Mwini wa Tata Wufwaniku Kukakidikiswa
Muzanga wa mwinda wa wolu wuna wisi hekwa masi kwena miti myodi mya olive wisi vutula mu kuleba kwa Zolubabedi hana thandu ya nzu ya Nzambi ya fyoti, yina yakondi kumanisa. Ndinga ya Tata wetu kwena yandi: Ka mu kikesa ku, keti mu ngolu ku, kaasi mu Kitembu kyama. Moku mana másikula mupfundila makamanisa nzu; ka mutu ku kafweti lewula kilumbu kya bima bya khunda.
Tata wetu kisi zonza mu mavese 6–7, 9–10
4 1Amana wanzyo wuna wayambilaka yi meni wávutuka amana wámutokamisa, hanga mutu wátokama mu kilu. 2Wámuhyula: «Biki wubati mona?» Yávutula: «Muzanga wa mwinda wa wolu, yi longa ha londi dyandi, yi mwinda tsambwadi, yi minomu tsambwadi kwena kosu mwinda ha londi,
3Miti myodi mya olive myenina bela-bela yandi, wumosi kuna koku dya kudya dya longa, wukwawu kuna koku dyandi dya luuku.»
4Amana yázimbula kwena wanzyo wuna wayambilaka yi meni: «Bibi byenina biki, pfumu wama?»
5Amana wanzyo wuna wayambilaka yi meni wázimbula: «Wuzayiku biki byenina bibi?» Yávutula: «Nkatu, pfumu wama.»
6Wázimbula: «Yeyi yenina Ndinga ya Tata wetu kwena Zolubabedi: Ka mu kikesa ku, keti mu ngolu ku, kaasi mu Kitembu kyama, wuzimbudi Tata mukwa ngolu zoosu. 7Ngeyi nani, mongu wa mbuta? Ku thwala ya Zolubabedi wukituki musenzi. Kanata tadi dya ha londi yi kukalunga: “Khenda, khenda kwena dyawu!”
8Amana Ndinga ya Tata wetu yísa kwena meni, mu kuzimbula:
9Moku ma Zolubabedi másikula mupfundila wa nzu yeyi; moku mandi makamanisa dyawu. Amana lwabákisa ni Tata mukwa ngolu zoosu wáhitika kwena benu. 10Nani waléwula kilumbu kya bima bya khunda? Bakásangwala, mu kumona nsinga wa kutezila mu koku dya Zolubabedi. Bina tsambwadi byenina mesu ma Tata wetu, mana masi zyeta tsi yosu.»
11Amana yámuhyula: «Miti myodi myeyi mya olive myenina biki, kuna koku dya kudya yi kuna koku dya luuku kwa muzanga wa mwinda?» 12Yáhyula hika: «Mihandi myodi myeyi mya olive myenina biki, bela-bela yi mivungu myodi mya wolu mina misi hana masi ma wolu?»
13Wázimbula: «Wuzayiku biki byenina bibi?» Yávutula: «Nkatu, pfumu wama.»
14Wázimbula: «Bibi benina batu bodi bana básitamwa mananasi, bana batelami bela-bela yi Pfumu wa tsi yosu.»
