Jerusalem Giri Juwa
Gheri thaka khotom hoise. Deor bhangi jaise, Zedekiah bhagise aru dhora hoise, nijor chokra khan ke mari diya dikhise, aru tai laga suku andha kori kene shikol pora bandhi dise. Sheher julise aru gorib manuh khan ke kheti laga mati dise. Nebuchadnezzar laga nijor hukum pora Jeremiah ke chari dise; amar Pitri pora Ebed-Melech ke Tai uporte bhorosa kora nimite tai laga jivon bachibo koi kene kosom dise.
39 1Judah laga raja Zedekiah raj kora noi bosor te, dos number maha te, Babylon laga raja Nebuchadnezzar tar laga sob sena loi kene Jerusalem birodh te ahhi kene, eitu ke gheri loise. 2Zedekiah laga egaroh bosor te, char number maha te, maha laga noi tarikh te, sheher tu bhangai dise. 3Tetiya Babylon laga raja laga sob adhikari khan ahhi kene Majher Dorja te bohise: Nergal-Sharezer, Samgar-Nebo, Rab-saris Sarsechim, Rab-mag Nergal-Sharezer, aru Babylon laga raja laga baki adhikari khan. a a v3 Rab-saris aru Rab-mag tu Babylon laga raja laga adhikari khan majot te dangor podvi khan thakise. 4Judah laga raja Zedekiah aru sob sipahi khan pora tarkhan ke dikhise, tetiya tarkhan rati te raja laga bagan phale, duita deor majher dorja pora sheher tu chari kene bhagi jaise; aru tar Arabah phale ulai jaise. 5Kintu Babylon laga sena pora tarkhan ke pichete khedi kene Jericho laga samtol te Zedekiah ke dhori loise. Tarkhan pora tar ke dhori kene Hamath desh laga Riblah te thaka Babylon laga raja Nebuchadnezzar usorte loi jaise, aru ta te tar pora Zedekiah uporte saja korise. 6Babylon laga raja pora Riblah te Zedekiah laga suku usorte tar laga chokra khan ke morai dise, aru Judah laga sob dangor manuh khan ke bhi morai dise. 7Tetiya tar pora Zedekiah laga suku andha kori dise aru tar ke Babylon te loi jabole pitol laga sikli pora bandhise.
8Babylon laga manuh khan pora raja laga ghor aru manuh khan laga ghor khan ke jui pora julai dise, aru Jerusalem laga deor khan ke bhangai dise. 9Pohoradar khan laga henapoti Nebuzaradan pora sheher te baki thaka manuh khan, tar logote jai jua bhagi aha manuh khan, aru baki thaka manuh khan ke Babylon te bondi kori kene loi jaise. 10Pohoradar khan laga henapoti Nebuzaradan pora, eku bhi nathaka sob pora gorib manuh khan majot te kunba ke Judah te chari dise, aru hei din te tarkhan ke angur bari aru kheti khan dise.
11Etiya Babylon laga raja Nebuchadnezzar pora pohoradar khan laga henapoti Nebuzaradan dwara Jeremiah laga bisoy te hukum di kene koise, 12“Tar ke loi kene tar ke bhal pora sabi; tar ke eku biya nakoribi, kintu tar pora ji mangbo eitu sob koribi.”
13Titre pohoradar khan laga henapoti Nebuzaradan pora, Rab-saris Nebushazban, Rab-mag Nergal-Sharezer, aru Babylon laga raja laga sob mukhyo adhikari khan logote, khobor pathai dise. 14Tarkhan pora Jeremiah ke pohoradar khan laga chowk pora ani kene, ghor te loi jabole Shaphan laga nati, Ahikam laga chokra Gedaliah ke di dise. Titre tar manuh khan majot te thaki jaise.
15Jeremiah tu pohoradar khan laga chowk te bondi thaka homoi te, amar Pitri laga kotha tar logote ahhise,
16“Jai kene Cush manuh Ebed-Melech ke kobi: Sorgo laga sena khan laga Pitri, Israel laga Pitri pora eneka koi ase: Moi eitu sheher birodh te bhal nimite nohoi, kintu biya nimite Moi laga kotha khan ani ase, aru hei din te eitu tumar usorte purah hobo. 17Kintu hei din te Moi tumi ke bacha bo, amar Pitri pora koi ase; tumi bhoi kora manuh khan laga hathte tumi ke di dibo nai. 18Moi nischo tumi ke bacha bo; tumi talwar pora giri nabo. Tumar jivon tu tumar jitia laga puroskar hobo, kilemane tumi Moi uporte biswas korise, amar Pitri pora koi ase.”