ਜ਼ਕਰਯਾਹ 4

4 ¹ਫੇਰ ਉਹ ਦੂਤ ਜੋ ਮੇਰੇ ਨਾਲ ਗੱਲਾਂ ਕਰਦਾ ਸੀ ਮੁੜ ਆਇਆ ਅਤੇ ਮੈਨੂੰ ਜਗਾਇਆ, ਜਿਵੇਂ ਕਿਸੇ ਨੂੰ ਨੀਂਦ ਵਿੱਚੋਂ ਜਗਾਇਆ ਜਾਂਦਾ ਹੈ। ²ਉਸ ਨੇ ਪੁੱਛਿਆ, “ਤੂੰ ਕੀ ਵੇਖਦਾ ਹੈਂ?” ਮੈਂ ਆਖਿਆ, “ਸੋਨੇ ਦਾ ਇੱਕ ਸ਼ਮਾਦਾਨ, ਜਿਸ ਦੇ ਸਿਰੇ ਉੱਤੇ ਇੱਕ ਕਟੋਰਾ, ਸੱਤ ਦੀਵੇ, ਅਤੇ ਸਿਰੇ ਉੱਤਲੇ ਹਰੇਕ ਦੀਵੇ ਲਈ ਸੱਤ ਨਾਲੀਆਂ।

³ਉਸ ਦੇ ਕੋਲ ਦੋ ਜ਼ੈਤੂਨ ਦੇ ਰੁੱਖ ਖੜ੍ਹੇ ਹਨ, ਇੱਕ ਕਟੋਰੇ ਦੇ ਸੱਜੇ ਪਾਸੇ ਅਤੇ ਦੂਜਾ ਉਸ ਦੇ ਖੱਬੇ ਪਾਸੇ।”

⁴ਅਤੇ ਮੈਂ ਉਸ ਦੂਤ ਨੂੰ ਜੋ ਮੇਰੇ ਨਾਲ ਗੱਲਾਂ ਕਰਦਾ ਸੀ ਆਖਿਆ, “ਹੇ ਮੇਰੇ ਸੁਆਮੀ, ਇਹ ਕੀ ਹਨ?”

⁵ਤਦ ਉਸ ਦੂਤ ਨੇ ਜੋ ਮੇਰੇ ਨਾਲ ਗੱਲਾਂ ਕਰਦਾ ਸੀ ਆਖਿਆ, “ਕੀ ਤੂੰ ਨਹੀਂ ਜਾਣਦਾ ਕਿ ਇਹ ਕੀ ਹਨ?” ਮੈਂ ਆਖਿਆ, “ਨਹੀਂ, ਹੇ ਮੇਰੇ ਸੁਆਮੀ।”

⁶ਉਸ ਨੇ ਮੈਨੂੰ ਆਖਿਆ, “ਜ਼ਰੁੱਬਾਬਲ ਲਈ ਸਾਡੇ ਪਿਤਾ ਦਾ ਬਚਨ ਇਹ ਹੈ: ਨਾ ਸ਼ਕਤੀ ਨਾਲ, ਨਾ ਬਲ ਨਾਲ, ਸਗੋਂ ਮੇਰੇ ਆਤਮਾ ਨਾਲ, ਸੁਰਗ ਦੀਆਂ ਸੈਨਾਂ ਦਾ ਪਿਤਾ ਆਖਦਾ ਹੈ। ⁷ਹੇ ਵੱਡੇ ਪਹਾੜ, ਤੂੰ ਕੌਣ ਹੈਂ? ਜ਼ਰੁੱਬਾਬਲ ਦੇ ਅੱਗੇ ਤੂੰ ਪੱਧਰੀ ਭੋਂ ਬਣ ਜਾਵੇਂਗਾ। ਉਹ ਸਿਰੇ ਦਾ ਪੱਥਰ ਬਾਹਰ ਲਿਆਵੇਗਾ ਅਤੇ ਪੁਕਾਰੇਗਾ, ‘ਇਹ ਦੇ ਉੱਤੇ ਕਿਰਪਾ, ਕਿਰਪਾ ਹੋਵੇ!’

