Zechariah 4

4 ¹Den di angel wey bin dey talk wit me come back come wake me, like person wey dem wake from sleep. ²E ask me, “Wetin you dey see?” I talk say, “I see one lampstand wey dem make wit gold, wit bowl for im top, seven lamp, seven pipe for each lamp wey dey im top.

³Two olive tree dey stand for im side, one for di right side of di bowl, di oda one for im left.”

⁴So I ask di angel wey bin dey talk wit me, “Wetin be dis ones, my oga?”

⁵Den di angel wey dey talk wit me answer, “You no sabi wetin dis ones be?” I talk say, “No, my oga.”

⁶E tell me, “Na dis be our Papa word to Zerubbabel: No be by strength, no be by power, but na by my Spirit, na so our Papa wey get di army for heaven talk. ⁷You be who, you big mountain? For Zerubbabel front you go turn flat ground. E go bring out di top-stone as e dey shout, ‘Grace, grace to am!’”

⁸Den di word of our Papa come reach me, e talk say,

⁹Na Zerubbabel hand lay di foundation of dis house; na im hand go finish am. Den you go sabi say na our Papa wey get di army for heaven send me come to una. ¹⁰“Who don look down di day of small-small tin? Dem go dey rejoice, as dem see di measuring-line for Zerubbabel hand. Dis seven na di eyes of our Papa, wey dey go round di whole earth.”

¹¹Den I ask am, “Wetin be dis two olive tree wey dey for di right and left of di lampstand?” ¹²I ask again, “Wetin be dis two olive branch wey dey by di two gold pipe wey dey pour out gold oil?”

¹³E tell me, “You no sabi wetin dis ones be?” I talk say, “No, my oga.”

¹⁴E talk say, “Dis two na di anointed ones wey dey stand near di Oga wey get di whole earth.”