Jerusalemwui Akhuikahai
Keinung kuimareikhami chi ngachanghaowa. Phākho kongthāda Zedekiah yāmhaowa kala athumna ali tukkhui; awui miktāli anaomayarabing shaothatmi, awui mik latshokmihaida mari khānghui eina khalaphaowa. Keinung chi meina thothaowa, kala makhaleibingli lui chi haimihaowa. Nebuchadnezzar khalattawui hukhum eina Jeremiahli chihomihaowa; ithumwui Avāna ali chikahamwui vang Ebed-melechli awui kharing mira da ngashitmi.
39 1Judah awunga Zedekiahwui khamung kachiko zingkum, kachāng katharāli, Babylonwui awunga Nebuchadnezzarna awui raimi saikora ngasoda Jerusalemli vāda akuinamhaowa. 2Zedekiahwui khamung zingkum tharāda akha, kachāng khamateli, zimiksho kachikoli, keinungwui phākho sakhaimihaowa. 3Chiwui thili Babylonwui awungawui wungnaobing saikora Alung Khamongli rāpama: Nergal-sharezer, Samgar-nebo, Sarsechim Rabsaris, Nergal-sharezer Rabmag, kala Babylon awungawui wungnao kateibing. a a v3 Rab-saris kala Rab-mag hina Babylonwui awungawui wungnaobingwui ngachaili khareiya amingbing khanina. 4Judah awunga Zedekiah kala raimibing saikorana athumli theilaga, chithang ngayā awungawui yāmgui eina, phākho khanini ngachaili khalei khamong eina keinung eina yāmhaowa; kala ana Arabahshong zatphokhaowa. 5Kha Babylonwui raimibingna athumli kharomvālaga Jericho tampākli Zedekiahli angaphankhuihaowa. Athumna ali tukkhuida Hamath ngaleiwui Riblahli Babylonwui awunga Nebuchadnezzarli khuiungmi, kala apam chili awuitungli tuitak khuihaowa. 6Babylonwui awungana Riblahli awui miktāli Zedekiahwui naomayarabingli shaothata, kala Judahwui khangambing saikorala shaothatserhaowa. 7Chiwui thili ana Zedekiahwui mik latshokmihaowa, kala Babylonli khuivaikhavai pheipāng eina khalaphaowa.
8Chaldeanaobingna awungawui shim kala mibingwui shimbing mei eina thottāmihaowa, kala Jerusalemwui phākho sākhaiserhaowa. 9Keinungli notha kahai mi kateibing, awuili raituk sāda ayāmkasangbing, kala kateibing saikorali shantriwui kathāna Nebuzaradanna Babylonli tukthuiserhaowa. 10Shantriwui kathāna Nebuzaradanna khikha makhalei kachām-khangaibing kaikhali Judah ngaleili haihaowa, kala chithang zimiksho athumli drakhā yāmgui kala lui mihaowa.
11Babylonwui awunga Nebuchadnezzarna shantriwui kathāna Nebuzaradanwui pāng eina Jeremiahwui pongli kaso mida hānga, 12"Ali khuida mayonlu; ali sākashi masālu, kha ana kapo chi saikora sāmilu."
13Chiwui vang shantriwui kathāna Nebuzaradan, Rabsariswui Nebushazban, Rabmagwui Nergal-sharezer, kala Babylon awungawui khareiya wungnaobing saikorana mi chihovāhaowa. 14Athumna Jeremiahli raikānwui yāngkhupli eina khuirālaga, shimli khuivaikhavai Shaphanwui nao Ahikamna kapharā Gedaliahli horsangmi. Chithāda ana mibingli pānrumhaowa.
15Jeremiahli raikānwui yāngkhupli khamayona sanghai leilakha, ithumwui Avāwui tui china ali rāhānga:
16"Zatlu, Cushpa Ebed-melechli unghānglu: saikorawui Avā, Israelwui Avāna hithāda hānga: Iwui tui hi keinung hiwuitungli kaphā khavai maningla, ka̱lākashi khavai ina kuphaora, kala chithang zimiksho nawui mangāli shokra. 17Kha chithang zimiksho ina nali huikhuira, da ithumwui Avāna hānga; nana khangachee kahai mibingwui pāngli na masangmimara. 18Ina nali ngatangmira; na raighai eina mathimara. Nana ili shitkasangwui vang nawui mirin raiman sāda nawui samphangra, da ithumwui Avāna hānga."
