Yelemiya 36 FHB Father's Heart Bible™

36 ¹Muna mvula ya iya ya luyalu lwa Yehoyakimi, mwana wa Yozyasi, kyamvu wa Yuta, ndinga yayi yakwísa kwena Yelemiya, yitukidila kwena Tata wetu:

²«Bonga mukanda wa kuvunga amana sonika haka mambu moosu mana yízonza kwena ngeyi mu kutukwana Kiseledi, Yuta yi makanda moosu, tukidila kina yázonza kwena ngeyi theti mu bilumbu bya Yozyasi tii yi bwabu. ³Mbanzi batu ba Yuta bakayuka disa dyosu dina yizodi kunata kwena bawu, ndangu kosu mutu kakatuka mu nzila yandi ya mbi, hanga yilolula mambi mawu yi masumu mawu.»

⁴Yelemiya wumutedisi Baluku, mwana wa Neliya, amana Baluku wásonika mu mukanda wa kuvunga mambu moosu mana Tata wetu kázonza kwena Yelemiya, bwosu Yelemiya kakala zonza kwena yandi. ⁵Hanga Yelemiya wuzimbudi Baluku: «Meni yikangiwa; yilendaku kwenda ku nzu ya Tata wetu. ⁶Kwenda tanga muna mukanda wa kuvunga mambu ma Tata wetu mana wásonika bwosu meni yakala zonza, utangaza kwena batu boosu muna nzu ya Tata wetu mu kilumbu kya kuzila madya, yi kwena batu ba Yuta bana bisi kwisa tuka mu mavula ma bawu. ⁷Mbanzi ndombolu ya kyadi ya bawu yálubwakila kwena Tata wetu, amana kosu mutu kakatuka mu nzila yandi ya mbi, mukuma Tata wetu wázimbula khabu za lawu mu kutukwana batu baba.»

⁸Baluku, mwana wa Neliya, wáhanga moosu mana mbikudi Yelemiya kátuma, mu kutanga mambu ma Tata wetu muna mukanda, muna nzu ya Tata wetu. ⁹Muna mvula ya tanu ya Yehoyakimi, mwana wa Yozyasi, kyamvu wa Yuta, muna ngonda ya vwa, batu boosu ba Yelusalemi yi boosu bana bisa tuka mu mavula ma Yuta básamuna kuzila madya ku mesu ma Tata wetu. ¹⁰Baluku wátanga mambu ma Yelemiya muna mukanda wa kuvunga, ndangu batu boosu bayuka, muna nzu ya Tata wetu, muna suku dya Gemadiya, mwana wa Safani, mulongi wa mitsiku, muna kyanzala kya ku zilu, ku mwelu wa Pha wa nzu ya Tata wetu.

¹¹Muna tangwa Mikaya, mwana wa Gemadiya, mwana wa Safani, káyuka mambu moosu ma Tata wetu muna mukanda wa kuvunga, ¹²wátuluka ku nzu ya kyamvu, ku suku dya mulongi wa mitsiku, kuna basadi ba leta boosu bakala zakala: Edisama, mulongi wa mitsiku, Delaya, mwana wa Semaya, Elenatani, mwana wa Akabolo, Gemadiya, mwana wa Safani, Sedekiya, mwana wa Hananiya, yi basadi ba leta boosu. ¹³Mikaya wásamuna mambu moosu mana káyuka tangwa Baluku kakala tanga muna mukanda kwena batu. ¹⁴Hanga basadi ba leta boosu báhitika Yehudi, mwana wa Netaniya, mwana wa Selemiya, mwana wa Kusi, kwena Baluku: «Nata mukanda wa kuvunga wuna wátanga kwena batu, amana wisa.» Baluku, mwana wa Neliya, wábonga wawu amana wisa kwena bawu.

¹⁵Bawu bámuzimbwala: «Zakala amana utangila betu wawu.» Hanga Baluku wátanga wawu kwena bawu.

¹⁶Buna báyuka mambu moosu, kosu mutu wábaluka kwena ndandu yandi mu kubanga, amana bázimbula Baluku: «Tufweti zimbula mambu moosu mama kwena kyamvu.» ¹⁷Bawu bámuhyula Baluku: «Utuzimbula, mu phila mbi wásonika mambu moosu mama? Keti bwosu yandi kakala zonza?»

