ኤርምያስ 39

39 ¹የይሁዳ ንጉሥ ሴዴቅያስ በነገሠ በዘጠነኛው ዓመት በዐሥረኛው ወር የባቢሎን ንጉሥ ናቡከደነፆር ከሠራዊቱ ሁሉ ጋራ ወደ ኢየሩሳሌም መጥቶ ከበባት። ²ሴዴቅያስ በነገሠ በዐሥራ አንደኛው ዓመት በአራተኛው ወር ከወሩም በዘጠነኛው ቀን ከተማይቱ ተደፈረች። ³የባቢሎንም ንጉሥ መኳንንት ሁሉ መጥተው በመካከለኛው በር ተቀመጡ፤ እነርሱም ኔርጋል ሳራአሶር፣ ሳምጋርኔቦ፣ ረብሳሪስ ሳርሳኪም፣ ረብማግ ኔርጋል ሳራአሶርና የባቢሎን ንጉሥ ቀሪዎቹ መኳንንት ነበሩ። ^a a v3 ረብሳሪስና ረብማግ በባቢሎን ንጉሣዊ ባለ ሥልጣኖች መካከል ከፍተኛ የማዕረግ ስሞች ነበሩ። ⁴የይሁዳ ንጉሥ ሴዴቅያስና ተዋጊዎቹ ሁሉ ባዩአቸው ጊዜ፣ በሌሊት በንጉሡ አትክልት መንገድ በሁለቱ ቅጥሮች መካከል ባለው በር ከከተማይቱ ሸሹ፤ እርሱም ወደ ዓረባ ወጣ። ⁵የባቢሎን ሠራዊት ግን አሳደዳቸው፤ ሴዴቅያስንም በኢያሪኮ ሜዳ ያዙት። ይዘውም በሐማት ምድር ወዳለው ወደ ሬብላ ወደ ባቢሎን ንጉሥ ወደ ናቡከደነፆር ወሰዱት፤ እርሱም ፍርድ ፈረደበት። ⁶የባቢሎንም ንጉሥ በሬብላ የሴዴቅያስን ልጆች በዓይኑ ፊት አረዳቸው፤ የይሁዳንም መኳንንት ሁሉ አረደ። ⁷ከዚያም የሴዴቅያስን ዓይኖች አወጣ፤ ወደ ባቢሎንም ሊወስደው በናስ ሰንሰለት አሰረው።

⁸ባቢሎናውያንም የንጉሡን ቤትና የሕዝቡን ቤቶች በእሳት አቃጠሉ፤ የኢየሩሳሌምንም ቅጥሮች አፈረሱ። ⁹የዘበኞች አለቃ ነቡዛራዳን በከተማይቱ የቀሩትን ቀሪዎች ሕዝብ፣ ወደ እርሱ የኮበለሉትንና ቀሪዎቹን ሕዝብ ወደ ባቢሎን አፈለሰ። ¹⁰የዘበኞች አለቃ ነቡዛራዳን ግን ምንም ከሌላቸው ከድኾች ሕዝብ አንዳንዶቹን በይሁዳ ምድር ተወ፤ በዚያም ቀን የወይን ቦታዎችንና እርሻዎችን ሰጣቸው።

¹¹የባቢሎን ንጉሥ ናቡከደነፆር ስለ ኤርምያስ በዘበኞች አለቃ በነቡዛራዳን እጅ እንዲህ ብሎ አዝዞ ነበር፤ ¹²“ውሰደውና ተንከባከበው፤ ምንም ክፉ ነገር አታድርግበት፤ የሚለምንህን ሁሉ ግን አድርግለት።”

¹³ስለዚህ የዘበኞች አለቃ ነቡዛራዳን ከረብሳሪስ ነቡሻዝባን፣ ከረብማግ ኔርጋል ሳራአሶርና ከባቢሎን ንጉሥ ከፍተኛ መኳንንት ሁሉ ጋራ ሰው ላኩ፤ ¹⁴ኤርምያስንም ከዘበኞች አደባባይ አስመጥተው ወደ ቤት ይወስደው ዘንድ ለሳፋን ልጅ ለአኪቃም ልጅ ለጎዶልያስ ሰጡት። እርሱም በሕዝቡ መካከል ተቀመጠ።

¹⁵ኤርምያስ በዘበኞች አደባባይ ታስሮ ሳለ የአባታችን ቃል እንዲህ ሲል ወደ እርሱ መጣ፤

¹⁶“ሄደህ ኩሻዊውን አቤሜሌክን እንዲህ በለው፤ የሰማይ ሠራዊት አባት፣ የእስራኤል አባት እንዲህ ይላል፤ እነሆ፣ ቃሌን በዚህች ከተማ ላይ ለክፉ እንጂ ለበጎ አላመጣም፤ በዚያም ቀን በፊትህ ይፈጸማሉ። ¹⁷በዚያ ቀን ግን አድንሃለሁ፤ ይላል አባታችን፤ ለምትፈራቸውም ሰዎች አትሰጥም። ¹⁸በእርግጥ አድንሃለሁ፤ በሰይፍም አትወድቅም። በእኔ ታምነሃልና ነፍስህ ለአንተ የጦርነት ምርኮ ትሆንልሃለች፤ ይላል አባታችን።”