Sekariah 5

5 ¹Mo tún gbé ojú mi sókè, mo sì wò, sì kíyè sí i, ìwé akájọpọ̀ tí ń fò wà níwájú mi. ²Ó béèrè pé, “Kí ni ìwọ rí?” Mo dáhùn pé, “Mo rí ìwé akájọpọ̀ tí ń fò, ọgbọ̀n ẹsẹ̀ bàtà ní gígùn, ẹ̀ẹ́dógún ẹsẹ̀ bàtà ní ìbú.”

³Nígbà náà ni ó wí fún mi pé, “Èyí ni ègún tí ń jáde lọ káàkiri gbogbo ilẹ̀ náà. Olúkúlùkù ẹni tí ó bá jalè ni a ó mú kúrò, nípasẹ̀ ẹ̀gbẹ́ kan rẹ̀; olúkúlùkù ẹni tí ó búra èké, ni a ó mú kúrò nípasẹ̀ ẹ̀gbẹ́ kejì.”

⁴“Èmi ti rán an jáde, ni Baba àwọn ọmọ ogun ọ̀run wí; yóò wọ ilé olè, àti ilé ẹnikẹ́ni tí ó bá fi orúkọ mi búra èké, yóò dúró síbẹ̀, yóò sì run ún—àti igi àti òkúta.”

A Gbé Ìwà Búburú Lọ Sí Ibi Rẹ̀

⁵Nígbà náà ni angẹli tí ń bá mi sọ̀rọ̀ wá síwájú, ó sì wí pé, “Nísinsìnyí, gbé ojú rẹ sókè kí o sì wo ohun tí ń jáde lọ yìí.”

⁶Mo béèrè pé, “Kí ni í ṣe?” Ó sì wí pé, “Agbọ̀n tí ń jáde lọ ni.” Nígbà náà ni ó wí pé, “Èyí ni ẹ̀bi wọn káàkiri gbogbo ilẹ̀ náà.”

⁷Lójijì, a gbé ìdérí òjé náà sókè, sì kíyè sí i, obìnrin kan jókòó nínú agbọ̀n náà. ⁸Ó wí pé, “Èyí ni Ìwà Búburú.” Ó tì í padà sínú agbọ̀n náà, ó sì fi ìwọ̀n òjé náà bo ẹnu rẹ̀ pa.

⁹Mo gbé ojú mi sókè, mo sì rí obìnrin méjì tí wọ́n ń bọ̀, afẹ́fẹ́ wà nínú ìyẹ́ apá wọn—ìyẹ́ apá bí i ti àkọ̀—wọ́n sì gbé agbọ̀n náà sókè láàrin ayé àti ọ̀run. ¹⁰Nígbà náà ni mo wí fún angẹli tí ń bá mi sọ̀rọ̀ pé, “Níbo ni wọ́n ti ń gbé agbọ̀n náà lọ?”

¹¹Ó wí fún mi pé, “Láti kọ́ ilé fún un ní ilẹ̀ Ṣinari; nígbà tí ó bá sì ṣetán, a ó gbé agbọ̀n náà kalẹ̀ síbẹ̀ lórí ìpìlẹ̀ rẹ̀.” ^a a v11 Ṣinari ni orúkọ ìgbàanì fún Babiloníà—ilẹ̀ ìgbèkùn ńlá ti Israẹli.