Jeremiah 36

36 ¹Judahwui awunga Josiahwui naomayara Jehoiakimna mungda khamate kum, ithumwui Avāwui eina tui chi Jeremiahli rāhānga:

²"Lairik akhalui akha khuirāda, Josiahwui atamli ina nali hāngkhare atam eina thuida aja rāshungda eina tangda, Israel, Judah kala yur saikorawuitungli ina nali hānghaikasā tui saikora chi chili kapilu. ³Judahna ina athumwuitungli khuirāra da ngarānda kahai kalākashi saikora chi shālaga, mi kachiva̱na kachichāwui makaphā apong eina latunglapai; chieina ina athumwui khayonkhamāng kala morei pheomira."

⁴Chieina Jeremiahna Neriahwui naomayara Baruchli hokhui, kala Jeremiahna hāngtāmamānda, ithumwui Avāna ali hānghaikasā tui saikora chi Baruchna lairik akhalui akhali kapikakhui. ⁵Chieina Jeremiahna Baruchli kasoda hānga, "Ili khamayona lei; ithumwui Avāwui shimli ina mavārarmara. ⁶Vāda, ina hāngtāmamānda nana kapikahai lairik akhalui chiwui eina ithumwui Avāwui tui chi khum thangli ithumwui Avāwui shimli mi saikorali pālu, kala athumwui keinung eina rākahai Judahwui mibingli pāchitheilu. ⁷Athumwui lumashan kapo chi ithumwui Avāwui mangāli kāshungra jilapai, kala mi kachiva̱na kachichāwui makaphā apong eina latunglapai; kaja ithumwui Avāna mibing hiwuitungli malungkhavāt haklak chi hānghaira."

⁸Neriahwui naomayara Baruchna Jeremiah marānna ali kaso kahai saikora chi sāda, ithumwui Avāwui shimli lairikli ithumwui Avāwui tui chi pāchithei. ⁹Judahwui awunga Josiahwui naomayara Jehoiakimna mungda kaphangā kum, kachāng kachikoli, Jerusalemli khalei saikora kala Judahwui keinung eina rākahai mi saikorana ithumwui Avāwui mangāli khum sāra da vaomalāna. ¹⁰Baruchna mi saikorana shākhavai, ithumwui Avāwui shimli, kapime Shaphanwui naomayara Gemariahwui kāli, atowui kayāngli, ithumwui Avāwui shimwui kadhara Ngaveiwui khāmongli, lairik akhalui chiwui eina Jeremiahwui tui chi pāchithei.

¹¹Shaphanwui naomayara Gemariahwui naomayara Micaiahna, lairik akhalui chiwui eina ithumwui Avāwui tui saikora chi kashā tharan, ¹²ana awungawui shimli, kapimewui kāli tunga, chili wungnaobing saikora apamda lei: kapime Elishama, Delaiah Shemaiahwui naomayara, Elnathan Achborwui naomayara, Gemariah Shaphanwui naomayara, Zedekiah Hananiahwui naomayara, kala wungnaobing saikora. ¹³Baruchna mibingli lairikli kapā tharan, Micaiahna awui shākahai tui saikora chi athumli unghāngsera. ¹⁴Chieina wungnaobing saikorana Cushiwui naomayara Shelemiah, Shelemiahwui naomayara Nethaniah, Nethaniahwui naomayara Jehudili Baruchwuili chihovai: "Nana mibingli kapā lairik akhalui chi khuirālu, kala rālu." Chieina Neriahwui naomayara Baruchna chi khuida athumwuili rai.

¹⁵Athumna ali hānga, "Pamda, ithumli chi pālu." Chieina Baruchna athumli chi pāchithei.

¹⁶Tui saikora chi kashā tharan, athum ngacheelaka mi kachiva̱na khongnainaoshong ngareiungserhaowa, kala Baruchli hānga, "Tui saikora hi ithumna awungali hāngphalungra." ¹⁷Athumna Baruchli ngahāna, "Ithumli hānglu, tui saikora hi nana kathāda kapikhui kajikhala? Ana hāngtāmamānda?"

¹⁸Baruchna ngahānkai, "Ana tui saikora hi ili hāngtāmamānda, kala ina chi muk eina lairikli kapi."

¹⁹Chieina wungnaobing china Baruchli hānga, "Na eina Jeremiah vāda yāmngathumlu; nani kalikhala kaji khipānakha matheiranu."

²⁰Chieina athumna lairik akhalui chi kapime Elishamawui kāli horhaida, awunga keinungli awungawui mangāli vai, kala saikora chi ali unghāngsera. ²¹Awungana lairik akhalui chi rākhui khavai Jehudili chihovai; ana chi kapime Elishamawui kāli khui. Kala Jehudina chi awunga eina awui ngalemli khanganing wungnaobing saikorawui mangāli pāchithei. ²²Kachāng kachikoli awungana sikachāng shimli pama, kala awui mangāli meiham akhali mei chuisai. ²³Jehudina aphei kathum lah mati pāhai tharan, lairik akhalui katonga meina chuiserhairanglakha eina tangda awungana chi kapimewui khainao eina katattāmihaida meifali horsang. ²⁴Kha awunga eina tui hi kashā awui rao saikora, athumna mangacheemana, lah athumwui kachon maserkhākmana. ^a a v24 Khalattawui kachon serkhāka hi achālakhawui thāda wukkhanang, chapkachā, lah Varewui mangāli morei einala ngareithuiwui matakhak akhana. ²⁵Elnathan, Delaiah kala Gemariahna awungali lairik akhalui chi machui khavai poi, kha ana athumwui tui khanganā mamayāmana. ²⁶Awungana awungawui naomayara Jerahmeelli, Azri-elwui naomayara Seraiahli, kala Abdeelwui naomayara Shelemiahli kapime Baruch eina marān Jeremiahli tukkhui khavai kasoi, kha ithumwui Avāna anili thummihaowa.

²⁷Chieina awungana Jeremiahna hāngtāmamānda Baruchna kapihai tuibing leikahai lairik akhalui chi mei eina chuihai kahaiwui thili, ithumwui Avāwui tui china Jeremiahli rāhānga:

²⁸"Lairik akhalui khangatei akha khuilu, kala Judahwui awunga Jehoiakimna chuihai lairik akhalui kharewui tui saikora chi chiwuitungli kapilu. ²⁹Judahwui awunga Jehoiakimwui pongli hānglu: Ithumwui Avāna hithāda hānga: Nana hi lairik akhalui chuihaira, 'Babylonwui awunga kachangkhata rāda ngalei hi sāshimānra, kala mi eina sā saikora mataimila da khisāda nana kapisang kajikhala?' da hānga. ³⁰Chiwui vang ithumwui Avāna Judahwui awunga Jehoiakimwui pongli hānga: awui khipānakha Davidwui wungpamkhongli mapampaimara; kala awui kathingun chi ngashunwui kasā eina ngayāwui phāmli horsangra. ³¹Ina ali, awui ara̱-azāli, kala awui raobingli athumwui morei kasāwui vang tandi mira, kala athumtungli, Jerusalemwui kapambingtungli, kala Judahwui mibingtungli ina athumwui pongli hānghai kalākashi saikora shokngasakra; kha athumna manganāmana."

³²Chieina Jeremiahna lairik akhalui khangatei akha khuilaga, kapime Neriahwui naomayara Baruchli mi; kala ana Jeremiahna hāngtāmamānda, Judahwui awunga Jehoiakimna mei eina chuihai lairik akhaluiwui tui saikora chi kapisang; kala hi thāda tui kachungkha lāngda chiwuitungli kapisangserhaowa.