Jeremiah 36

36 ¹Ní ọdún kẹrin ìjọba Jehoiakimu ọmọ Josiah, ọba Juda, ọ̀rọ̀ yìí tọ̀ Jeremiah wá láti ọ̀dọ̀ Baba wa pé:

²“Mú àkájọ ìwé kan, kí o sì kọ sí i gbogbo ọ̀rọ̀ tí mo ti sọ fún ọ lòdì sí Israẹli, Juda, àti gbogbo orílẹ̀-èdè, láti ìgbà tí mo ti kọ́kọ́ bá ọ sọ̀rọ̀ ní àwọn ọjọ́ Josiah títí di ìsinsìnyí. ³Bóyá àwọn ará Juda yóò gbọ́ gbogbo ibi tí mo gbèrò láti mú wá sórí wọn, kí olúkúlùkù sì yípadà kúrò ní ọ̀nà búburú rẹ̀, kí èmi lè dárí ẹ̀bi àti ẹ̀ṣẹ̀ wọn jì wọ́n.”

⁴Jeremiah sì pe Baruku ọmọ Neriah, Baruku sì kọ sórí àkájọ ìwé kan, gẹ́gẹ́ bí Jeremiah ti ń kà á sí i lẹ́nu, gbogbo ọ̀rọ̀ tí Baba wa ti sọ fún un. ⁵Nígbà náà ni Jeremiah pàṣẹ fún Baruku pé, “A ti há mi mọ́; èmi kò lè lọ sí ilé Baba wa. ⁶Lọ kà nínú àkájọ ìwé náà ọ̀rọ̀ Baba wa tí o kọ gẹ́gẹ́ bí mo ti ń kà á sí ọ lẹ́nu—kà wọ́n fún gbogbo ènìyàn ní ilé Baba wa ní ọjọ́ àwẹ̀, àti fún àwọn ará Juda tí ń ti ìlú wọn bọ̀. ⁷Bóyá ẹ̀bẹ̀ wọn fún àánú yóò dé ọ̀dọ̀ Baba wa, kí olúkúlùkù sì yípadà kúrò ní ọ̀nà búburú rẹ̀, nítorí Baba wa ti kéde ìbínú ńlá sí àwọn ènìyàn wọ̀nyí.”

⁸Baruku ọmọ Neriah sì ṣe gbogbo ohun tí Jeremiah wòlíì náà pàṣẹ fún un, ó ka ọ̀rọ̀ Baba wa nínú ìwé náà, ní ilé Baba wa. ⁹Ní ọdún karùn-ún Jehoiakimu ọmọ Josiah ọba Juda, ní oṣù kẹsàn-án, gbogbo àwọn tí ń bẹ ní Jerusalẹmu àti gbogbo àwọn tí ó ti àwọn ìlú Juda wá kéde àwẹ̀ níwájú Baba wa. ¹⁰Baruku sì ka ọ̀rọ̀ Jeremiah láti inú àkájọ ìwé náà fún gbogbo ènìyàn láti gbọ́, ní ilé Baba wa, nínú yàrá Gemariah ọmọ Shafani akọ̀wé, ní àgbàlá òkè, ní ẹnu-ọ̀nà Ẹnubodè Tuntun ti ilé Baba wa.

¹¹Nígbà tí Mikaiah ọmọ Gemariah, ọmọ Shafani, gbọ́ gbogbo ọ̀rọ̀ Baba wa láti inú àkájọ ìwé náà, ¹²ó sọ̀kalẹ̀ lọ sí ilé ọba, sí yàrá akọ̀wé, níbi tí gbogbo àwọn ìjòyè jókòó sí: Elishama akọ̀wé, Delaiah ọmọ Shemaiah, Elnatani ọmọ Akbori, Gemariah ọmọ Shafani, Sedekiah ọmọ Hananiah, àti gbogbo àwọn ìjòyè. ¹³Mikaiah sì ròyìn gbogbo ọ̀rọ̀ tí ó gbọ́ nígbà tí Baruku ka ìwé náà fún àwọn ènìyàn. ¹⁴Nítorí náà gbogbo àwọn ìjòyè rán Jehudi ọmọ Netaniah, ọmọ Shelemiah, ọmọ Kushi, sí Baruku pé, “Mú àkájọ ìwé tí o kà fún àwọn ènìyàn wá, kí o sì wá.” Baruku ọmọ Neriah sì mú un, ó sì tọ̀ wọ́n wá.

¹⁵Wọ́n sì wí fún un pé, “Jókòó, kí o sì kà á fún wa.” Baruku sì kà á fún wọn.

¹⁶Nígbà tí wọ́n gbọ́ gbogbo ọ̀rọ̀ náà, olúkúlùkù sì yípadà sí ẹnìkejì rẹ̀ pẹ̀lú ẹ̀rù, wọ́n wí fún Baruku pé, “A gbọdọ̀ sọ gbogbo ọ̀rọ̀ wọ̀nyí fún ọba.” ¹⁷Wọ́n sì béèrè lọ́wọ́ Baruku pé, “Sọ fún wa, báwo ni o ṣe kọ gbogbo ọ̀rọ̀ wọ̀nyí? Ṣé bí ó ti ń kà á sí ọ lẹ́nu ni?”

