எரேமியா 39

39 ¹யூதாவின் ராஜாவாகிய சிதேக்கியாவின் ஒன்பதாம் வருடம், பத்தாம் மாதத்தில், பாபிலோன் ராஜாவாகிய நேபுகாத்நேச்சார் தன் சேனையனைத்தோடும் எருசலேமுக்கு விரோதமாய் வந்து அதை முற்றுகையிட்டான். ²சிதேக்கியாவின் பதினொன்றாம் வருடம், நான்காம் மாதம், அந்த மாதத்தின் ஒன்பதாம் தேதியில், நகரம் உடைக்கப்பட்டு உட்புகப்பட்டது. ³அப்பொழுது பாபிலோன் ராஜாவின் பிரபுக்கள் அனைவரும் வந்து நடுவாசலில் உட்கார்ந்தார்கள்: நேர்கல்-சரேத்சேர், சம்கார்-நேபோ, ரப்சாரீஸ் என்னும் சர்செகீம், ரப்மாக் என்னும் நேர்கல்-சரேத்சேர், மற்றும் பாபிலோன் ராஜாவின் மற்ற பிரபுக்கள் அனைவரும். ^a a v3 ரப்சாரீஸ், ரப்மாக் என்பவை பாபிலோனிய அரச பிரபுக்களுக்குள் உயர்பதவிப் பட்டங்களாயிருந்தன. ⁴யூதாவின் ராஜாவாகிய சிதேக்கியாவும் போர்வீரர் அனைவரும் அவர்களைக் கண்டபோது, இரவில் ராஜாவின் தோட்டத்தின் வழியாய், இரண்டு மதில்களுக்கு இடையேயுள்ள வாசல் வழியாய், நகரத்தைவிட்டு ஓடிப்போனார்கள்; அவன் அரபா என்னும் சமபூமியை நோக்கிப் புறப்பட்டான். ⁵ஆனால் பாபிலோனியரின் சேனை அவர்களைப் பின்தொடர்ந்து, எரிகோவின் சமபூமிகளில் சிதேக்கியாவைப் பிடித்தது. அவர்கள் அவனைப் பிடித்து, ஆமாத் தேசத்திலுள்ள ரிப்லாவில் பாபிலோன் ராஜாவாகிய நேபுகாத்நேச்சாரிடம் கொண்டுபோனார்கள்; அங்கே அவன் அவனுக்கு நியாயத்தீர்ப்பு வழங்கினான். ⁶பாபிலோன் ராஜா சிதேக்கியாவின் குமாரரை ரிப்லாவில் அவன் கண்களுக்கு முன்பாக வெட்டிக்கொன்றான்; யூதாவின் பிரபுக்கள் அனைவரையும் வெட்டிக்கொன்றான். ⁷பின்பு அவன் சிதேக்கியாவின் கண்களைக் குருடாக்கி, அவனைப் பாபிலோனுக்குக் கொண்டுபோகும்படி வெண்கலச் சங்கிலிகளால் கட்டினான்.

⁸பாபிலோனியர் ராஜாவின் அரண்மனையையும் மக்களின் வீடுகளையும் அக்கினியால் சுட்டெரித்து, எருசலேமின் மதில்களை இடித்துப்போட்டார்கள். ⁹காவற்சேனாதிபதியாகிய நேபுசராதான் நகரத்தில் மீதியாயிருந்த மக்களையும், தன்னிடத்தில் ஓடிவந்து சேர்ந்திருந்தவர்களையும், மீதியான மற்ற மக்களையும் பாபிலோனுக்குச் சிறைபிடித்துக் கொண்டுபோனான். ¹⁰காவற்சேனாதிபதியாகிய நேபுசராதான் ஒன்றுமில்லாத ஏழை மக்களில் சிலரை யூதாவிலே வைத்துவிட்டு, அந்நாளில் அவர்களுக்குத் திராட்சத்தோட்டங்களையும் வயல்களையும் கொடுத்தான்.

¹¹பாபிலோன் ராஜாவாகிய நேபுகாத்நேச்சார் எரேமியாவைக்குறித்து காவற்சேனாதிபதியாகிய நேபுசராதான்மூலமாய்க் கட்டளையிட்டு: ¹²“அவனை அழைத்துக்கொண்டு அவனைக் கவனித்துக்கொள்; அவனுக்கு ஒரு தீங்கும் செய்யாமல், அவன் உன்னிடம் கேட்கிறதையெல்லாம் செய்” என்று சொல்லியிருந்தான்.

¹³ஆகையால் காவற்சேனாதிபதியாகிய நேபுசராதானும், ரப்சாரீஸ் என்னும் நேபுஷஸ்பானும், ரப்மாக் என்னும் நேர்கல்-சரேத்சேரும், பாபிலோன் ராஜாவின் தலைமைப் பிரபுக்கள் அனைவரும் ஆள் அனுப்பி, ¹⁴காவற்சாலையின் முற்றத்திலிருந்து எரேமியாவை வரவழைத்து, அவனை வீட்டுக்கு அழைத்துக்கொண்டுபோகும்படி சாப்பானுடைய குமாரனாகிய அகீக்காமின் குமாரன் கெதலியாவினிடத்தில் ஒப்படைத்தார்கள். அப்படியே அவன் மக்கள் நடுவே தங்கியிருந்தான்.

¹⁵எரேமியா காவற்சாலையின் முற்றத்தில் அடைபட்டிருந்தபோது, எங்கள் பிதாவின் வார்த்தை அவனுக்கு உண்டாயிற்று:

¹⁶“நீ போய், எத்தியோப்பியனாகிய எபெத்மெலேக்கிடம் சொல்: வானசேனைகளின் பிதாவும் இஸ்ரவேலின் பிதாவுமானவர் சொல்லுகிறது என்னவென்றால்: இதோ, நான் இந்த நகரத்திற்கு விரோதமாய் என் வார்த்தைகளை நன்மைக்கல்ல, தீமைக்கே வரப்பண்ணுவேன்; அந்நாளில் அவை உன் கண்முன்பாக நிறைவேறும். ¹⁷ஆனால் அந்நாளில் நான் உன்னைத் தப்புவிப்பேன் என்று எங்கள் பிதா சொல்லுகிறார்; நீ பயப்படுகிற மனுஷரின் கையில் ஒப்புக்கொடுக்கப்படமாட்டாய். ¹⁸நான் உன்னை நிச்சயமாய்த் தப்புவிப்பேன்; நீ பட்டயத்தால் விழுவதில்லை. நீ என்னை நம்பினபடியால், உன் ஜீவன் உனக்குக் கொள்ளைப்பொருளாய் இருக்கும் என்று எங்கள் பிதா சொல்லுகிறார்.”