ኤርምያስ 37

37 ¹የባቢሎን ንጉሥ ናቡከደነፆር በይሁዳ ምድር ያነገሠው የኢዮአቄም ልጅ ኮንያ በነገሠበት ፈንታ የኢዮስያስ ልጅ ሴዴቅያስ ነገሠ። ²እርሱም ሆነ ባሪያዎቹ ወይም የምድሪቱ ሕዝብ አባታችን በነቢዩ በኤርምያስ በኩል የተናገረውን ቃል አልሰሙም።

³ንጉሡ ሴዴቅያስም የሴሌምያስን ልጅ ዮዋካልንና የካህኑን የመዓሤያስን ልጅ ሶፎንያስን ወደ ነቢዩ ኤርምያስ ላከ፤ “እባክህ ስለ እኛ ወደ አባታችን ጸልይ” አላቸው።

⁴ኤርምያስም ገና ወደ ሕዝቡ መካከል እየመጣና እየሄደ ነበር፤ ገና አላሰሩትም ነበር። ⁵የፈርዖን ሰራዊት ከግብፅ ዘምቶ ነበር፤ ኢየሩሳሌምን የከበቧት ባቢሎናውያን ይህን በሰሙ ጊዜ ከኢየሩሳሌም ራቁ።

⁶የአባታችንም ቃል ወደ ነቢዩ ኤርምያስ እንዲህ ሲል መጣ፤

⁷የእስራኤል አባታችን እንዲህ ይላል፤ ይጠይቀኝ ዘንድ የላከህን የይሁዳን ንጉሥ እንዲህ በለው፦ ሊረዳችሁ ዘምቶ የወጣው የፈርዖን ሰራዊት ወደ ገዛ ምድሩ ወደ ግብፅ ይመለሳል። ⁸ከዚያም ባቢሎናውያን ተመልሰው ይህችን ከተማ ይወጓታል፤ ይማርኩአትም፤ በእሳትም ያቃጥሉአታል።

⁹አባታችን እንዲህ ይላል፤ “ባቢሎናውያን በእርግጥ ይተውናል” ብላችሁ ራሳችሁን አታታሉ፤ አይተዉምና። ¹⁰የሚወጓችሁን የባቢሎናውያንን ሰራዊት በሙሉ ብትመቱትና በድንኳናቸው ውስጥ የቈሰሉ ሰዎች ብቻ ቢቀሩ እንኳ፣ እነርሱ ተነሥተው ይህችን ከተማ በእሳት ያቃጥሉአታል።

ኤርምያስ ተይዞ ታሰረ

¹¹የባቢሎናውያን ሰራዊት ከፈርዖን ሰራዊት የተነሣ ከኢየሩሳሌም በራቀ ጊዜ፣ ¹²ኤርምያስ በሕዝቡ መካከል እዚያ ያለውን ድርሻውን ሊወስድ ከኢየሩሳሌም ወደ ብንያም ምድር ወጣ። ¹³በብንያም በር ላይ የጠባቂዎች አለቃ የሐናንያስ ልጅ የሴሌምያስ ልጅ ኤርያስ ነቢዩን ኤርምያስን ያዘው፤ “ወደ ባቢሎናውያን ኰብልለህ ልትሄድ ነው!” አለው።

¹⁴ኤርምያስም፣ “ሐሰት ነው! ወደ ባቢሎናውያን ኰብልዬ አልሄድም” አለ። ነገር ግን ኤርያስ ሳይሰማው ኤርምያስን ይዞ ወደ መኳንንቱ ወሰደው።

¹⁵መኳንንቱም በኤርምያስ ተቈጥተው ደበደቡት፤ እስር ቤት ባደረጉት በጸሐፊው በዮናታን ቤትም አሰሩት።

¹⁶እንዲህም ኤርምያስ ወደ ጕድጓዱ ማዕከላዊ ክፍሎች ገባ፤ በዚያም ብዙ ቀን ቈየ። ¹⁷ከዚያም ንጉሡ ሴዴቅያስ ልኮ አስመጣው። ንጉሡም በቤተ መንግሥቱ ውስጥ በስውር ጠየቀው፤ “ከአባታችን ዘንድ ቃል አለ?” ብሎም ጠየቀው። ኤርምያስም፣ “አለ፤ በባቢሎን ንጉሥ እጅ ትሰጣለህ” አለ።

¹⁸ኤርምያስም ንጉሡን ሴዴቅያስን እንዲህ ጠየቀው፤ “እንድታስረኝ በአንተ ላይ ወይም በባሪያዎችህ ላይ ወይም በዚህ ሕዝብ ላይ ምን በደልሁ? ¹⁹‘የባቢሎን ንጉሥ በእናንተ ላይ ወይም በዚህ ምድር ላይ አይመጣም’ ብለው ትንቢት የተናገሩ ነቢያትህ አሁን ወዴት አሉ? ²⁰ጌታዬ ንጉሥ ሆይ፣ እባክህ ስማኝ፤ ልመናዬ ወደ አንተ ይድረስ፤ እዚያ እንዳልሞት ወደ ጸሐፊው ወደ ዮናታን ቤት አትመልሰኝ” አለ።

²¹ንጉሡ ሴዴቅያስም አዘዘ፤ ኤርምያስንም በጠባቂዎች ቅጥር ግቢ ውስጥ አኖሩት፤ በከተማዪቱ እንጀራ እስኪያልቅ ድረስ በየቀኑ ከኅብስት ጋጋሪዎች መንገድ አንዳንድ እንጀራ ይሰጡት ነበር። እንዲህም ኤርምያስ በጠባቂዎች ቅጥር ግቢ ውስጥ ቈየ።