Ọdịda Jerusalem
Nnọchibido ahụ bịara na njedebe. Mgbidi ahụ tiwara, Zedekaya gbalaga, e jidekwa ya; o lere ka e gburu ụmụ ya ndị ikom, e mekwara ya ka ọ ghara ịhụ ụzọ, kekọta ya nʼagbụ. Obodo ahụ gbara ọkụ, a hapụkwara ndị ogbenye ubi. A tọhapụrụ Jeremaya nʼiwu Nebukadneza nʼonwe ya; Nna anyị kwere Ebed-Melek nkwa ndụ ya nʼihi na ọ tụkwasịrị ya obi.
39 1Nʼafọ nke itoolu nke ọchịchị Zedekaya eze Juda, nʼọnwa nke iri, Nebukadneza eze Babilọn chịịrị ndị agha ya niile bịakwasị Jerusalem gbaa ya gburugburu. 2Nʼafọ nke iri na otu nke ọchịchị Zedekaya, nʼọnwa nke anọ, nʼụbọchị nke itoolu nke ọnwa ahụ, e tipuru obodo ahụ. 3Mgbe ahụ, ndịisi niile nke eze Babilọn bịara nọdụ ala nʼỌnụ Ụzọ Ama Etiti: Nergal-Sharaza, Samgar-Nebo, Sarsekim onye Rab-saris, Nergal-Sharaza onye Rab-mag, na ndịisi ndị ọzọ fọdụrụ nke eze Babilọn. a a v3 Rab-saris na Rab-mag bụ aha ọkwa ndị dị elu nʼetiti ndịisi ụlọeze Babilọn. 4Mgbe Zedekaya eze Juda na ndị agha niile hụrụ ha, ha gbapụrụ nʼobodo ahụ nʼabalị, site nʼubi a gbara ogige nke eze, site nʼọnụ ụzọ ama dị nʼetiti mgbidi abụọ ahụ; ọ gawara nʼụzọ Araba. 5Ma ndị agha Babilọn chụrụ ha ọsọ, jidekwa Zedekaya nʼala dị larịị nke Jeriko. Ha jidere ya kpọgara ya Nebukadneza eze Babilọn na Ribla nʼala Hamat, ebe o kpere ya ikpe. 6Eze Babilọn gburu ụmụ ndị ikom Zedekaya na Ribla nʼihu ya, gbukwaa ndị a ma ama niile nke Juda. 7Mgbe ahụ, o mere Zedekaya ka ọ kpuo ìsì, jiri agbụ bronz kee ya ka ọ kpọga ya Babilọn.
8Ndị Babilọn jiri ọkụ gbaa ụlọ eze na ụlọ ndị mmadụ ọkụ, kwatuo mgbidi niile nke Jerusalem. 9Nebuzaradan, ọchịagha nke ndị nche, dọọrọ nʼagha buga Babilọn ndị mmadụ fọdụrụ nʼobodo ahụ, ndị gbafuru gakwuru ya, na ndị mmadụ ndị ọzọ fọdụrụ. 10Ma Nebuzaradan, ọchịagha nke ndị nche, hapụrụ ụfọdụ nʼime ndị kasị dara ogbenye, bụ ndị na-enweghị ihe ọbụla, nʼala Juda, nye ha ubi vaịn na ubi nʼụbọchị ahụ.
11Ugbu a, Nebukadneza eze Babilọn enyela iwu banyere Jeremaya site nʼaka Nebuzaradan, ọchịagha nke ndị nche, sị, 12“Kpọrọ ya lekọta ya anya; emela ya ihe ọjọọ ọbụla, kama mee ihe ọbụla ọ rịọrọ.”
13Ya mere, Nebuzaradan ọchịagha nke ndị nche zipụrụ ozi, ya na Nebushazban onye Rab-saris, Nergal-Sharaza onye Rab-mag, na ndịisi ukwu niile nke eze Babilọn. 14Ha kpọpụtara Jeremaya site nʼogige ndị nche nyefee ya Gedalaya nwa Ahikam, nwa Shefan, ka ọ kpọrọ ya laa. Ya mere, o biri nʼetiti ndị mmadụ.
15Okwu Nna anyị bịakwutere Jeremaya mgbe a kpọchiri ya nʼogige ndị nche, sị:
16“Gaa gwa Ebed-Melek onye Kush, sị: Otu a ka Nna nke usuu ndị agha eluigwe, Nna nke Izrel kwuru: Lee, ana m eweta okwu m niile megide obodo a maka ihe ọjọọ, ọ bụghị maka ihe ọma, nʼụbọchị ahụ kwa, ha ga-emezu nʼihu gị. 17Ma aga m anapụta gị nʼụbọchị ahụ, ka Nna anyị kwupụtara; a gaghị arara gị nye nʼaka ndị ikom ị na-atụ egwu. 18Nʼezie, aga m anapụta gị; ị gaghị ada site na mma agha. Ndụ gị ga-abụrụ gị ihe nkwata nʼagha, nʼihi na ị tụkwasịrị m obi, ka Nna anyị kwupụtara.”