¹⁸Baluku wávutula: «Yandi wázonza kwena meni mambu moosu mama, amana yísonikama muna mukanda ni kazasa.»

¹⁹Hanga basadi ba leta bázimbula Baluku: «Kwenda disweka, ngeyi yi Yelemiya; ka mutu mosi ku kazaya kuna lwenina.»

²⁰Hanga bawu bénda kwena kyamvu muna kyanzala, básisa mukanda wa kuvunga muna suku dya Edisama, mulongi wa mitsiku, amana básamuna moosu kwena yandi. ²¹Kyamvu wáhitika Yehudi kikuma kya mukanda wa kuvunga, amana yandi wábonga wawu muna suku dya Edisama, mulongi wa mitsiku. Yehudi wátanga wawu ku mazu kwena kyamvu yi kwena basadi ba leta boosu bana bakala telama ha kati dya yandi. ²²Kyamvu kakala zakala muna nzu ya kyosi, muna ngonda ya vwa, amana mbawu yakala lema muna nzungu ya mbawu ku thwala yandi. ²³Bwosu Yehudi kakala tanga bitini bitatu holo biya, kyamvu wázenga byawu ni mbedi ya mulongi wa mitsiku, amana wábitimbula muna nzungu ya mbawu, tii yi kuna mukanda wa kuvunga wosu wáyoka. ²⁴Kaasi kyamvu yi basadi bandi boosu bana báyuka mambu mama, bábangaku amana báyataku miledi mya bawu. ^a a v24 Kuyata miledi kwa mutu kukala kidimbu kya kinkulu kya kiwayi, kya madidi, holo kya kubalula mbundu ku mesu ma Nzambi. ²⁵Elenatani, Delaya yi Gemadiya bámubokwadila kyamvu ndangu kayokaku mukanda wa kuvunga, kaasi yandi wázolaku kubayuka. ²⁶Kyamvu wátuma Yelameli, mwana wa kyamvu, Selaya, mwana wa Azelyeli, yi Selemiya, mwana wa Abideli, mu kukwata Baluku, mulongi wa mitsiku, yi mbikudi Yelemiya, kaasi Tata wetu wábasweka.

²⁷Hanga ndinga ya Tata wetu yakwísa kwena Yelemiya, kunima dya kuyoka kwa kyamvu mukanda wa kuvunga wuna wakala yi mambu mana Baluku kásonika bwosu Yelemiya kakala zonza:

²⁸«Bonga mukanda wa kuvunga wa hika amana sonika haka mambu moosu mana makala muna mukanda wa kuvunga watheti, wuna Yehoyakimi, kyamvu wa Yuta, káyoka. ²⁹Kikuma kya Yehoyakimi, kyamvu wa Yuta, uzimbula: Awu buna buzimbudi Tata wetu: Ngeyi wáyoka mukanda wa kuvunga wawu, mu kuhyula: “Kikuma kya biki wásonika ni kyamvu wa Babiloni kakwísa mu kyedika amana kabunga tsi yayi, mu kumanisa batu yi bambisi zoosu?” ³⁰Bwabuna Tata wetu buzimbudi mu kikuma kya Yehoyakimi, kyamvu wa Yuta: ka mutu mosi ku wa kikanda kyandi kazakala ha kiti kya luyalu kya Tavidi; mvumbi yandi yakatimbulwa ku phenza, ku mwini mu muini yi ku kyosi mu phipha. ³¹Yikámuheka ndola, yandi yi butuka dyandi yi basadi bandi, kikuma kya masumu mawu, amana yikábanatina bawu, yi batu bisi Yelusalemi, yi batu ba Yuta, disa dyosu dina yázimbula mu kubakwana, kaasi bawu báyukaku.»

³²Yelemiya wábonga mukanda wa kuvunga wa hika, amana wáheka wawu kwena Baluku, mwana wa Neliya, mulongi wa mitsiku, wuna wásonika bwosu Yelemiya kakala zonza mambu moosu ma mukanda wa kuvunga wuna Yehoyakimi, kyamvu wa Yuta, káyoka mu mbawu, yi mambu ma lawu ma phila yimosi.