Ìhè Nna Anyị, A Pụghị Ịkwụsị Ya

Ihe ndọba oriọna ọlaedo nke osisi oliv abụọ na-enye mmanụ na-aza obi nkoropụ Zerubabel maka ụlọ nsọ nta a na-arụchabeghị. Okwu Nna anyị nye ya: ọ bụghị site n'ike, ọ bụghị site n'ume, kama site na Mmụọ m. Aka ndị tọrọ ntọala ga-arụcha ya; ọ dịghị onye kwesịrị ileda ihe nta anya.

Isi 4.

Mgbe ahụ, mmụọ ozi ahụ nke na-agwa m okwu lọghachiri, kpọtee m, dịka a si akpọte onye nọ nʼụra. Ọ jụrụ m sị, “Gịnị ka ị na-ahụ?” Asịrị m, “Ihe ịdọba oriọna e ji ọlaedo mee, otu efere dị nʼelu ya, oriọna asaa, na ọnụ mmanụ asaa nye oriọna ọbụla dị nʼelu ya.

Osisi oliv abụọ guzoro nʼakụkụ ya, otu nʼaka nri efere ahụ, nke ọzọ nʼaka ekpe ya.”

Asịrị m mmụọ ozi ahụ nke na-agwa m okwu, “Gịnị ka ndị a bụ, onyenwe m?”

Mgbe ahụ, mmụọ ozi ahụ nke na-agwa m okwu zara sị, “Ị maghị ihe ndị a bụ?” Asịrị m, “Mba, onyenwe m.”

Ọ gwara m sị, “Nke a bụ okwu Nna anyị nye Zerubabel: Ọ bụghị site nʼike, ọ bụghịkwa site nʼume, kama site na Mmụọ m, ka Nna nke usuu ndị agha nke eluigwe na-ekwu. Gịnị ka ị bụ, gị ugwu ukwu? Nʼihu Zerubabel ị ga-aghọ ala dị larịị. Ọ ga-ebupụta nkume isi ahụ nʼoke iti mkpu, sị, “Amara, amara dịrị ya!”

Mgbe ahụ, okwu Nna anyị rutere m, sị,

Aka Zerubabel tọrọ ntọala ụlọ a; aka ya ga-arụchakwa ya. Mgbe ahụ, ị ga-amara na Nna nke usuu ndị agha nke eluigwe zitere m nʼebe unu nọ. Onye leliri ụbọchị ihe ndị dị nta anya? Ha ga-aṅụrị ọṅụ, mgbe ha hụrụ eriri ọtụtụ nʼaka Zerubabel. Asaa ndị a bụ anya Nna anyị, nke na-agagharị nʼụwa niile.”

Mgbe ahụ, ajụrụ m ya, “Gịnị ka osisi oliv abụọ ndị a bụ, bụ ndị dị nʼaka nri na aka ekpe nke ihe ịdọba oriọna ahụ?” Ajụrụ m ọzọ, “Gịnị ka alaka oliv abụọ ndị a bụ, bụ ndị dị nʼakụkụ okpokoro ọlaedo abụọ ahụ nke na-awụpụta mmanụ edo edo?”

Ọ gwara m sị, “Ị maghị ihe ndị a bụ?” Asịrị m, “Mba, onyenwe m.”

Ọ sịrị, “Ndị a bụ mmadụ abụọ ahụ e tere mmanụ, ndị guzo nʼakụkụ Onyenwe ụwa niile.”