்கி, “நீ என்ன காண்கிறாய்?” என்று கேட்டார். அதற்கு நான், “பறந்துகொண்டிருக்கிற ஒரு புத்தகச்சுருளைக் காண்கிறேன்; அது முப்பது அடி நீளமும் பதினைந்து அடி அகலமுமாய் இருக்கிறது” என்றேன்.

³அப்பொழுது அவர் என்னை நோக்கி, “இது தேசம் முழுவதற்கும் விரோதமாய்ப் புறப்படுகிற சாபம்; திருடுகிற ஒவ்வொருவனும் அதின் ஒரு பக்கத்தின்படியே அகற்றப்படுவான்; பொய்யாய் ஆணையிடுகிற ஒவ்வொருவனும் அதின் மறுபக்கத்தின்படியே அகற்றப்படுவான்.

⁴நான் அதை அனுப்பியிருக்கிறேன் என்று பரலோகச் சேனைகளின் பிதா சொல்லுகிறார்; அது திருடனுடைய வீட்டிலும், என் நாமத்தைக்கொண்டு பொய்யாய் ஆணையிடுகிறவனுடைய வீட்டிலும் பிரவேசித்து, அங்கே தங்கி, மரங்களோடும் கற்களோடும் அந்த வீட்டை நாசம்பண்ணும்” என்றார்.

அக்கிரமம் தன் இடத்திற்குச் சுமந்துகொண்டு போகப்படுதல்

⁵அப்பொழுது என்னோடே பேசின தூதன் புறப்பட்டு வந்து, என்னை நோக்கி, “இப்போது உன் கண்களை ஏறெடுத்து, புறப்பட்டுப் போகிற இது என்னவென்று பார்” என்றார்.

⁶“இது என்ன?” என்று நான் கேட்டேன். அதற்கு அவர், “இது புறப்பட்டுப்போகிற மரக்கால்” என்று சொல்லி, பின்பு, “இது தேசம் முழுவதிலுமுள்ள அவர்களுடைய அக்கிரமம்” என்றார்.

⁷உடனே, ஈயத்தாலான மூடி தூக்கப்பட்டது; இதோ, அந்த மரக்காலுக்குள்ளே ஒரு ஸ்திரீ உட்கார்ந்திருந்தாள். ⁸அப்பொழுது அவர், “இது அக்கிரமம்” என்று சொல்லி, அவளை மரக்காலுக்குள்ளே திரும்பத் தள்ளி, அதின் வாயின்மேல் ஈயப்பாரத்தை அமுக்கிப்போட்டார்.

⁹நான் என் கண்களை ஏறெடுத்துப் பார்த்தேன்; இதோ, இரண்டு ஸ்திரீகள் தங்கள் செட்டைகளில் காற்றுடன் புறப்பட்டு வந்தார்கள்; அவர்களுடைய செட்டைகள் நாரையின் செட்டைகளுக்கு ஒப்பாயிருந்தன; அவர்கள் அந்த மரக்காலைப் பூமிக்கும் வானத்துக்கும் நடுவே தூக்கிக்கொண்டு போனார்கள். ¹⁰அப்பொழுது நான் என்னோடே பேசின தூதனை நோக்கி, “இவர்கள் அந்த மரக்காலை எங்கே கொண்டுபோகிறார்கள்?” என்று கேட்டேன்.

¹¹அதற்கு அவர் என்னை நோக்கி, “அதற்குச் சிநெயார் தேசத்திலே ஒரு வீட்டைக் கட்டும்படிக்கே கொண்டுபோகிறார்கள்; அது ஆயத்தமாகும்போது, அந்த மரக்கால் அங்கே தன் ஆதாரத்தின்மேல் வைக்கப்படும்” என்றார். ^a a v11 சிநெயார் என்பது பாபிலோனியாவின் பூர்வ நாமம் — இஸ்ரவேலின் மகா சிறையிருப்பின் தேசம்.