زکرياه 4 FHB Father's Heart Bible™

4 ¹بيا هغه فرښته چې ما سره يې خبرې کولې راستنه شوه او زۀ يې راويښ کړم، لکه څوک چې د خوب نه راويښ کړے شى. ²هغۀ راته ووئيل، ”تۀ څۀ وينې؟“ ما ووئيل، ”يو د سرو زرو ډيوټ وينم، د دې په سر يو ټال دے، اوه ډيوې پرې دى، او د هرې ډيوې دپاره د دې په سر اوه نلۍ دى.

³د دې خوا ته دوه د زيتُون ونې ولاړې دى، يوه د ټال ښى لاس ته او بله د دې کيڼ لاس ته.“

⁴نو ما هغه فرښتې ته چې ما سره يې خبرې کولې ووئيل، ”اے زما مالِکه، دا څۀ شے دے؟“

⁵نو هغه فرښتې چې ما سره يې خبرې کولې ووئيل، ”آيا تۀ نۀ پوهېږې چې دا څۀ دى؟“ ما ووئيل، ”نه، اے زما مالِکه.“

⁶هغۀ راته ووئيل، ”دا زمونږ د پلار کلام دے زروبابل ته: نۀ په زور، نۀ په طاقت، بلکې زما په روح، د آسمان د لښکرو پلار فرمائى. ⁷اے لوئ غره، تۀ څوک يې؟ د زروبابل په مخکښې به تۀ هوار مېدان شې. هغه به د سر تيږه داسې چغې وهلو راوباسى، ’فضل، فضل دې پرې وى!‘“

⁸بيا د زمونږ د پلار کلام ما ته راغلو، چې،

⁹”د زروبابل لاسونو د دې کور بُنياد کېښودو، او د هغۀ لاسونه به دا تمام کړى. نو تاسو به پوه شئ چې د آسمان د لښکرو پلار زۀ تاسو ته لېږلے يم. ¹⁰ځکه چې چا د وړو شيانو ورځ سپکه ګڼلې ده؟ هغوئ به خوشحاله شى، کله چې د زروبابل په لاس کښې د ساختمان شاقول وينى. دا اوۀ د زمونږ د پلار سترګې دى، چې په ټوله زمکه ګرځى.“

¹¹نو ما هغۀ ته ووئيل، ”د ډيوټ ښى او کيڼ لاس ته دا دوه د زيتُون ونې څۀ دى؟“ ¹²ما بيا ووئيل، ”دا دوه د زيتُون څانګې چې د سرو زرو د هغو دوو نلو سره دى چې سرۀ زرينه تېل ترې تويېږى، دا څۀ دى؟“

¹³هغۀ راته ووئيل، ”آيا تۀ نۀ پوهېږې چې دا څۀ دى؟“ ما ووئيل، ”نه، اے زما مالِکه.“

¹⁴هغۀ ووئيل، ”دا هغه دوه مسح شوى کسان دى چې د ټولې زمکې د مالِک په خوا کښې ولاړ دى.“