Jakaria 4 FHB Father's Heart Bible™

4 ¹Tuluy malaikat anu geus ngobrol jeung kaula teh datang deui, terus ngagugahkeun kaula, cara jalma anu digugahkeun tina sare. ²Mantenna mariksa, “Naon anu katenjo ku maneh?” Walon kaula, “Aya hiji ajug emas, aya pinggan dina luhurna, jeung tujuh lampu, masing-masing lampu aya tujuh corongan dina luhurna.

³Aya dua tangkal jaitun nangtung di gigireunana, nu hiji di beulah katuhu pinggan, nu hiji deui di beulah kencana.”

⁴Tuluy kaula nanya ka malaikat anu keur ngobrol jeung kaula teh, “Naon ieu teh, Juragan?”

⁵Malaikat anu keur ngobrol jeung kaula ngawaler, “Na maneh teu nyaho naon ieu teh?” Walon kaula, “Alim terang, Juragan.”

⁶Pok Mantenna ngalahir ka kaula, “Ieu teh pangandika Rama urang ka Serubabel: Lain ku kakuatan, lain ku kakawasaan, tapi ku Roh Kami, kitu dawuhan Rama Panglima balad sawarga. ⁷Saha maneh, eh gunung anu gede? Di payuneun Serubabel maneh bakal jadi tanah anu rata. Anjeunna bakal ngaluarkeun batu puncak bari ngagorowok, ‘Sih kurnia, sih kurnia ka eta!’

⁸Tuluy pangandika Rama urang sumping ka kaula, ungelna,

⁹Leungeun Serubabel anu geus masang pademen ieu gedong; leungeunna deui anu bakal ngaréngsékeunana. Geus kitu maneh bakal nyaho yen Rama Panglima balad sawarga anu geus ngutus Kami ka maraneh. ¹⁰Saha anu geus ngahina kana poe anu leutik perkarana? Maranehna bakal aratoh, nenjo tali lot aya dina leungeun Serubabel. Ari nu tujuh ieu teh soca-Na Rama urang, anu ngawas ka sakuliah bumi.”

¹¹Tuluy kaula nanya ka Mantenna, “Naon ieu dua tangkal jaitun nu di beulah katuhu jeung kiwa ajug teh?” ¹²Kaula nanya deui, “Naon ieu dua dahan jaitun nu di gigireun dua corong emas anu ngucurkeun minyak emas teh?”

¹³Mantenna ngawaler, “Na maneh teu nyaho naon ieu teh?” Walon kaula, “Alim terang, Juragan.”

¹⁴Saur Mantenna, “Ieu teh dua jelema anu diurapan, anu ngadeg di gigireun Gusti nu ngawasaan sakuliah bumi.”