⁸ਫੇਰ ਸਾਡੇ ਪਿਤਾ ਦਾ ਬਚਨ ਮੇਰੇ ਕੋਲ ਆਇਆ ਅਤੇ ਆਖਿਆ,

⁹ਜ਼ਰੁੱਬਾਬਲ ਦੇ ਹੱਥਾਂ ਨੇ ਇਸ ਭਵਨ ਦੀ ਨੀਂਹ ਰੱਖੀ ਹੈ; ਉਸ ਦੇ ਹੱਥ ਹੀ ਇਹ ਨੂੰ ਪੂਰਾ ਕਰਨਗੇ। ਤਦ ਤੂੰ ਜਾਣੇਂਗਾ ਕਿ ਸੁਰਗ ਦੀਆਂ ਸੈਨਾਂ ਦੇ ਪਿਤਾ ਨੇ ਮੈਨੂੰ ਤੇਰੇ ਕੋਲ ਭੇਜਿਆ ਹੈ। ¹⁰ਕਿਸ ਨੇ ਛੋਟੀਆਂ ਗੱਲਾਂ ਦੇ ਦਿਨ ਨੂੰ ਤੁੱਛ ਜਾਣਿਆ ਹੈ? ਉਹ ਖ਼ੁਸ਼ ਹੋਣਗੇ ਜਦ ਉਹ ਜ਼ਰੁੱਬਾਬਲ ਦੇ ਹੱਥ ਵਿੱਚ ਸਾਹੁਲ ਵੇਖਣਗੇ। ਇਹ ਸੱਤ ਸਾਡੇ ਪਿਤਾ ਦੀਆਂ ਅੱਖਾਂ ਹਨ, ਜੋ ਸਾਰੀ ਧਰਤੀ ਵਿੱਚ ਭਟਕਦੀਆਂ ਫਿਰਦੀਆਂ ਹਨ।”

¹¹ਤਦ ਮੈਂ ਉਸ ਨੂੰ ਪੁੱਛਿਆ, “ਸ਼ਮਾਦਾਨ ਦੇ ਸੱਜੇ ਅਤੇ ਖੱਬੇ ਪਾਸੇ ਦੇ ਇਹ ਦੋ ਜ਼ੈਤੂਨ ਦੇ ਰੁੱਖ ਕੀ ਹਨ?” ¹²ਮੈਂ ਫੇਰ ਪੁੱਛਿਆ, “ਜ਼ੈਤੂਨ ਦੀਆਂ ਇਹ ਦੋ ਟਾਹਣੀਆਂ ਕੀ ਹਨ, ਜੋ ਸੋਨੇ ਦੀਆਂ ਉਨ੍ਹਾਂ ਦੋ ਨਾਲੀਆਂ ਦੇ ਕੋਲ ਹਨ ਜਿਨ੍ਹਾਂ ਵਿੱਚੋਂ ਸੁਨਹਿਰੀ ਤੇਲ ਵਹਿੰਦਾ ਹੈ?”

¹³ਉਸ ਨੇ ਮੈਨੂੰ ਆਖਿਆ, “ਕੀ ਤੂੰ ਨਹੀਂ ਜਾਣਦਾ ਕਿ ਇਹ ਕੀ ਹਨ?” ਮੈਂ ਆਖਿਆ, “ਨਹੀਂ, ਹੇ ਮੇਰੇ ਸੁਆਮੀ।”

¹⁴ਉਸ ਨੇ ਆਖਿਆ, “ਇਹ ਦੋ ਮਸਹ ਕੀਤੇ ਹੋਏ ਜਨ ਹਨ, ਜੋ ਸਾਰੀ ਧਰਤੀ ਦੇ ਪ੍ਰਭੂ ਦੇ ਕੋਲ ਖੜ੍ਹੇ ਹਨ।”