ኤርምያስ 38

38 ¹የማታን ልጅ ሰፋጥያ፣ የጳስኮር ልጅ ጎዶልያ፣ የሰሌምያ ልጅ ዩካል፣ የመልክያም ልጅ ጳስኮር ኤርምያስ ለሕዝቡ ሁሉ ሲናገር ሰሙ፤

²“አባታችን እንዲህ ይላል፤ በዚህች ከተማ የሚቀር ሁሉ በሰይፍ፣ በራብና በቸነፈር ይሞታል፤ ለባቢሎናውያን እጁን የሚሰጥ ግን በሕይወት ይኖራል፤ ነፍሱንም እንደ ምርኮ አግኝቶ በሕይወት ይተርፋል። ³አባታችን እንዲህ ይላል፤ ይህች ከተማ በእርግጥ ለባቢሎን ንጉሥ ሰራዊት ትሰጣለች፤ እርሱም ይይዛታል።”

⁴መኳንንቱም ንጉሡን እንዲህ አሉት፤ “ይህ ሰው ይገደል። እንዲህ ያሉ ቃላት በዚህች ከተማ የቀሩትን ወታደሮች እጆችና የሕዝቡን ሁሉ እጆች ያዳክማሉና። ይህ ሰው መልካማቸውን ሳይሆን ጕዳታቸውን ይፈልጋል።”

⁵ንጉሡ ሴዴቅያስም እንዲህ አለ፤ “እነሆ፣ እርሱ በእጃችሁ ነው፤ ንጉሡ የሚቃወማችሁ ምንም ሊያደርግ አይችልም።”

⁶ኤርምያስንም ወስደው በጥበቃው ግቢ ውስጥ ወዳለው ወደ ንጉሡ ልጅ ወደ መልክያ ጕድጓድ ጣሉት፤ በገመድም አወረዱት። ጕድጓዱም ውሃ አልነበረውም፤ ጭቃ ብቻ ነበረ፤ ኤርምያስም በጭቃው ውስጥ ሰጠመ።

⁷ዳሩ ግን አቤሜሌክ የተባለ ኢትዮጵያዊ የቤተ መንግሥት ሹም ኤርምያስን በጕድጓዱ ውስጥ እንዳደረጉት ሰማ። ንጉሡም በብንያም በር ተቀምጦ ሳለ፣ ⁸አቤሜሌክ ከቤተ መንግሥቱ ወጥቶ ንጉሡን እንዲህ አለው፤ ⁹“ጌታዬ ንጉሥ ሆይ፣ እነዚህ ሰዎች ነቢዩን ኤርምያስን በፈጸሙበት ሁሉ ክፉ አድርገዋል፤ በከተማዪቱ ውስጥ እንጀራ ከእንግዲህ ስለሌለ በጕድጓዱ ውስጥ ጥለውታል፤ በዚያም በራብ ይሞታል።”

¹⁰ንጉሡም ኢትዮጵያዊውን አቤሜሌክን እንዲህ ብሎ አዘዘው፤ “ከዚህ ሠላሳ ሰዎች ይዘህ ነቢዩን ኤርምያስን ሳይሞት ከጕድጓዱ አውጣው።”

¹¹አቤሜሌክም ሰዎቹን ይዞ ወደ ቤተ መንግሥቱ፣ ከመዝገብ ቤቱ በታች ወዳለው ክፍል ገባ፤ አሮጌ ጨርቆችንና የተቀደዱ ልብሶችን ወስዶ በገመድ በጕድጓዱ ውስጥ ላለው ለኤርምያስ አወረደለት። ¹²ኢትዮጵያዊው አቤሜሌክም ኤርምያስን እንዲህ አለው፤ “እነዚህን የተቀደዱ ጨርቆችና ልብሶች ከገመዱ በታች ከብብትህ ሥር አድርግ።” ኤርምያስም እንዲሁ አደረገ። ¹³ኤርምያስንም በገመድ ከጕድጓዱ ሳቡት፤ ኤርምያስም በጥበቃው ግቢ ውስጥ ቀረ።

ንጉሡ የአብን ቃል ሰማ

¹⁴ንጉሡ ሴዴቅያስም ልኮ ነቢዩን ኤርምያስን አስመጣው፤ በአባታችን ቤት ወዳለው ወደ ሦስተኛው መግቢያም አስገባው። ንጉሡም ኤርምያስን እንዲህ አለው፤ “አንድ ነገር እጠይቅሃለሁ፤ ከእኔ ምንም አትሰውርብኝ።”

