Pepadhange Rama kita Ora Bisa Dipalangi
Kandhil emas sing diisi saka wit zaitun loro mangsuli sedhihe Zerubabel marga padaleman suci sing cilik lan durung rampung. Pangandikane Rama kita marang dheweke: dudu marga kakuwatan, lan dudu marga kasekten, nanging marga Roh-Ku. Tangan sing wis masang pondhasine bakal ngrampungake; aja ana sing ngremehake prakara cilik.
4 1Malaekat kang ngandika karo aku mau banjur wangsul lan nggugah aku, kaya wong kang digugah saka anggone turu. 2Malaekat mau ndangu: “Apa kang kokdeleng?” Aku matur: “Kula ningali padamaran mas, ingkang ing pucukipun wonten pasunipun, saha diyan pitu, kanthi cucuran pitu kangge saben diyan ingkang wonten ing nginggil.
3Wit jaitun kalih ngadeg ing sacelakipun, satunggal wonten ing tengenipun pasu, satunggalipun wonten ing kiwanipun.”
4Aku banjur matur marang malaekat kang ngandika karo aku mau: “Punika punapa, dhuh gusti kawula?”
5Malaekat kang ngandika karo aku mau banjur ndangu: “Apa kowe ora ngerti apa iki?” Aku matur: “Boten, dhuh gusti kawula.”
6Malaekat mau banjur ngandika marang aku: “Iki pangandikane Rama kita marang Zerubabel: Ora srana karosan, uga ora srana panguwasa, nanging srana RohKu, mangkono pangandikane Rama, Gustine wadyabala ing swarga. 7He gunung kang gedhe, sapa kowe? Ing ngarepe Zerubabel kowe bakal dadi tanah kang warata. Dheweke bakal ngwetokake watu pucuk kambi surak-surak: ‘Sih-rahmat, sih-rahmat tumrap watu iku!’
8Pangandikane Rama kita banjur rawuh marang aku, surasane:
9Tangane Zerubabel wis masang pondhasine padaleman iki; tangane uga bakal ngrampungake. Ing kono kowe bakal padha ngerti, yen Rama, Gustine wadyabala ing swarga wis ngutus aku marang kowe kabeh. 10Sapa kang ngremehake dina samubarang kang katon cilik? Wong-wong bakal padha bungah-bungah, nalika ndeleng tali sipat ing tangane Zerubabel. Pitu iki yaiku paningale Rama kita, kang njlajahi salumahing bumi kabeh.”
11Aku banjur matur marang malaekat mau: “Wit jaitun kalih ing tengen lan kiwanipun padamaran punika punapa?” 12Aku matur maneh: “Pang jaitun kalih ing sacelakipun saluran mas kalih, ingkang ngesokaken lisah jene punika punapa?”
13Malaekat mau banjur ndangu: “Apa kowe ora ngerti apa iki?” Aku matur: “Boten, dhuh gusti kawula.”
14Malaekat mau banjur ngandika: “Iki wong loro kang wis dijebadi, kang ngadeg ing ngarsane Gustine salumahing bumi kabeh.”