Fāɗuwar Urushalima
Kewayen ya ƙare. Garun ya tsage, Zedekiya ya gudu aka kama shi, ya ga yadda aka kashe 'ya'yansa, sa'an nan aka makantar da shi aka ɗaure shi da sarƙoƙi. Birnin ya ƙone, aka bar wa matalauta gonaki. Aka saki Irmiya bisa umarnin Nebukadnezzar da kansa; Ubanmu ya yi wa Ebed-Melek alkawarin ransa domin ya dogara gare shi.
39 1A shekara ta tara ta mulkin Zadkiya sarkin Yahuda, a wata na goma, sai Nebukadnezzar sarkin Babila ya zo da dukan rundunarsa ya yaƙi Urushalima, ya kuma kewaye ta. 2A shekara ta goma sha ɗaya ta mulkin Zadkiya, a wata na huɗu, a rana ta tara ga watan, sai aka huda birnin. 3Sai dukan shugabannin sarkin Babila suka zo suka zauna a Ƙofar Tsakiya: Nergal-Sharezer, Samgar-Nebo, Sarsekim shi ne Rab-saris, Nergal-Sharezer shi ne Rab-mag, da sauran shugabannin sarkin Babila. a a v3 Rab-saris da Rab-mag manyan laƙabu ne a cikin shugabannin fādar sarkin Babila. 4Da Zadkiya sarkin Yahuda da dukan sojoji suka gan su, sai suka gudu daga birnin da dare ta gonar sarki, ta ƙofar da take tsakanin katanga biyu; ya kuma nufi hanyar Araba. 5Amma rundunar Babila ta runtume su, ta kuma kama Zadkiya a filayen Yariko. Suka kama shi, suka kai shi wurin Nebukadnezzar sarkin Babila a Ribla a ƙasar Hamat, inda ya yanke masa hukunci. 6Sarkin Babila ya yanka 'ya'yan Zadkiya maza a Ribla a idanunsa, ya kuma yanka dukan manyan Yahuda. 7Sa'an nan ya makanta Zadkiya, ya kuma daure shi da sarƙoƙin tagulla domin yă kai shi Babila.
8Babiloniyawa suka ƙone fādar sarki da gidajen mutane da wuta, suka kuma rushe katangar Urushalima. 9Nebuzaradan, shugaban masu tsaro, ya kwashe zuwa Babila sauran mutanen da suka ragu a birnin, da waɗanda suka gudu suka bi shi, da sauran mutanen da suka ragu. 10Amma Nebuzaradan, shugaban masu tsaro, ya bar waɗansu daga cikin matalauta, waɗanda ba su da kome, a ƙasar Yahuda, ya kuma ba su gonakin inabi da gonaki a wannan rana.
11Yanzu Nebukadnezzar sarkin Babila ya riga ya ba da umarni game da Irmiya ta hannun Nebuzaradan, shugaban masu tsaro, yana cewa, 12“Ka ɗauke shi ka kula da shi; kada ka cuce shi, sai dai ka yi masa duk abin da ya roƙa.”
13Saboda haka Nebuzaradan shugaban masu tsaro ya aika da saƙo, tare da Nebushazban Rab-saris, da Nergal-Sharezer Rab-mag, da dukan manyan shugabannin sarkin Babila. 14Suka fito da Irmiya daga filin masu tsaro, suka ba da shi ga Gedaliya ɗan Ahikam, ɗan Shafan, domin yă kai shi gida. Saboda haka ya zauna a cikin mutane.
15Maganar Ubanmu ta zo wa Irmiya tun yana tsare a filin masu tsaro, cewa,
16“Ka tafi ka gaya wa Ebed-Melek Bakushe: Ga abin da Uba na rundunonin Sama, Uban Isra'ila, yake cewa, Ga shi, zan kawo kalmomina a kan birnin nan domin masifa, ba domin alheri ba, kuma a ranar nan za su cika a gabanka. 17Amma zan cece ka a ranar nan, in ji Ubanmu; ba kuwa za a bashe ka ga mutanen da kake tsoro ba. 18Zan cece ka; ba za ka fāɗi ta takobi ba. Ranka zai zama ganimarka, domin ka dogara gare ni, in ji Ubanmu.”