Irmiya 38 FHB Father's Heart Bible™

38 ¹Shefatiya ɗan Mattan, da Gedaliya ɗan Fashhur, da Yukal ɗan Shelemiya, da Fashhur ɗan Malkiya suka ji Irmiya yana gaya wa dukan mutane,

²“Ga abin da Ubanmu ya ce, duk wanda ya tsaya a cikin birnin nan zai mutu ta wurin takobi, da yunwa, da annoba, amma duk wanda ya miƙa kansa ga Babiloniyawa zai rayu, ya kuma ceci ransa kamar ganima. ³Ga abin da Ubanmu ya ce, lalle za a bashe birnin nan ga sojojin sarkin Babila, zai kuma ƙwace shi.”

⁴Sai shugabannin suka ce wa sarki, “A kashe mutumin nan. Kalmomi irin waɗannan suna raunana hannuwan sojojin da suka rage a birnin nan, da na dukan mutane. Ba yana neman amfaninsu ba ne, sai dai cutarsu.”

⁵Sarki Zadokiya ya ce, “Ga shi, yana hannunku; sarki ba zai iya yin kome game da ku ba.”

⁶Sai suka ɗauki Irmiya suka jefa shi cikin rijiyar Malkiya ɗan sarki, da take cikin harabar masu gadi, suna saukar da shi da igiyoyi. Rijiyar ba ta da ruwa, sai laka kaɗai, Irmiya kuwa ya nutse cikinta.

⁷Amma Ebed-Melek Bakushe, wani shugaba a fada, ya ji cewa sun sa Irmiya cikin rijiyar. Yayinda sarki yake zaune a Ƙofar Benyamin, ⁸sai Ebed-Melek ya fita daga fada ya yi magana da sarki, ya ce, ⁹“Ranka yă daɗe, ya sarki, waɗannan mutane sun yi mugunta cikin dukan abin da suka yi wa annabi Irmiya, da suka jefa shi cikin rijiya domin yă mutu da yunwa, tun da yake babu sauran burodi a birnin.”

¹⁰Sarki ya umarci Ebed-Melek Bakushe, ya ce, “Ka ɗauki mutane talatin daga nan tare da kai, ka ɗago annabi Irmiya daga rijiyar kafin yă mutu.”

¹¹Sai Ebed-Melek ya ɗauki mutanen, ya tafi fada, zuwa wani ɗaki da yake ƙarƙashin ma'ajiyar, ya ɗebo tsofaffin tsummoki da yagaggun tufafi, ya saukar musu da igiyoyi zuwa ga Irmiya cikin rijiyar. ¹²Ebed-Melek Bakushe ya ce wa Irmiya, “Ka sa yagaggun tsummoki da tufafin nan ƙarƙashin hammatarka, ƙasa da igiyoyin.” Irmiya kuwa ya yi haka. ¹³Sai suka jā Irmiya suka fitar da shi daga rijiyar da igiyoyi; Irmiya kuwa ya zauna a harabar masu gadi.

Sarki Ya Ji Maganar Uba

¹⁴Sa'an nan Sarki Zadokiya ya aika a kira annabi Irmiya, aka kuwa kawo shi zuwa mashigi na uku na gidan Ubanmu. Sarki ya ce wa Irmiya, “Zan tambaye ka wani abu; kada ka ɓoye mini kome.”

¹⁵Irmiya ya ce wa Zadokiya, “In na gaya maka, ba za ka kashe ni ba? In kuma na ba ka shawara, ba za ka saurara ba.”

¹⁶Sai Sarki Zadokiya ya rantse wa Irmiya a ɓoye, ya ce, “Muddin Ubanmu yana a raye, shi da ya yi mana wannan rai, ba zan kashe ka ba, ba kuwa zan bashe ka ga mutanen nan da suke neman ranka ba.”

¹⁷Irmiya ya ce wa Zadokiya, “Ga abin da Uba na rundunonin sama, Uban Isra'ila ya ce, in ka miƙa kanka ga shugabannin sarkin Babila, za a tsare ranka, ba kuwa za a ƙone birnin nan da wuta ba, kai da iyalinka kuma za ku rayu. ¹⁸Amma in ka ƙi miƙa kanka ga shugabannin sarkin Babila, za a bashe birnin nan ga Babiloniyawa, su kuwa za su ƙone shi, kai kuma ba za ka tsere musu ba.”

¹⁹Sarki Zadokiya ya ce wa Irmiya, “Ina tsoron Yahudawan da suka gudu zuwa ga Babiloniyawa; wataƙila a bashe ni gare su domin su wulaƙanta ni.”

²⁰Irmiya ya ce, “Ba za a bashe ka ba. Ka yi biyayya ga muryar Ubanmu yadda na gaya maka, domin kome yă yi maka kyau, a kuma tsare ranka. ²¹Amma in ka ƙi miƙa kanka, ga maganar da Ubanmu ya nuna mini,

²²“Ga shi! Za a fito da dukan matan da suka rage a fadar sarkin Yahuda zuwa ga shugabannin sarkin Babila, su kuwa za su ce, ‘Amintattun abokanka sun ruɗe ka, sun kuma rinjaye ka; ƙafafunka suka nutse cikin laka, su kuma suka juya maka baya.’”

²³“Za a kai dukan matanka da 'ya'yanka ga Babiloniyawa, kai kuwa ba za ka tsere daga hannunsu ba, sai dai sarkin Babila yă kama ka, a kuma ƙone birnin nan da wuta.”

²⁴Sa'an nan Zadokiya ya ce wa Irmiya, “Kada wani yă san zancen nan, in ba haka ba za ka mutu. ²⁵In shugabannin suka ji na yi magana da kai, suka kuwa zo suna cewa, ‘Gaya mana abin da ka faɗa wa sarki da kuma abin da ya faɗa maka; kada ka ɓoye mana kome, in ba haka ba za mu kashe ka,’ ²⁶sai ka ce musu, ‘Ina roƙon sarki kada yă mayar da ni gidan Yonatan in mutu a can.’”

²⁷Sai dukan shugabannin suka zo suka tambayi Irmiya, shi kuwa ya amsa musu daidai yadda sarki ya umarce shi. Sai suka daina, gama ba a ji zancen ba. ²⁸Irmiya kuwa ya zauna a harabar masu gadi har ranar da aka ƙwace Urushalima. Haka kuwa lamarin yake sa'ad da Urushalima ta fāɗi.