Mi eng' bukuit

Zekariah 4 FHB Father's Heart Bible™

Kiistoi 15% eng' kiy ne iale korook →
Bukuit

Ma Kimuuchi Ketononso Lapkeiyetap Kwanda

Wolji keldap tait ne po thahabu ne saabei keetiigap mseituni aeng' kong'oronetap Zerubabel agobo hekaluut ne ming'in ne ma kaagonyo. Ng'olyootap Kwandanyo agobo ineendet: Ma eng' kimnateet, ama eng' kamuget, ago eng' Kabuusennyu. Eunek che ki lum lumdaetap koot kong'eteni; komat kosas chii age tugul peetuutap tuguuk che mengeechen.

Ng'alaali Kwandanyo eng' mustarisyek 6–7, 9–10

Sura 4.

Koweek anyun malaikaiyat ne ng'alaali ak anee, ak kong'eeta, ko uu chii ne king'eetun eng' rwondo. Koteebe kole, “Nee ne igeere?” Ale, “Keldap tait ne po thahabu, ak soteet ne mi parak, ak taisyek tisap, ak tisap kuutik eng' tait age tugul che mi parak.

Tonone keetiigap mseituni aeng' ye neegit, age ko komostap tai ne po soteet, ak age ko komostap kaataam.”

Ale anyun malaikaiyat ne ng'alaali ak anee, “Nee chuuto, kiptaiyandennyu?”

Kole malaikaiyat ne ng'alaali ak anee koleenji, “Tos mongen nee chuuto?” Ale, “Achicha, kiptaiyandennyu.”

Kowolji anee koleenji, “Niito ng'olyootap Kwandanyo ne agoochini Zerubabel: Ma eng' kimnateet, ama eng' kamuget, ago eng' Kabuusennyu, mwaei Kwanda ne po lugoosyek che po kipsengwet. Ng'oo inyee, tulweet ne oo? Eng' taitap Zerubabel iegu ng'wony ne litit. Imaanda koita ne po luuita kowaachei kole, “Myeeindo, myeeindo agobo ineendet!”

Konyoonjo anee ng'olyootap Kwandanyo, koleenjo,

Ki lumei eunegap Zerubabel lumdaetap koot ni; ak iletunen eunekyik. Yeityo onai kole ki iyookto anee Kwanda ne po lugoosyek che po kipsengwet okweek. Ng'oo ne kisas peetuutap tuguuk che mengeechen? Boiboitu, ye keer koldaetap tenget eng' eutap Zerubabel. Chuuto tisap ko konyegap Kwandanyo, che keerei ng'wony komugul.”

Ateebe anyun ineendet ale, “Nee keetiigap mseituni aeng' chuuto che mi komostap tai ak komostap kaataam ne po keldap tait?” Ateebe kogeny ale, “Nee mooriigap mseituni aeng' chuuto che mi ye neegit kigombok aeng' che po thahabu, che roong'jini mwanik che po thahabu?”

Kowolji anee koleenji, “Tos mongen nee chuuto?” Ale, “Achicha, kiptaiyandennyu.”

Kole, “Chuuto ko che iilaat aeng' che tonone ye neegit Kiptaiyatap ng'wony komugul.”