Zacarias 4

4 ¹Unya mibalik ang anghel nga nakigsulti kanako ug gipukaw niya ako, sama sa usa ka tawo nga gipukaw gikan sa pagkatulog. ²Nangutana siya, “Unsa may imong nakita?” Miingon ako, “Usa ka bulawang tangkawan, usa ka panaksan sa ibabaw niini, pito ka lampara, ug pito ka tubo sa matag lampara sa ibabaw.

³Duha ka kahoyng olibo ang nagbarog tupad niini, ang usa sa tuo sa panaksan, ang usa sa wala niini.”

⁴Ug miingon ako sa anghel nga nakigsulti kanako, “Unsa ba kini, akong agalon?”

⁵Unya ang anghel nga nakigsulti kanako miingon, “Wala ka ba masayod kon unsa kini?” Miingon ako, “Wala, akong agalon.”

⁶Miingon siya kanako, “Mao kini ang pulong sa atong Amahan ngadto kang Zerubbabel: Dili pinaagi sa kusog, ni pinaagi sa gahom, kondili pinaagi sa akong Espiritu, nag-ingon ang Amahan sa mga panon sa langit. ⁷Kinsa ka ba, dakong bukid? Sa atubangan ni Zerubbabel mahimo kang patag nga yuta. Iyang dad-on ang kinatumyang bato nga maninggit, “Grasya, grasya niini!”

⁸Unya miabot kanako ang pulong sa atong Amahan, nga nag-ingon,

⁹Ang mga kamot ni Zerubbabel nagpahimutang sa patukoranan niini nga balay; ang iyang mga kamot maoy mohuman niini. Unya masayod ka nga ang Amahan sa mga panon sa langit nagpadala kanako nganha kanimo. ¹⁰Kinsa ba ang nagtamay sa adlaw sa gagmayng mga butang? Managsadya sila, sa pagkakita sa tunton diha sa kamot ni Zerubbabel. Kining pito mao ang mga mata sa atong Amahan, nga nagalibotlibot sa tibuok kalibotan.”

¹¹Unya nangutana ako kaniya, “Unsa kining duha ka kahoyng olibo sa tuo ug sa wala sa tangkawan?” ¹²Nangutana ako pag-usab, “Unsa kining duha ka sanga sa olibo tupad sa duha ka bulawang tubo nga nagabubo sa bulawang lana?”

¹³Miingon siya kanako, “Wala ka ba masayod kon unsa kini?” Miingon ako, “Wala, akong agalon.”

¹⁴Miingon siya, “Mao kini ang duha nga dinihogan nga nagbarog tupad sa Magmamando sa tibuok kalibotan.”