ኤርምያስ 36

36 ¹በይሁዳ ንጉሥ በኢዮስያስ ልጅ በኢዮአቄም በአራተኛው ዓመት፣ ይህ ቃል ከአባታችን ዘንድ ወደ ኤርምያስ መጣ፦

²“ጥቅልል ውሰድ፤ በኢዮስያስ ዘመን መጀመሪያ ከተናገርሁህ ጊዜ ጀምሮ እስከ አሁን ድረስ በእስራኤል፣ በይሁዳና በሕዝቦች ሁሉ ላይ የተናገርሁህን ቃል ሁሉ በእርሱ ላይ ጻፍ። ³ምናልባት ይሁዳ ላመጣባቸው ያሰብሁትን መዓት ሁሉ ሰምተው እያንዳንዳቸው ከክፉ መንገዳቸው ይመለሱ ይሆናል፤ እኔም በደላቸውንና ኀጢአታቸውን ይቅር እላለሁ።”

⁴ኤርምያስም የኔርያን ልጅ ባሮክን ጠራው፤ ባሮክም፣ ኤርምያስ ከአፉ እየነገረው፣ አባታችን ለኤርምያስ የተናገረውን ቃል ሁሉ በጥቅልል ላይ ጻፈ። ⁵ከዚያም ኤርምያስ ባሮክን እንዲህ ብሎ አዘዘው፤ “እኔ ተከልክዬአለሁ፤ ወደ አባታችን ቤት መሄድ አልችልም። ⁶እኔ ከአፌ እየነገርሁህ የጻፍሃቸውን የአባታችንን ቃል ከጥቅልሉ ሄደህ አንብብ፤ በጦም ቀን በአባታችን ቤት ለሚሰበሰበው ሕዝብ ሁሉ፣ ከከተሞቻቸው ለሚመጡት የይሁዳ ሰዎችም ሁሉ አንብብላቸው። ⁷ምናልባት ምሕረት ለማግኘት የሚያቀርቡት ልመና ወደ አባታችን ይደርስ ይሆናል፤ እያንዳንዱም ከክፉ መንገዱ ይመለስ ይሆናል፤ አባታችን በዚህ ሕዝብ ላይ ታላቅ ቍጣ ተናግሮአልና።”

⁸የኔርያ ልጅ ባሮክም ነቢዩ ኤርምያስ ያዘዘውን ሁሉ አደረገ፤ የአባታችንን ቃል ከመጽሐፉ በአባታችን ቤት አነበበ። ⁹በይሁዳ ንጉሥ በኢዮስያስ ልጅ በኢዮአቄም በአምስተኛው ዓመት፣ በዘጠነኛው ወር፣ በኢየሩሳሌም የነበሩ ሁሉና ከይሁዳ ከተሞች የመጡ ሁሉ በአባታችን ፊት ጦም አወጁ። ¹⁰ባሮክም የኤርምያስን ቃል ከጥቅልሉ ሕዝቡ ሁሉ እንዲሰማ፣ በአባታችን ቤት፣ በጸሐፊው በሳፋን ልጅ በጎማርያ ክፍል፣ በላይኛው ግቢ፣ በአባታችን ቤት በአዲሱ በር መግቢያ አነበበ።

¹¹የሳፋን ልጅ የጎማርያ ልጅ ሚክያስ የአባታችንን ቃል ሁሉ ከጥቅልሉ በሰማ ጊዜ፣ ¹²ወደ ንጉሡ ቤት፣ ወደ ጸሐፊው ክፍል ወረደ፤ በዚያም መኳንንቱ ሁሉ ተቀምጠው ነበር፦ ጸሐፊው ኤሊሳማ፣ የሸማያ ልጅ ደላያ፣ የዐክቦር ልጅ ኤልናታን፣ የሳፋን ልጅ ጎማርያ፣ የሐናንያ ልጅ ሴዴቅያስ፣ መኳንንቱም ሁሉ ነበሩ። ¹³ሚክያስም ባሮክ ለሕዝቡ ከመጽሐፉ ባነበበ ጊዜ የሰማውን ቃል ሁሉ ነገራቸው። ¹⁴ስለዚህ መኳንንቱ ሁሉ የኩሲ ልጅ የሰለምያ ልጅ የናታንያ ልጅ ይሁዲን ወደ ባሮክ ላኩ፤ “ለሕዝቡ ያነበብኸውን ጥቅልል ይዘህ ና” አሉት። የኔርያ ልጅ ባሮክም ጥቅልሉን ይዞ ወደ እነርሱ መጣ።

¹⁵እነርሱም፣ “ተቀምጠህ አንብብልን” አሉት። ባሮክም አነበበላቸው።

¹⁶ቃሉን ሁሉ በሰሙ ጊዜ፣ እያንዳንዳቸው እየፈሩ እርስ በርሳቸው ተያዩ፤ ባሮክንም፣ “ይህን ቃል ሁሉ ለንጉሡ ልንነግረው ይገባናል” አሉት። ¹⁷ባሮክንም፣ “ይህን ቃል ሁሉ እንዴት እንደ ጻፍኸው ንገረን፤ እርሱ ከአፉ እየነገረህ ነውን?” ብለው ጠየቁት።

