Jeremiah ke Kuwa Bhitor te Phelai Dise
Adhikari khan pora amar Pitri laga Jeremiah laga hath di dibi koi kene kotha ke desh laga birodh kotha koise aru tai ke bhuk pora moribole kada thaka kuwa bhitor te namai dise. Cush laga Ebed-Melech raja logot binti korise aru puran kapra aru rosi pora tai ke uthai anise. Zedekiah aru ekbar lukai kene sudhise, hath di dile jivon bachibo koi kene huna paise, kintu tai etu loi napara hoise.
38 1Mattan laga putro Shephatiah, Pashhur laga putro Gedaliah, Shelemiah laga putro Jucal, aru Malchijah laga putro Pashhur, Jeremiah pora sob manuh khan ke koi thaka kotha hunise:
2amar Pitri pora etu koi ase: “Kun manuh eitu sheher te thakibo, tai talwar, akal aru bemari pora moribo, kintu kun manuh Babylon manuh khan ke nijor ke di dibo, tai jinda thakibo aru nijor jivon ke lut laga jinis nisena bachai rakhibo. 3amar Pitri pora etu koi ase: Eitu sheher tu hosa pora Babylon laga raja laga sena ke di dibo, aru tai eitu ke dhori lobo.”
4Adhikari khan pora raja ke koise, “Eitu manuh ke morai dibi. Eneka kotha pora eitu sheher te bachi thaka sipahi khan aru sob manuh khan laga hath komjor kori diye. Tai taikhan laga bhal nohoi kintu taikhan laga biya bisari ase.”
5Zedekiah raja pora koise, “Sabi, tai tumikhan laga hath te ase; raja pora tumikhan laga birodh te eku koribo napare.”
6Taikhan Jeremiah ke loi kene, pahara diya angan te thaka raja laga putro Malchiah laga kuwa te rusi pora namai kene phelai dise. Hei kuwa te pani thaka nai, khali kada he thakise, aru Jeremiah kada bhitor te dubi jaise.
7Kintu Cush desh laga manuh Ebed-Melech, ekjon raja ghor laga adhikari, taikhan Jeremiah ke kuwa te rakhise koi kene hunise. Raja tu Benjamin laga Duar te bohi thaka homoi te, 8Ebed-Melech raja ghor pora bahir ulai jai kene raja ke koise: 9“Moi laga probhu raja, eitu manuh khan bhabobadi Jeremiah ke kora sob kaam te biya kaam korise, tai ke bhuk pora moribole kuwa te phelai dise, kilemane sheher te roti aru nathaka hoise.”
10Raja pora Cush desh laga Ebed-Melech ke hukum dise, “Yate pora tisgo manuh tumi logote loi kene, bhabobadi Jeremiah ke tai mora age te kuwa pora tani ulabi.”
11Ebed-Melech manuh khan ke loi kene, raja ghor te jaise, dhun rakha ghor laga nichete thaka ekta kamra te, purana puchra aru phata purana kapra khan loi kene, kuwa te thaka Jeremiah logote rusi pora namai dise. 12Cush desh laga Ebed-Melech pora Jeremiah ke koise, “Eitu phata puchra aru kapra khan tumi laga bagol nichete, rusi laga nichete rakhibi.” Aru Jeremiah pora eneka korise. 13Taikhan rusi pora Jeremiah ke kuwa pora tani ulaise; Jeremiah pahara diya angan te thakise.
Raja pora Pitri laga Kotha Hunise
14Tetiya Zedekiah raja pora bhabobadi Jeremiah ke mati pathaise aru tai ke amar Pitri laga ghor laga tisra duar te ani dise. Raja pora Jeremiah ke koise, “Moi tumi ke ekta kotha hudibo; moi pora eku nalukabi.”
15Jeremiah pora Zedekiah ke koise, “Jodi moi tumi ke kobo, tumi moi ke morai nadibo na? Aru jodi moi tumi ke upodesh dibo, tumi huni nalobo.”
16Zedekiah raja pora Jeremiah ke lukai kene kosom khaise, “Amikhan ke eitu jivon diya amar Pitri jinda thaka nisena, moi tumi ke morai nadibo nohoile tumi laga jivon bisari thaka eitu manuh khan ke di nadibo.”
17Jeremiah pora Zedekiah ke koise, “Sorgo laga sena khan laga Pitri, Israel laga Pitri pora etu koi ase: ‘Jodi tumi Babylon raja laga adhikari khan ke nijor ke di dibo, tumi laga jivon bachi jabo, eitu sheher ke jui pora julai nadibo, aru tumi aru tumi laga ghor manuh khan jinda thakibo. 18Kintu jodi tumi Babylon raja laga adhikari khan ke nijor ke di dibole mana koribo, eitu sheher Babylon manuh khan ke di dibo, kun pora eitu ke julai dibo, aru tumi taikhan pora bachi polabo naparibo.’”
19Zedekiah raja pora Jeremiah ke koise, “Babylon manuh khan logote polai jua Yehudi manuh khan ke moi bhoi khai ase; taikhan pora moi ke dukh dibole, moi ke taikhan laga hath te di dibo pare.”
20Jeremiah pora koise, “Taikhan tumi ke di nadibo. Moi tumi ke koa nisena amar Pitri laga awaj ke mani lobi, titia bhal hobo aru tumi laga jivon bachi jabo. 21Kintu jodi tumi nijor ke di dibole mana koribo, amar Pitri pora moi ke dikhai diya kotha tu eitu ase:
22“Sabi! Yehuda raja laga ghor te bachi thaka sob mahila khan ke Babylon raja laga adhikari khan logote ulai ani dibo, aru taikhan kobo: ‘Tumi biswas kora sathi khan pora tumi ke thogai dise aru harai dise; tumi laga theng kada te dubi jaise, aru taikhan tumi pora pichete ghuri jaise.’”
23“Tumi laga sob maiki aru bacha khan ke Babylon manuh khan logote loi jabo, aru tumi taikhan laga hath pora bachi polabo naparibo kintu Babylon raja pora tumi ke dhori lobo, aru eitu sheher ke jui pora julai dibo.”
24Tetiya Zedekiah pora Jeremiah ke koise, “Eitu kotha laga bisoy te kun bhi najanibo nadibi, nahole tumi moribo pare. 25Jodi adhikari khan pora moi tumi logote kotha korise koi kene hunibo aru ahi kene kobo, ‘Tumi raja ke ki koise aru tai tumi ke ki koise, eitu amikhan ke kobi; amikhan pora eku nalukabi, nahole amikhan tumi ke morai dibo,’ 26titia taikhan ke kobi, ‘Moi ke moribole Jonathan laga ghor te wapas napathabole moi raja ke binti kori thakise.’”
27Sob adhikari khan ahi kene Jeremiah ke hudise, aru raja pora hukum diya nisena he tai jawab dise. Titia taikhan chup hoise, kilemane eitu kotha kun bhi huna nai. 28Jeremiah tu Jerusalem ke dhori luwa din tak pahara diya angan te thakise. Aru Jerusalem giri juwa homoi te eneka halat thakise.