Zechariah 4 FHB Father's Heart Bible™

4 ¹Tetiya moi logot te kotha kora sorgoduth tu wapas ahhise, aru ekjon manuh ke ghum pora uthai diya nisena, moi ke uthai dise. ²Tar pora koise, “Tumi ki dikhise?” Moi koise, “Ekta suna laga deepdan, tar uporte ekta bati, sat-ta deep, aru uporte thaka ek-ekta deep nimite sat-ta naali ase.

³Tar usorte duita jaitun ghas khara ase, ekta bati laga dyna phale, aru dusra tu baya phale ase.”

⁴Aru moi logot te kotha kora sorgoduth ke moi hudise, “He moi laga probhu, eitu khan ki ase?”

⁵Tetiya moi logot te kotha kora sorgoduth tu pora koise, “Eitu khan ki ase, tumi najane?” Moi koise, “Nai, moi laga probhu.”

⁶Tar pora moi ke koise, “Eitu amar Pitri pora Jerubbabel ke diya kotha ase: Takot pora nohoi, aru shakti pora bhi nohoi, kintu Moi laga Atma pora he, sorgo laga sena khan laga Pitri koi ase. ⁷He dangor pahar, tumi kun ase? Jerubbabel laga age te tumi saman matha hoi jabo. Aru tar pora uporte thaka pathor tu bahar te anibo, aru jor pora mati kene koise, “Anugrah, eitu ke anugrah hobi!”

⁸Tetiya amar Pitri laga kotha moi logot te ahhise, aru koise,

⁹Jerubbabel laga hath pora eitu ghor laga bhetimul bonaise; aru tar hath pora he eitu khotom koribo. Tetiya sorgo laga sena khan laga Pitri pora moi ke tumikhan logot te pathaise koi kene tumikhan janibo. ¹⁰Chutu kaam laga din ke kun pora tuch korise? Jerubbabel laga hath te thaka naap-dhaga tu dikhi kene tarkhan khushi hobo. Eitu sat-ta amar Pitri laga suku khan ase, aru pura prithibi uporte eitu khan ghuri thake.”

¹¹Tetiya moi tar ke hudise, “Deepdan laga dyna aru baya phale thaka eitu duita jaitun ghas khan ki ase?” ¹²Moi arubi hudise, “Suna laga tel ulai diya duita suna laga naali usorte thaka eitu duita jaitun laga daal khan ki ase?”

¹³Tar pora moi ke koise, “Eitu khan ki ase, tumi najane?” Moi koise, “Nai, moi laga probhu.”

¹⁴Tar pora koise, “Eitu khan pura prithibi laga Probhu usorte khara thaka tel mola duijon ase.”