¹⁵ኤርምያስም ሴዴቅያስን እንዲህ አለው፤ “ብነግርህ፣ አትገድለኝምን? ብመክርህም አትሰማኝም።”

¹⁶ንጉሡ ሴዴቅያስም በስውር ለኤርምያስ እንዲህ ብሎ ማለለት፤ “ይህችን ነፍስ የፈጠረልን አባታችን ሕያው እንደ ሆነ፣ አልገድልህም፤ ነፍስህንም ለሚፈልጉ ለእነዚህ ሰዎች አሳልፌ አልሰጥህም።”

¹⁷ኤርምያስም ሴዴቅያስን እንዲህ አለው፤ “የሰማይ ሠራዊት አባት፣ የእስራኤል አባት እንዲህ ይላል፤ ለባቢሎን ንጉሥ መኳንንት እጅህን ብትሰጥ፣ ነፍስህ ትድናለች፤ ይህችም ከተማ በእሳት አትቃጠልም፤ አንተና ቤተሰብህም በሕይወት ትኖራላችሁ። ¹⁸ለባቢሎን ንጉሥ መኳንንት እጅህን ለመስጠት ብትቢ ግን፣ ይህች ከተማ ለባቢሎናውያን ትሰጣለች፤ እነርሱም ያቃጥሏታል፤ አንተም ከእጃቸው አታመልጥም።”

¹⁹ንጉሡ ሴዴቅያስም ኤርምያስን እንዲህ አለው፤ “ወደ ባቢሎናውያን የኰበለሉትን አይሁድ እፈራለሁ፤ ለእነርሱ አሳልፈው ሰጥተውኝ እንዳያንገላቱኝ እፈራለሁ።”

²⁰ኤርምያስም እንዲህ አለ፤ “አሳልፈው አይሰጡህም። እንደነገርኩህ የአባታችንን ድምፅ ስማ፤ መልካም ይሆንልሃል፤ ነፍስህም ትድናለች። ²¹እጅህን ለመስጠት ብትቢ ግን፣ አባታችን ያሳየኝ ቃል ይህ ነው፤

²²“እነሆ! በይሁዳ ንጉሥ ቤተ መንግሥት የቀሩት ሴቶች ሁሉ ወደ ባቢሎን ንጉሥ መኳንንት ይወጣሉ፤ እነርሱም እንዲህ ይላሉ፤ ‘የታመኑ ወዳጆችህ አሳሳቱህ፤ አሸነፉህም፤ እግሮችህ በጭቃ ውስጥ ሰጠሙ፤ እነርሱም ጀርባቸውን መለሱብህ።’”

²³“ሚስቶችህና ልጆችህ ሁሉ ወደ ባቢሎናውያን ይወሰዳሉ፤ አንተም ከእጃቸው አታመልጥም፤ ነገር ግን በባቢሎን ንጉሥ እጅ ትያዛለህ፤ ይህችም ከተማ በእሳት ትቃጠላለች።”

²⁴ሴዴቅያስም ኤርምያስን እንዲህ አለው፤ “ስለዚህ ንግግር ማንም አያውቅ፤ አለዚያ ትሞታለህ። ²⁵መኳንንቱ ከአንተ ጋራ እንደ ተነጋገርኩ ሰምተው ወደ አንተ መጥተው፣ ‘ለንጉሡ የተናገርከውን፣ ንጉሡም ለአንተ የተናገረህን ንገረን፤ ከእኛ ምንም አትሰውር፤ አለዚያ እንገድልሃለን’ ቢሉህ፣ ²⁶እንዲህ በላቸው፤ ‘በዮናታን ቤት እንዳልሞት ንጉሡ ወደዚያ እንዳይመልሰኝ እለምነው ነበር።’”

²⁷መኳንንቱም ሁሉ ወደ ኤርምያስ መጥተው ጠየቁት፤ እርሱም ንጉሡ ባዘዘው መሠረት በትክክል መለሰላቸው። ስለዚህ ዝም አሉ፤ ንግግሩ አልተሰማምና። ²⁸ኤርምያስም ኢየሩሳሌም እስከ ተያዘችበት ቀን ድረስ በጥበቃው ግቢ ውስጥ ቀረ። ኢየሩሳሌም በወደቀችም ጊዜ ሁኔታው እንዲህ ነበረ።