¹⁸ባሮክም መልሶ፣ “ይህን ቃል ሁሉ ከአፉ ነገረኝ፤ እኔም በቀለም በመጽሐፉ ጻፍሁት” አላቸው።

¹⁹ከዚያም መኳንንቱ ባሮክን፣ “አንተና ኤርምያስ ሄዳችሁ ተሰወሩ፤ ያላችሁበትን ማንም አያውቅ” አሉት።

²⁰ጥቅልሉንም በጸሐፊው በኤሊሳማ ክፍል ትተው ወደ ንጉሡ ወደ ግቢው ገቡ፤ ነገሩንም ሁሉ ነገሩት። ²¹ንጉሡም ጥቅልሉን ያመጣ ዘንድ ይሁዲን ላከ፤ እርሱም ከጸሐፊው ከኤሊሳማ ክፍል አመጣው። ይሁዲም ለንጉሡና በአጠገቡ ቆመው ለነበሩት መኳንንት ሁሉ ጮኾ አነበበው። ²²ንጉሡም በዘጠነኛው ወር በክረምት ቤት ተቀምጦ ነበር፤ በፊቱም በምድጃ ውስጥ እሳት ይነድ ነበር። ²³ይሁዲም ሦስት ወይም አራት አምዶች ባነበበ ጊዜ፣ ንጉሡ በጸሐፊ ቢላዋ እየቈረጠ ጥቅልሉ ሁሉ እስኪቃጠል ድረስ ወደ ምድጃው ውስጥ ጣለው። ²⁴ነገር ግን ይህን ቃል የሰሙት ንጉሡና ባሪያዎቹ ሁሉ አልፈሩም፤ ልብሳቸውንም አልቀደዱም። ^a a v24 ልብስ መቅደድ በእግዚአብሔር ፊት የሐዘን፣ የለቅሶ ወይም የንስሓ ባህላዊ ምልክት ነበር። ²⁵ኤልናታን፣ ደላያና ጎማርያ ንጉሡ ጥቅልሉን እንዳያቃጥል ለመኑት፤ እርሱ ግን ሊሰማቸው እምቢ አለ። ²⁶ንጉሡም የንጉሡን ልጅ ይራሕምኤልን፣ የዐዝርኤልን ልጅ ሠራያንና የዐብድኤልን ልጅ ሰለምያን ጸሐፊው ባሮክንና ነቢዩ ኤርምያስን እንዲይዟቸው አዘዘ፤ አባታችን ግን ሰወራቸው።

²⁷ንጉሡም ባሮክ ኤርምያስ ከአፉ እየነገረው የጻፈውን ቃል የያዘውን ጥቅልል ካቃጠለ በኋላ፣ የአባታችን ቃል ወደ ኤርምያስ እንዲህ ሲል መጣ፦

²⁸“ሌላ ጥቅልል ውሰድ፤ የይሁዳ ንጉሥ ኢዮአቄም ባቃጠለው በመጀመሪያው ጥቅልል የነበረውን ቃል ሁሉ በእርሱ ላይ ጻፍ። ²⁹ስለ ይሁዳ ንጉሥ ስለ ኢዮአቄም እንዲህ በል፤ አባታችን እንዲህ ይላል፦ አንተ ይህን ጥቅልል አቃጠልህ፤ ‘የባቢሎን ንጉሥ በርግጥ መጥቶ ይህችን ምድር ያጠፋል፤ ሰውንም እንስሳንም ከእርስዋ ያስወግዳል ብለህ ለምን ጻፍህ?’ ብለህም ጠየቅህ። ³⁰ስለዚህ አባታችን ስለ ይሁዳ ንጉሥ ስለ ኢዮአቄም እንዲህ ይላል፦ ከእርሱ ወገን በዳዊት ዙፋን ላይ የሚቀመጥ አይኖርም፤ በድኑም ለቀን ትኵሳትና ለሌሊት ቍር ወደ ውጭ ይጣላል። ³¹እርሱንም፣ ዘሩንም፣ ባሪያዎቹንም ስለ ኀጢአታቸው እቀጣቸዋለሁ፤ በእነርሱ ላይ፣ በኢየሩሳሌም ነዋሪዎችና በይሁዳ ሰዎች ላይ የተናገርሁትን መዓት ሁሉ አመጣባቸዋለሁ፤ እነርሱ ግን አልሰሙም።”

³²ኤርምያስም ሌላ ጥቅልል ወስዶ ለጸሐፊው ለኔርያ ልጅ ለባሮክ ሰጠው፤ እርሱም የይሁዳ ንጉሥ ኢዮአቄም በእሳት ያቃጠለውን የጥቅልሉን ቃል ሁሉ ኤርምያስ ከአፉ እየነገረው ጻፈ፤ ከእነዚያም ጋር የሚመሳሰል ብዙ ቃል ተጨመረባቸው።