ዘካርያስ 4

4 ¹ከዚያም ከእኔ ጋራ ይነጋገር የነበረው መልአክ ተመልሶ፣ ከእንቅልፍ እንደሚነቃ ሰው ቀሰቀሰኝ። ²እርሱም፣ “ምን ታያለህ?” ብሎ ጠየቀኝ። እኔም እንዲህ አልሁ፤ “የወርቅ መቅረዝ ዐየሁ፤ በላዩ ላይ ጽዋ፣ ሰባት መብራቶችም፣ በላዩ ላይ ላለው ለእያንዳንዱ መብራት ሰባት ቱቦዎች አሉት።

³ሁለት የወይራ ዛፎች በአጠገቡ ይቆማሉ፤ አንዱ ከጽዋው ቀኝ፣ ሌላው ከግራው።”

⁴ከእኔም ጋራ ይነጋገር የነበረውን መልአክ፣ “ጌታዬ ሆይ፤ እነዚህ ምንድን ናቸው?” ብዬ ጠየቅሁት።

⁵ከእኔም ጋራ ይነጋገር የነበረው መልአክ፣ “እነዚህ ምን እንደ ሆኑ አታውቅምን?” አለኝ። እኔም፣ “ጌታዬ ሆይ፤ አላውቅም” አልሁ።

⁶እርሱም እንዲህ አለኝ፤ “ይህ የአባታችን ቃል ለዘሩባቤል ነው፤ ‘በጦር ኀይል አይደለም፣ በብርታትም አይደለም፣ ነገር ግን በመንፈሴ ነው’ ይላል የሰማይ ሰራዊት አባት። ⁷ታላቅ ተራራ ሆይ፤ አንተ ማን ነህ? በዘሩባቤል ፊት ደልዳላ መሬት ትሆናለህ። እርሱም፣ ‘ጸጋ፣ ጸጋ ይሁንለት!’ እያለ እየጮኸ የማዕዘን ድንጋዩን ያወጣል።”

⁸ከዚያም የአባታችን ቃል እንዲህ ሲል ወደ እኔ መጣ፤

⁹“የዘሩባቤል እጆች የዚህን ቤት መሠረት ጣሉ፤ እጆቹም ይፈጽሙታል። ያን ጊዜ የሰማይ ሰራዊት አባት ወደ አንተ እንደ ላከኝ ታውቃለህ። ¹⁰ቀኑን የናቀ ማን ነው? ታናናሽ ነገሮችን የናቀ ማን ነው? በዘሩባቤል እጅ ያለውን የቱንቢ ገመድ አይተው ደስ ይላቸዋል። እነዚህ ሰባቱ በመላው ምድር የሚመለከቱ የአባታችን ዐይኖች ናቸው።”

¹¹ከዚያም፣ “ከመቅረዙ ቀኝና ግራ ያሉት እነዚህ ሁለቱ የወይራ ዛፎች ምንድን ናቸው?” ብዬ ጠየቅሁት። ¹²ዳግመኛም፣ “የወርቅ ዘይት በሚያፈሱ በሁለቱ የወርቅ ቱቦዎች አጠገብ ያሉት እነዚህ ሁለቱ የወይራ ቅርንጫፎች ምንድን ናቸው?” ብዬ ጠየቅሁት።

¹³እርሱም፣ “እነዚህ ምን እንደ ሆኑ አታውቅምን?” አለኝ። እኔም፣ “ጌታዬ ሆይ፤ አላውቅም” አልሁ።

¹⁴እርሱም፣ “እነዚህ በመላው ምድር ጌታ አጠገብ የሚቆሙ ሁለቱ የተቀቡ ናቸው” አለ።