Kugwa kwa Yerusalemi
Kuzungulirwa kwa nzinda kwamala. Linga yaphwanyika, Zedekiya athawa mbaphatwa, aona anace akuphwa, mbakolowolwa maso mbamangwa na maunyolo. Nzinda upswa, na anthu akusauka asiyirwa minda. Yeremiya asudzulwa na ntemo wa Nabukodonozori mwenekaco; Baba wathu apikira Ebedi-Meleki umaso wace thangwi am'nyindira.
39 1Mu caka cacipfemba ca utongi wa Zedhekiya mambo wa Yuda, mu mwezi wakhumi, Nebhukadhinezari mambo wa Bhabhilonya abwera na anyankhondo ace onsene toera kumenyana na Yerusalemi, mbauzungulira. 2Mu caka cakhumi na cibodzi ca Zedhekiya, mu mwezi wacinai, pa ntsiku yacipfemba ya mwezi, nzinda wabooleswa. 3Na tenepo akulu onsene a mambo wa Bhabhilonya abwera mbakhala pansi pa Nsuwo wa Nkati: Nerigali-Xarezeri, Samigari-Nebho, Sarisekimi Rabhi-sarisi, Nerigali-Xarezeri Rabhi-magi, na akulu anango onsene a mambo wa Bhabhilonya. a a v3 Rabhi-sarisi na Rabhi-magi akhali madzina a mbiri pakati pa akulu a umambo wa Bhabhilonya. 4Zedhekiya mambo wa Yuda na anyankhondo onsene pidaaona iwo, athawa m'nzinda n'cidima mbapita munda wa mambo, pa nsuwo uli pakati pa makhoma mawiri; iye abuluka mbaenda kuelekera ku Arabha. 5Mbwenye anyankhondo a Bhabhilonya aathamangira mbaphata Zedhekiya pa maplanu a Yeriko. Amphata mbamuendesa kuna Nebhukadhinezari mambo wa Bhabhilonya ku Ribhila mu dziko ya Hamati, kudantongera iye. 6Mambo wa Bhabhilonya apha ana a Zedhekiya ku Ribhila pamaso pace, mbapha akulu onsene a Yuda. 7Buluka penepo, abulusa maso a Zedhekiya mbamumanga na maunyolo a nkuwa toera kumuendesa ku Bhabhilonya.
8Anthu a Bhabhilonya apisa nyumba ya mambo na nyumba za mbumba na moto, mbagwesa makhoma a Yerusalemi. 9Nebhuzaradhani, nkulu wa anyakuonera, aendesa ku ukapolo ku Bhabhilonya anthu akusala mu nzinda, pabodzi na ale adathawa mbaenda kuna iye, na anthu anango onsene adasala. 10Mbwenye Nebhuzaradhani, nkulu wa anyakuonera, asiya mu Yuda anthu anango akucepa kakamwe, adakhonda kukhala na cinthu, mbaapasa minda ya mauva na minda inango pa ntsiku ineyi.
11Nebhukadhinezari mambo wa Bhabhilonya akhadapereka matongero thangwi ya Yeremiya kubulukira kuna Nebhuzaradhani, nkulu wa anyakuonera, mbalonga tenepa: 12“Mun'kwate mbamuonera mwadidi; lekani kuncitira pyakuipa, mbwenye citani pyonsene pinaphemba iye.”
13Na tenepo Nebhuzaradhani nkulu wa anyakuonera atumiza mphangwa, pabodzi na Nebhuxazibhani Rabhi-sarisi, na Nerigali-Xarezeri Rabhi-magi, na akulu onsene a mambo wa Bhabhilonya. 14Abulusa Yeremiya n'bwalo wa anyakuonera mbampereka kuna Gedhaliya mwana wa Ahikamu, mwana wa Safani, toera kumuendesa kunyumba. Na tenepo iye akhala pakati pa mbumba.
15Fala ya Baba wathu yabwera kuna Yeremiya mu ndzidzi ukhali iye wakutsekerwa n'bwalo wa anyakuonera, mbilonga:
16“Ndoko ukapange Ebhedhi-Meleki Mukuxi: Baba wa anyankhondo a kudzulu, Baba wa Izarayeli, asalonga tenepa: Ine ndinabweresa mafala anga kuthimbana na nzinda uno toera kuucitira pyakuipa, tayu pyadidi, pa ntsiku ineyi anadzakwanirisika pamaso pako. 17Mbwenye Ine ndinakupulumusa pa ntsiku ineyi, asalonga Baba wathu; iwe nkhabe kudzaperekwa m'manja mwa amuna ale unagopa iwe. 18Ine ndinakupulumusa; iwe nkhabe kudzagwa na supada. Umaso wako unadzakhala ninga cakupambwa cako m'nkhondo, thangwi wakhulupira Ine, asalonga Baba wathu.”