¹⁸Baruku sì dáhùn pé, “Ó ka gbogbo ọ̀rọ̀ wọ̀nyí sí mi lẹ́nu; mo sì fi tawada kọ wọ́n sínú ìwé náà.”

¹⁹Nígbà náà ni àwọn ìjòyè wí fún Baruku pé, “Lọ fi ara rẹ pamọ́, ìwọ àti Jeremiah; má ṣe jẹ́ kí ẹnikẹ́ni mọ ibi tí ẹ gbé wà.”

²⁰Wọ́n sì wọ ọ̀dọ̀ ọba lọ sí àgbàlá, wọ́n fi àkájọ ìwé náà sílẹ̀ nínú yàrá Elishama akọ̀wé, wọ́n sì ròyìn ohun gbogbo fún un. ²¹Ọba sì rán Jehudi lọ mú àkájọ ìwé náà; ó sì mú un wá láti inú yàrá Elishama akọ̀wé. Jehudi sì kà á sókè fún ọba àti gbogbo àwọn ìjòyè tí ó dúró lẹ́gbẹ̀ẹ́ rẹ̀. ²²Ọba sì jókòó ní ilé ìgbà òtútù, ní oṣù kẹsàn-án, iná sì ń jó nínú àwo-iná níwájú rẹ̀. ²³Bí Jehudi ti ka ọ̀wọ̀n mẹ́ta tàbí mẹ́rin, ọba sì fi ọ̀bẹ akọ̀wé gé wọn kúrò, ó sì ju wọn sínú àwo-iná títí tí gbogbo àkájọ ìwé náà fi jóná. ²⁴Ṣùgbọ́n ọba àti gbogbo àwọn ìránṣẹ́ rẹ̀ tí ó gbọ́ ọ̀rọ̀ wọ̀nyí kò bẹ̀rù, bẹ́ẹ̀ ni wọn kò fa aṣọ wọn ya. ^a a v24 Fífa aṣọ ẹni ya jẹ́ àmì ìbílẹ̀ ìbànújẹ́, ọ̀fọ̀, tàbí ìrònúpìwàdà níwájú Ọlọ́run. ²⁵Elnatani, Delaiah, àti Gemariah bẹ ọba kí ó má ṣe sun àkájọ ìwé náà, ṣùgbọ́n ó kọ̀ láti fetí sí wọn. ²⁶Ọba sì pàṣẹ fún Jerahmeeli ọmọ ọba, Seraiah ọmọ Asrieli, àti Shelemiah ọmọ Abdeeli láti mú Baruku akọ̀wé àti Jeremiah wòlíì náà, ṣùgbọ́n Baba wa fi wọ́n pamọ́.

²⁷Nígbà náà ni ọ̀rọ̀ Baba wa tọ̀ Jeremiah wá lẹ́yìn tí ọba sun àkájọ ìwé náà pẹ̀lú àwọn ọ̀rọ̀ tí Baruku kọ gẹ́gẹ́ bí Jeremiah ti ń kà á sí i lẹ́nu pé:

²⁸“Mú àkájọ ìwé mìíràn, kí o sì kọ sí i gbogbo ọ̀rọ̀ tí ó wà nínú àkájọ ìwé àkọ́kọ́, èyí tí Jehoiakimu ọba Juda sun. ²⁹Nípa Jehoiakimu ọba Juda, wí pé: Báyìí ni Baba wa wí: Ìwọ sun àkájọ ìwé yìí, ìwọ ń béèrè pé, ‘Èéṣe tí ìwọ fi kọ ọ́ pé ọba Babeli yóò dé dájúdájú, yóò sì pa ilẹ̀ yìí run, yóò sì pa ènìyàn àti ẹranko gbogbo rẹ́?’ ³⁰Nítorí náà báyìí ni Baba wa wí nípa Jehoiakimu ọba Juda: kò sí ẹnìkan nínú àwọn ọmọ rẹ̀ tí yóò jókòó lórí ìtẹ́ Dafidi; òkú rẹ̀ ni a ó sì jù síta sí ooru ọ̀sán àti òtútù òru. ³¹Èmi yóò sì jẹ ẹ́ níyà, òun, àti àwọn ọmọ rẹ̀, àti àwọn ìránṣẹ́ rẹ̀ nítorí ẹ̀ṣẹ̀ wọn, èmi yóò sì mú wá sórí wọn, àti sórí àwọn olùgbé Jerusalẹmu, àti sórí àwọn ènìyàn Juda gbogbo ibi tí mo ti kéde sí wọn—ṣùgbọ́n wọn kò fetísílẹ̀.”

³²Jeremiah sì mú àkájọ ìwé mìíràn, ó fi fún Baruku ọmọ Neriah akọ̀wé, ẹni tí ó kọ gẹ́gẹ́ bí ó ti ń kà á sí i lẹ́nu gbogbo ọ̀rọ̀ àkájọ ìwé tí Jehoiakimu ọba Juda sun nínú iná, ó sì fi ọ̀pọ̀ ọ̀rọ̀ bíi tirẹ̀ kún un.