Kubwa ya Yelusalemi
Kuzunga sukaka. Kibaka pasukaka, Sidekya kimaka mpe ba simbaka yandi, yandi talaka bana ya yandi ba fwa, mpe ba fwaka meso ya yandi mpe kangaka yandi na basinga. Mbanza pelaka tiya, mpe ba bikilaka bamputu bilanga. Ba katulaka Yelemi na ntumunu ya Nebukadinezale yandi mosi; Tata ya beto silaka Ebede-Meleke luzingu ya yandi samu yandi tulaka kivuvu na yandi.
Tata ya beto ke zonza na bavese 16–18
39 1Na mvula ya yivwa ya Sidekya, ntinu ya Yuda, na ngonda ya kumi, Nebukadinezale, ntinu ya Babilone, kwizaka na binwani nyonso ya yandi na kunwanisa Yelusalemi mpe yandi zungaka yawu. 2Na mvula ya kumi na mosi ya Sidekya, na ngonda ya yiya, na kilumbu ya yivwa ya ngonda, ba kotaka na kati ya mbanza na ngolo. 3Na yina, bamfumu nyonso ya ntinu ya Babilone kwizaka mpe vwandaka na Mwelo ya Kati-kati: Negale-Salesele, Samengale-Nebo, Salesekimi Labe-salisi, Negale-Salesele Labe-mage, mpe bamfumu ya nkaka ya ntinu ya Babilone. a a v3 Labe-salisi mpe Labe-mage vwandaka bankumbu ya bunene na kati ya bamfumu ya luyalu ya kimfumu ya Babilone. 4Ntangu Sidekya, ntinu ya Yuda, na binwani nyonso talaka bawu, bawu kimaka na mbanza na mpimpa na nzila ya bilanga ya ntinu, na mwelo yina kele na kati-kati ya bibaka zole; mpe yandi basikaka na nzila ya Alaba. 5Kasi binwani ya Babilone landaka bawu mpe bawu bwilaka Sidekya na mudimba ya Yeliko. Bawu simbaka yandi mpe nataka yandi na Nebukadinezale, ntinu ya Babilone, kuna na Libela na yinsi ya Amate, kisika yina yandi pesaka lufundusu na yandi. 6Ntinu ya Babilone kufwaka bana ya Sidekya kuna na Libela na meso ya yandi, mpe yandi kufwaka bantu ya mfunu nyonso ya Yuda. 7Na yina, yandi fwaka meso ya Sidekya mpe kangaka yandi na basinga ya kisengo ya mbwaki samu na kunata yandi na Babilone.
8Bantu ya Babilone yokaka na tiya yinzo ya ntinu mpe bayinzo ya bantu, mpe bawu bwisaka bibaka ya Yelusalemi. 9Nebuzaladane, mfumu ya bankebi, nataka na Babilone mutindu bankole: bantu ya nkaka yina bikanaka na mbanza, bayina kimaka mpe kwendaka na lweka ya yandi, mpe bantu ya nkaka yina bikanaka. 10Nebuzaladane, mfumu ya bankebi, bikaka na Yuda bantu ya nkaka ya nsukami ya kulutila, bayina vwandaka na kima ve, mpe yandi pesaka bawu bilanga ya bayinti ya vinu na bilanga na kilumbu yina.
11Nebukadinezale, ntinu ya Babilone, pesaka bantumunu na yina me tadila Yelemi na nzila ya Nebuzaladane, mfumu ya bankebi, yandi tubaka: 12«Baka yandi mpe keba yandi; sala yandi yimbi ve, kasi sala konso kima yina yandi ke lomba.»
13Na yina, Nebuzaladane, mfumu ya bankebi, fidisaka nsangu, yandi na Nebusazebane Labe-salisi, Negale-Salesele Labe-mage, mpe bamfumu nyonso ya bunene ya ntinu ya Babilone. 14Bawu nataka Yelemi na lupangu ya bankebi mpe bawu pesaka yandi na Ngedalya, mwana ya Ayikame, mwana ya Safate, samu na kunata yandi na yinzo. Na yina, yandi bikanaka na kati ya bantu.
15Mambu ya Tata ya beto kwizaka na Yelemi ntangu yandi vwandaka ya kukangama na lupangu ya bankebi:
16«Kwenda zabisa Ebede-Meleke, muntu ya Etyopi: Yayi ni mambu yina Tata ya binwani ya mazulu, Tata ya Isayeli, ke tuba: Mu ke na kunata mambu ya munu na mbanza yayi samu na yimbi, kasi samu na mbote ve, mpe na kilumbu yina, yawu ke salama na meso ya nge. 17Kasi mu ke kuula nge na kilumbu yina, Tata ya beto ke tuba; ba ke yekula nge ve na maboko ya bantu yina nge ke waka boma. 18Mu ke kuula nge; nge ke kufwa ve na mbele ya mvita. Luzingu ya nge ke vwanda mutindu kima yina nge me baka na mvita, samu ti nge tulaka kivuvu ya nge na munu, Tata ya beto ke tuba.»