சகரியா 4

4 ¹பின்பு என்னோடே பேசின தூதன் திரும்பிவந்து, நித்திரையிலிருந்து எழுப்பப்படுகிற ஒருவனைப்போல என்னை எழுப்பினான். ²அவன் என்னை நோக்கி, “நீ என்ன காண்கிறாய்?” என்று கேட்டான். அதற்கு நான், “இதோ, முழுவதும் பொன்னாலாகிய ஒரு விளக்குத்தண்டையும், அதின் உச்சியில் ஒரு கிண்ணத்தையும், அதின்மேல் ஏழு அகல்களையும், அதின் உச்சியிலிருக்கிற ஒவ்வொரு அகலுக்கும் ஏழு குழாய்களையும் காண்கிறேன்.

³அதின் அருகில் இரண்டு ஒலிவமரங்கள் நிற்கின்றன; ஒன்று கிண்ணத்தின் வலதுபுறத்திலும், மற்றொன்று அதின் இடதுபுறத்திலும் இருக்கிறது” என்றேன்.

⁴அப்பொழுது நான் என்னோடே பேசின தூதனை நோக்கி, “என் ஆண்டவனே, இவைகள் என்ன?” என்று கேட்டேன்.

⁵என்னோடே பேசின தூதன் எனக்குப் பிரதியுத்தரமாக, “இவைகள் இன்னதென்று உனக்குத் தெரியாதா?” என்றான். அதற்கு நான், “தெரியாது, என் ஆண்டவனே” என்றேன்.

⁶அப்பொழுது அவன் என்னை நோக்கி, “செருபாபேலுக்கு எங்கள் பிதா சொல்லுகிற வார்த்தை இதுவே: பலத்தினாலும் அல்ல, பராக்கிரமத்தினாலும் அல்ல, என் ஆவியினாலேயே ஆகும் என்று பரலோகச் சேனைகளின் பிதா சொல்லுகிறார். ⁷பெரிய மலையே, நீ யார்? செருபாபேலுக்கு முன்பாக நீ சமபூமியாவாய். ‘இதற்குக் கிருபை உண்டாவதாக, கிருபை உண்டாவதாக’ என்று ஆர்ப்பரிக்கையில், அவன் கடைக்கல்லை வெளியே கொண்டுவருவான்.”

⁸பின்பு எங்கள் பிதாவின் வார்த்தை எனக்கு உண்டாகி, அவர் சொன்னது:

⁹செருபாபேலின் கைகள் இந்த ஆலயத்தின் அஸ்திபாரத்தைப் போட்டது; அவனுடைய கைகளே அதை முடிக்கும். அப்பொழுது பரலோகச் சேனைகளின் பிதா என்னை உங்களிடத்தில் அனுப்பினார் என்பதை நீங்கள் அறிவீர்கள். ¹⁰சிறிய காரியங்களின் நாளை அசட்டைபண்ணினவன் யார்? செருபாபேலின் கையில் தூக்குநூலைக் காணும்போது அவர்கள் சந்தோஷப்படுவார்கள். இந்த ஏழும் பூமியெங்கும் சுற்றிப்பார்க்கிற எங்கள் பிதாவின் கண்களே.”

¹¹அப்பொழுது நான் அவனை நோக்கி, “விளக்குத்தண்டின் வலதுபுறத்திலும் இடதுபுறத்திலும் இருக்கிற இந்த இரண்டு ஒலிவமரங்கள் என்ன?” என்று கேட்டேன். ¹²நான் மறுபடியும், “பொன்னிற எண்ணெயைப் பீச்சுகிற இரண்டு பொன்குழாய்களண்டையில் இருக்கிற இந்த இரண்டு ஒலிவக்கிளைகள் என்ன?” என்று கேட்டேன்.

¹³அவன் என்னை நோக்கி, “இவைகள் இன்னதென்று உனக்குத் தெரியாதா?” என்றான். அதற்கு நான், “தெரியாது, என் ஆண்டவனே” என்றேன்.

¹⁴அதற்கு அவன், “இவர்கள் சர்வபூமிக்கும் ஆண்டவராயிருக்கிறவரண்டையில் நிற்கிற அபிஷேகம்பண்ணப்பட்ட இரண்டுபேர்” என்றான்.