耶利米書 39

39 ¹猶大王西底家在位第九年十月,巴比倫王尼布甲尼撒率領佢全部軍隊嚟攻打耶路撒冷,圍困呢座城。 ²西底家在位第十一年四月初九,城牆就俾人攻破喇。 ³ 跟住,巴比倫王嘅眾官員全部入嚟,坐喺中門:有尼甲‧沙利薛、三甲‧尼波、拉撒力撒西金、拉墨尼甲‧沙利薛,同埋巴比倫王其餘嘅官員。 ^a a v3 「拉撒力」同「拉墨」係巴比倫王室官員之中嘅高級銜頭。 ⁴猶大王西底家同埋所有士兵見到佢哋,就趁夜晚經王嘅花園、兩道城牆之間嘅門,逃離呢座城;佢向住亞拉巴嗰邊走出去。 ⁵但係巴比倫軍隊追住佢哋,喺耶利哥平原捉到西底家。佢哋擒住佢,將佢帶去哈馬地嘅利比拉,見巴比倫王尼布甲尼撒,王喺嗰度審判佢。 ⁶巴比倫王喺利比拉,當住西底家眼前殺咗佢啲仔,又殺晒猶大所有貴族。 ⁷跟住佢弄瞎咗西底家嘅眼,用銅鏈鎖住佢,要帶佢去巴比倫。

⁸巴比倫人放火燒咗王宮同埋百姓嘅房屋,又拆毀耶路撒冷嘅城牆。 ⁹護衛長尼布撒拉旦將城裏面剩低嘅人、投降歸順佢嗰啲人,連同其餘剩低嘅百姓,全部擄去巴比倫。 ¹⁰護衛長尼布撒拉旦留低啲最窮、一無所有嘅人喺猶大地,嗰日仲畀咗葡萄園同田地佢哋。

¹¹巴比倫王尼布甲尼撒曾經藉住護衛長尼布撒拉旦,就耶利米嘅事下令,話: ¹²「你帶佢去,好好照顧佢,唔好傷害佢,佢想點你就點做。」

¹³於是護衛長尼布撒拉旦傳話,同拉撒力尼布沙斯班、拉墨尼甲‧沙利薛,以及巴比倫王所有高官, ¹⁴打發人將耶利米由護衛兵嘅院子帶出嚟,交畀沙番嘅孫、亞希甘嘅仔基大利,帶佢返屋企。噉樣佢就住喺百姓中間。

¹⁵耶米仲被囚喺護衛兵院子嘅時候,我哋嘅父嘅話臨到佢,話:

¹⁶「你去話畀古實人以伯‧米勒聽:天軍嘅父、以色列嘅父噉講:我就快要應驗我對呢座城所講嘅話,係降禍,唔係賜福,到嗰日呢啲話就要喺你眼前成就。 ¹⁷但係到嗰日我必拯救你,我哋嘅父噉宣告;你唔會俾人交去你所懼怕嗰班人手裏面。 ¹⁸我必拯救你;你唔會死喺刀下。你嘅性命必成為你嘅戰利品,因為你信靠我,我哋嘅父噉宣告。」